Kəla rāā Ngámbang kəla gə̄ 27
27
Əlan̄ kə Poló Rom
1Dan ń unən̄ ndūdə́ yā kadə̄ j-aw̄ Itali kə to boó ní, əlan̄ Pol nin̄ kə dəngáý kə́rēý gēé jī ngol áskar gə̄ kógə̄ḿ kə́ rīn na i Julius tə́. Ni i ngol ɓūtə̄ áskar gə̄ ń a ɓārə́n̄də́ na i ngé rɔ̄ gə̄ yā *Sejar ní. 2Loo ń noō tə́ j-al̄ kem too bo kógə̄ḿ kə́ Adəramitə tə́, kə́ a aw̄ i yā kaw̄ dəba kə gō kum kā̰ā̰ gə̄ kə́ gō nang kə́ Aji tə́ tə́. Too ní ɔr̄ dɔɔ́ sejí. Deē ń i sejí ní i Aristark. Ni i de kə́ Masedəwan kə́ Tesalonik tə́. 3Teē kə ndɔ̄ kə́ noō anī j-ugə̄ Sidon. Julius ń i nge rāā kem majə kə Poló ní, əya̰n kadə̄ aw̄ rɔ̄ madə̄n gə̄ tə́ kadə̄ rāān̄ seneé. 4Dan ń j-ḭḭ noó ní a j-əndā to i kə gō kadə kóongó kə́ dor̄ kə́ Sipər tə́ kadə̄ taā nél dɔjí tə́, tɔdɔ̄ nél əla i kə gō gūsə̄rūú. 5Gō tə́ anī j-ənda dan bā bo kə́ Silisi ō, kə́ Pampili ō jə-gān̄g ba j-ugə̄ Mira nang kə́ Lisi tə́. 6Ngol áskar gə̄ ənge too bo kógə̄ḿ kə́ Aleksandəri kə́ a aw̄ i kə̄ Itali loo ngeé ń noō tə́ anī, adə̄ j-al̄ kemeé.
7Rāā ndɔ̄ ngá̰ý ní to njə̄rā sejí láẃ aĺ bátə́, adə̄ j-a̰a̰ tápə̄ ngá̰ý tá j-ugə̄ń loo ń ra sɔɔ̄n̄ ta naā kə ɓē kə́ Kənidə ní tə́. Dan ń nél a əla i kə gō gūsə̄rūú adə̄ ɔgə̄jí kaw̄ kum kə̄ kété ní, jə-tetə rɔ̄jí j-aw̄ Salmone ń i ta só̰o̰ dor̄ kə́ Kəretə ní tə́, ba j-əndā to bo kə gō kadə̄ kóongó kə́ dor̄ kə́ Kəretə tə́ kadə̄ taā nél dɔjí tə́. 8J-a̰a̰ tápə̄ loo njə̄rā tə́ kə to boó kə gō kadə̄ kóongó ní bátə́ j-ugə̄ń loo ń a ɓārə́n̄ na i kum kā̰ā̰ kə́ majə gə̄ tə́ ní, ngɔr kə̄ kadə̄ ɓē kə́ Laje tə́.
9Ndɔ̄ gə̄ mānən̄ ngá̰ý kɔ̄ɔ́ ō, njə̄rā mbā kə to boó ní tél a otə i yo pipḭ ō, tɔdɔ̄ ndɔ̄ ń a *ndin̄neé ɓō tām̄ yā Nə́ɓā tə́ ní mān̄ kɔ̄ɔ́#27.9 Ndɔ̄ ń a ndin̄neé ɓō tām̄ yā Nə́ɓā tə́ ní. Á̰a̰ī Leb 16.29-34. Adə̄ Pol tāā madə̄ mbān gə̄ ədadə́ na:
10Madə́ḿ gə̄, m-á̰a̰ kadə̄ mbā ń toō a to karī pápáĺ kanjə̄ yá̰á̰ kə́ to yo alé: Too bo gə̄gē, yá̰á̰ kə́ kemeé gə̄gē a nujən̄ nujə kə́ majaĺ ngá̰ý ō, tá ɓáý to̰ ní, jḭḭ̄ kɔ́ gə̄ gə̄gē ní yá̰á̰ kə́ ngan̄g a rāājí ō.
