Kəla rāā Ngámbang kəla gə̄ 2
2
Ndíĺ kə́ Táĺ reē ugə̄
1Dan ń ndɔ̄ *Pa̰təkotə ugə̄ anī, nin̄ malang kánə̄n̄ naā loo kə́ kógə̄ḿ beē tə́. 2Anī kōō yá̰á̰ kógə̄ḿ teē dɔ rā̰ tə́ rétə́ gēé tītə̄ kōō néĺ kə́ əla kə tɔ́gɔ́ ngá̰ý beé. Kōō yá̰á̰ ní taā kem kújə́ ń nin̄-ndin̄ kemeé ní malang. 3Anī nin̄-a̰a̰n̄ yá̰á̰ kə́ tītə̄ ta ndo̰ hor gə̄ beé teēn̄ hɔy kə̄ rɔ̄də́ tə́. Yá̰a̰ gə̄ ní kēgə̄n̄ naā ba reē əhɔn̄ loo dɔdə́ gə̄ tə́ kógə̄ḿ kógə̄ḿ. 4*Ndíĺ kə́ Táĺ rosə kemdə́ malang, adə̄ ɔrə̄n̄ ta kə́ tayā tayā gə̄, kə gō ń Ndíĺ kə́ Táĺ adə̄ńdə́ kadə̄ ɔrə̄n̄ ní.
5Tá *Jipə kə́ ɓōĺ Nə́ɓā ngá̰ý gə̄ ndin̄ *Jerusalem noó. Nin̄-ḭḭn̄ i kə gō nápar de gə̄ malang kə́ dɔ nang tə́ n reē ndin̄ ní. 6Dan ń kōō yá̰a̰ ngeé ń noō ɓār̄ ní, nin̄ malang kánə̄n̄ naā ba ran̄ dɔ jīdə́ kógə̄ḿ kóńg. Tɔdɔ̄ nin̄ kógə̄ḿ kógə̄ḿ oōn̄ ta ɓē kojədə́ gə̄ tadə́ tə́. 7Yá̰á̰ ní ɔr kumdə́ ngá̰ý ō, nel̄də́ ngá̰ý ō mbak adə̄ ədan̄ na:
De gə̄ ń ra a ɔrə̄n̄ najə̄ toó nin̄ malang i de kə́ Galile gə̄ aĺ a? 8Ba i ba̰ý á jḭḭ̄ kógə̄ḿ kógə̄ḿ j-oōī ta ɓē yājí gə̄ tadə́ tə́ ní? 9Partə gə̄ ō, Medə gə̄ ō, Elam gə̄ ō, de kə́ Mesopotami#2.9 Mesopotami: Kumən na i ɓē kə́ dɔ dán bā kə́ jōó gə̄ tə́. tə́ gə̄ ō, Jude gə̄ ō, Kapados gə̄ ō, Po̰o̰ gə̄ ō, de kə́ gō nang kə́ Aji tə́ gə̄ ō, 10Pəriji gə̄ ō, Pampili gə̄ ō, de kə́ Ejiptə tə́ gə̄ ō, de kə́ gō nang kə́ Siren kə́ Libi tə́ gə̄ ō, Rom gə̄ ō, 11*Jipə húŕ gə̄ ō, Jipə tél gə̄ ō, Kəretə gə̄ ō, Arabə gə̄ ō nin̄ i danjí tə́. Banī ngámbang kəla gə̄ ədan̄ najə̄ yá̰á̰ kə́ bo bo gə̄ ń Nə́ɓā rāā ní kə ta ɓē yājí gēé adə̄ j-oōī.
12Nin̄ malang ní yá̰á̰ ní ɔr kumdə́ ngá̰ý ō, gerə̄n̄ najə̄ kə́ yā kəda dɔ tə́ aĺ ō, adə̄ dəjen̄ naā na ké kum yá̰á̰ ní na i rí bang wa.
13Banī ngé kə́rēý gə̄ mbóon̄ kə ngámbang kəla gēé ədan̄ na i kasə n na a rāādə́ ní ō ba ké i rí wa.
Najə̄ kɔr̄ Piyer
14Loo ń noō tə́ Piyer ń ra noó kə ngámbang kəla kə́ kutə gidə i kógə̄ḿ gēé ní, un ndūn kə̄ dɔɔ́ ɔrə̄ń najə̄ kə kósə de gēé əda na:
Sḭḭ̄ *Jipə gə̄ ō, de gə̄ malang ń ī-ndiī *Jerusalem ní ō, yá̰á̰ ń rāā yá̰a̰ toó majə kadə̄ ī-gerī kum majə ō, ī-nēlī mbīsí majə ōōīneé najə̄ ń m-ā m-ɔ̄r̄ sesí ní ō. 15De gə̄ ń toō i kasə n rāādə́ tītə̄ ń ī-gírīneé ní alé. Tɔdɔ̄ i mbang kə́ ndōhó kə́ dəloí ɓáý. 16Ba i yá̰á̰ ń Joel *nge koō ta əda najə̄n kété ní n a rāā yá̰a̰ toó, ni-əda kété na:
17Loo ń noō tə́ Nə́ɓā əda na, ta tɔ̄l̄ ta ndɔ̄ gə̄ tə́ anī yá̰á̰ ń a rāā yá̰á̰ ní n toó:
M-ā m̄-rāā kadə̄ Ndílə́ḿ a reē dɔ de gə̄ tə́ malang.