11Banī ngol áskar gə̄ taā kem najə̄ kɔr̄ nge nēl̄ to bo ō, kɔ́ɔ̄ to bo ō, tɔȳ najə̄ kɔr̄ Pol. 12Kum kā̰ā̰ ní majə ndi tū tə́ kūlīí alé. Adə̄ ngá̰ý gə̄ ndigən̄ kadə̄ ré i loon tə́ ɓáa kə n-aw̄ kə n-ndin̄ Penikəs kə n-ngóōn̄neé kadə̄ gír kūl̄ gān̄g tá. Penikəs i kum kā̰ā̰ kógə̄ḿ kə́ dor̄ kə́ Kəretə tə́, kə́ ra kumən sɔɔ̄ loo kə́ dɔ dáń mbɔ́r ɓē kə́ geleé tə́ kə loo kə́ no ɓē tə́ ō, ra kumən sɔɔ̄ loo kə́ dɔ dáń mbɔ́r ɓē kə́ ko̰ó̰ tə́ kə loo kə́ no ɓē tə́ ō.
Néĺ balway əla dɔ bā bo tə́
13Ngōn̄ néĺ kógə̄ḿ kə́ dām̄ mbɔ́r ɓē kə́ geleé tə́ əla pelele, anī nin̄-ɔjən̄neé na yá̰á̰ ń na n-gírə̄n̄ rāā ní na n-a n-rāān̄ kadə̄ a udə gírí karī. Gində̄ kə́ ta ngɔr ngo̰ ń rāān̄ bēl̄ tə́ əhɔn̄neé to bo gotə kógə̄ḿ ní, ndɔ́r̄ ənīn̄ kem toó, ba adə̄n̄ néĺ ndɔ́r̄ to bo kə gō kadə kóongó kə́ dor̄ kə́ Kəretə tə́ ngɔr ngɔr aw̄ń. 14Sḛ́ý beē gō tə́ anī nél balway kógə̄ḿ kə́ dām̄ mbɔ́r ɓē kə́ ko̰ó̰ tə́ ḭḭ dɔ mbal̄ gə̄ kə́ Kəretə tə́ reē əsō maná. 15Néĺ ní ɔr too bo aw̄ń, tɔdɔ̄ loo kəhɔn gotə kógə̄ḿ dum̄, adə̄ j-əya̰n dɔɔ́ adə̄ aw̄ kə gō nélé. 16-17Dan ń jə-rə̄ngō rɔ̄jí gidə ngōn̄ dor̄ loo kógə̄ḿ kə́ a ɓāŕnən̄ na i Kəloda tə́ anī, mbal̄ kə́ dor̄ ní tə́ taā nél dɔjí tə́ sḛ́ý. Loo ń noō tə́ j-a̰a̰ tápə̄ loo kaw̄ kə ngōn̄ to kə́ yā kajəń deé kem nge kə́ bo tə́. Jə-ndɔ́rə̄n j-əndān kemeé, ba gō tə́ anī jə-ɓír̄ too bo ní kə kəlaá. Tá gō ɓōĺ tə́ najə̄ kadə̄ to aw̄ əga nang Sirtə#27.17 Sirtə i mba bā bo kə́ tɔ̄ɔ̄ udə dɔ nang kə́ Libi tə́, ba nán̄g siyá̰k kə́ a əhɔ deē i tū tə́. tə́ ní, nin̄-əya̰n̄ hórōńg#27.17 Hórōńg ní rāān̄ i kə kāgə̄ kə́ ɔȳ kə́ to a ndɔ́r̄ gōn tə́. Ni i nge rāā kadə̄ to bo a njə̄rā i kə gō nélé. Banī ngé tūr̄ najə̄ ń toō kə́rēý gə̄ ədan̄ na: Télən̄ na i kə kūbə̄ toó kə̄ nang tə́ kadə̄ nél əsō kemeé alé. adə̄ ḭḭ kal dɔ man̄ tə́, ba əya̰n̄ adə̄ néĺ ndɔ́r̄jí aw̄ sejí. 18Néĺ ní na̰y kə̄ loo bḭ́ḭ̄jí tə́ kə ngangāá ngá̰ý ɓáý. Banī teē kə ndɔ̄ kə́ noō anī, j-ɔy yá̰á̰ kə́ kem toó kə̄ bāá bāá. 19Teē kə ndɔ̄ kə́ nge ko̰ mətá anī, ngé rāā kəla kem to boó gə̄ ɔyn̄ yá̰a̰ to gə̄ kə jīdə́ ɓōkə́n̄ kum man̄ tə́ kɔ̄ɔ́. 20Rāā ndɔ̄ ngá̰ý ní j-a̰a̰ kum mbang aĺ ō, tə́yō̰ gə̄ aĺ ō, nél əhɔ rɔ̄n sḛ́ý aĺ ō. Adə̄ j-əndā kemjí dɔ kajə tə́ to̰ alé.
21Rāā ndɔ̄ ngá̰ý ní deē əsa yá̰a̰ alé. Anī Pol ḭḭ ra dɔɔ́ dan madə̄n gə̄ tə́ ba ədadə́ na:
Madə́ḿ gə̄, nə́ngētə́ ōōī i taḿ ba ī-ndɔ́tī Kəretə tə́ aĺ anī, yá̰á̰ kə́ to yo ń toō a əsō dɔjí tə́ aĺ ō, yá̰a̰ gə̄ a nujən̄ aĺ ō. 22Ba ń toō ɓáa m̄-mēr̄sí kadə̄ ə́hɔī rɔ̄sí tɔgə, tɔdɔ̄ deē kógə̄ḿ dansí tə́ a oy alé, ba i too ngóy n a udə. 23Tām̄ ngɔlaā ní *de kə́ dɔ rā̰ tə́ yā Nə́ɓā ń mā i deē yān ō, m̄-rāā kəla yān ō ní, reē rɔ̄ḿ tə́ 24ba ədam̄ na: Pol ī-lōō ɓōĺ, tɔdɔ̄ i gáŕ kadə̄ ā ī-ra no *Sejar tə́ ō, de gə̄ malang ń nin̄ i seí kem toó ní, Nə́ɓā adī sedə́ ō. 25Ní, madə́ḿ gə̄, ə́hɔī rɔ̄sí tɔgə! Mā m̄-taā kem Nə́ɓā, adə̄ yá̰a̰ gə̄ a reēn̄ yā to tītə̄ ń ni-ədamə̄ń ní. 26Banī i gáŕ kadə̄ to a əga nang adə̄ a dəba kadə dor̄ loo kógə̄ḿ tə́.
27I ndɔ̄ kutə gidə i sɔ́ kɔ̄ɔ́ tā n nél a bḭ́ḭńjí dɔ bā bo tə́ kə̄ non tə́ ní. Ugə̄ ngɔr kə̄ dan loo tə́ anī ngé rāā kəla kem toó gə̄ a̰a̰n̄ kadə̄ tītə̄ kə́ dɔ nang kógə̄ḿ i ngɔr rɔ̄jí tə́ beē. 28Adə̄ nin̄-əlan̄ kəlā kə́ yá̰á̰ kə́ ɔȳ i ta tə́ kum man̄ tə́ yā gerə̄ń ɓūl̄ man̄, anī a̰a̰n̄ kadə̄ asə métər kutə mətá gidə i sīrí. Nin̄-aw̄n̄ kə̄ kété sḛ́ý ba əlan̄ kəlā ní kum man̄ tə́ ɓáý to̰, anī əngen̄ i métər kutə jōó gidə i sɔ́sɔ́. 29Gō ɓōĺ tə́ najə̄ kadə̄ to bo aw̄ əga mbal̄ sejí loo kógə̄ḿ tə́ ní, nin̄-ɓōkə́n̄ gində̄ kə́ tadə́ ngɔr ngo̰ gə̄ sɔ́ kum man̄ tə́ kə̄lá to tə́ əhɔn̄neé to bo gotoó, ba ndə̄ngān̄ kadə̄ kə loo kə tīī láẃ. 30Ngé rāā kəla kem toó gə̄ sāān̄ kəya̰ too ba ka̰ȳ naā. Nin̄-unən̄ ngōn̄ too kə́ yā kajəń deē ní ənīn̄ kum man̄ tə́, ba rāān̄ ngam ədan̄ na n-aw̄n̄ na i kə̄ kəla gində̄ kə́ ta ngɔr ngo̰ kə́ ta bay too tə́ kum man̄ tə́. 31Anī Pol əda ngol áskar gə̄ ō, áskar gə̄ ō na:
Ré de gə̄ ń noō ndin̄ kem too boó aĺ anī sḭḭ̄ ā ájiī alé.
32Tā anī áskar gə̄ gángə̄n̄ kəlā kə́ tū ngōn̄ to ní tə́ ba əya̰nən̄ adə̄ aw̄.