Ngáńsí kə́ dəngam gə̄ kə ngáńsí kə́ dəyá̰ gə̄ a ədan̄ najə̄ kə́ Nə́ɓā əndā tadə́ tə́ ō,
balsáa yāsí gə̄ a télən̄ ngé ka̰a̰ yá̰a̰ gə̄ ō,
nī a rāā ɓə́ga yāsí gə̄ ō.
18Rɔ̄kum, kem ndɔ̄ gə̄ ngeé ń noō tə́ ní
m-ā m̄-rāā kadə̄ Ndíĺə́ḿ a reē dɔ ngé kəla yāḿ kə́ dəngam gə̄ tə́ ō,
kə́ dəyá̰ gə̄ tə́ ō,
adə̄ nin̄ a télən̄ *ngé koō ta gə̄ ō.
19M-ā m̄-rāā yá̰á̰ kə́ yáā gə̄ dɔɔ́ dɔ rā̰ tə́ ō,
yá̰á̰ kə́ to kɔr kum gə̄ dɔ nang tə́ laā ō.
Mósə ō, hor ō, sa hor kə́ tītə̄ kil̄ man̄ gə̄ ō a ton̄.
20Mbang a ndul ō, nāā a kərē tītə̄ mósə ō,
kété pá tá kadə̄ ndɔ̄ yā Kɔ́ɔ̄ɓē ugə̄ ɓáý.
Ndɔ̄ ní i ndɔ̄ kə́ bo ō, i ndɔ̄ kə́ majə kɔsə gɔnən ō.
21Ndɔ̄ ngeé ń noō tə́ ní, náā nəkɔ́ ń a ɓāŕ rī Kɔ́ɔ̄ɓē anī a ajə.
22*Israel gə̄, ōōī najə̄ ń m-ā m-ə́dásí toō: Sḭḭ̄ malang ī-gerī kadə̄ Jeju kə́ *Najaret ní, Nə́ɓā ndigə najə̄ gōn tə́. Tām̄ ni-unən rāań yá̰á̰ kə́ yáā gə̄ ō, yá̰á̰ kə́ to kɔr kum gə̄ ō, yá̰á̰ kə́ yā kɔjəń yá̰a̰ gə̄ ō dɔ dáńsí tə́. 23Əlan̄ Jeju ngeé ń toō jīsí tə́ kə gō ń Nə́ɓā gḛyń ní ō, i kə gō ń ni-núməń ní ō. Sḭḭ̄ ī-tɔ̄l̄niī, tɔdɔ̄ ə́laniī jī ngé rāā yá̰a̰ kə gō ndū Nə́ɓāá aĺ gə̄ tə́ adə̄ əndanən̄ kə mayá̰ tū kāgə̄ kə́ dēsə́ tə́. 24Banī Nə́ɓā ndólə̄n adə̄ ndi kə kumneé, ni-ɔrə̄n kɔ̄ɔ́ ta rɔ̄ tōr̄ gə̄ yā yo tə́, tɔdɔ̄ yo asə ko̰o̰ ɓē dɔn tə́ alé. 25Dabid əda najə̄ yān kété na:
M-á̰á̰ Kɔ́ɔ̄ɓē ta kumḿ tə́ kə dɔ ndɔ̄ gə̄,
tɔdɔ̄ ni i dɔ jī ko̰ḿ tə́ kadə̄ yá̰á̰ yéȳm̄ alé.
26I tām̄ ń toó tə́ n kemḿ nelə̄m̄ ō,
m-ə̄nā pā kə rɔ̄nelēé ō ní. Ká ré m-óyń kɔ̄ɔ́ gə̄gē anī,
m-ə̄ndā kemḿ dɔí tə́
27tɔdɔ̄ ā ə́ya̰m̄ ɓádá aĺ ō, ā ə́ya̰ de kə́ *táĺ yāí kadə̄ ndum aĺ ō.
28Ḭ̄ ɔ́jəm̄ róbə gə̄ kə́ ta kaw̄ kə̄ loo kə́ deē a ndi kə kumneé tū tə́ tə́.
Ā ī-rāā kadə̄ rɔ̄nel̄ rosə kemḿ kə ta kūl̄ ndi kə́ jə-ndi ta kum naā tə́ seí.
29Ngákó̰ó̰ḿ gə̄, adə̄mə̄n̄ ta róbə kadə̄ m-ə́dásí najə̄ yā kaají Dabid wáńg: Dabid oy ō, dubə̄nən̄ ō, ɓōólaā gə̄gē ní dɔ ɓádən to danjí tə́ laā ɓáý. 30Banī ni i *nge koō ta ō, ger̄ kadə