33Dan ń a ngóōn̄ kadə̄ loo tīī ɓáý anī, Pol ɔsə sedə́ malang ta kəsa yá̰a̰, ni-ədadə́ na:
Ɓōólaā i ndɔ̄ kə́ nge ko̰ kutə gidə i sɔ́ ń ī-ndi ā ī-ngóōīneé ta yá̰á̰ kə́ a rāā yā rāāsí kanjə̄ kəsa yá̰á̰ ní. 34Adə̄ m̄-mēr̄sí kadə̄ ī-tél ə́saī yá̰a̰ gogə́, tɔdɔ̄ i nge ń noō n ā ájiīneé ní. Deē kógə̄ḿ dansí tə́ kə́ kadə̄ nənga dɔn kógə̄ḿ gə̄gē ta a tḭ̄ḭ̄ ní gətóo.
35Dan ń Pol əda najə̄ gə̄ ń noō oy anī un mápa, ndadə̄ Nə́ɓā dɔ tə́ ta kumdə́ tə́ malang, ba gō tə́ anī tetə naā tə́ ba əsa. 36Loo ń noō tə́ de gə̄ malang əhɔn̄ rɔ̄də́ tɔgə ba əsan̄ yá̰a̰ ō. 37Jḭḭ malang ń i kem toó ní, jḭḭ i deē 276. 38Dan ń əsan̄ yá̰a̰ asədə́ anī, ɓōkə́n̄ gémē bāá kɔ̄ɔ́ kadə̄ too bo hɔɔ́lɔń.
Too bo bɔɔ sejí
39Dan ń loo tīī anī, ngé rāā kəla kem toó gə̄ a̰a̰n̄ dɔ nang gerə̄n̄ alé. Nin̄-a̰a̰n̄ i mba man̄ kə́ tɔ̄ɔ̄ ō, ndágə loo kə́ ta man̄ tə́ kə́ nán̄g siyá̰k i tū tə́ ō, adə̄ gḛyn̄ səlā too bo tū tə́ ké a to karī wa. 40Nin̄-tútə̄n̄ kəlā kə́ tū gində̄ kə́ tadə́ ngɔr ngo̰ gə̄ ń əhɔn̄neé too bo gotə kógə̄ḿ ní tə́, ba əya̰n̄də́ kɔ̄ɔ́ gír maná ō, tútən̄ kəlā tū háy gə̄ ń a nēlə̄n̄neé to bo tə́ ní ō. Gō tə́ anī do̰ō̰n̄ ta kūbə̄ kógə̄ḿ ń nél a ndɔ́rəń too bo ní dɔ bay to tə́, ba aw̄n̄ kumdə́ kə̄ ta gógə́ tə́. 41Nin̄-reē ugə̄n̄ dɔ tɔ̄ɔ̄ man̄ kógə̄ḿ kə́ man̄ a nūgə́ dɔ jī jōó tū tə́ tə́ anī to bo əga nang. Adə̄ loo kaw̄ kə̄ kété gətóo ō, loo tél kə̄ gogə́ gətóo ō. Ta bay to mān̄ udə nángāá ba ra gotoó beé, ba kə̄lán tá bəngál man̄ əndan ngá̰ý, adə̄ ró̰ȳ ta naā tə́ sá sángə́láńg kɔ̄kə́.
42Áskar gə̄ gḛyn̄ tɔ̄l̄ dəngáy gə̄ kɔ̄kə́, na sōgə́ deē kógə̄ḿ dandə́ tə́ al man̄ ba teē a̰ȳ. 43Banī ngol áskar gə̄ gḛy kajə Pol, adə̄ mbātə́ gōdə́ tə́. Ni-adə̄ ndūn kadə̄ ngé gə̄ ń gerə̄n̄ kal man̄ ní kə tə́sōn̄ maná kété kə aw̄n̄ ndágá, 44ba ngé gə̄ ń gerə̄n̄ kal aĺ ní kə ɔyn̄ kāgə̄ kə́ laa gə̄, aláa kāgə̄ too gə̄ kə ton̄ dɔ tə́ alnə̄ń man̄ ta kaw̄ ndágá. I beé n nin̄ malang teēnəń ndágá kanjə̄ kadə̄ yá̰á̰ kógə̄ḿ rāādə́ ní.
Currently Selected:
Kəla rāā Ngámbang kəla gə̄ 27: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad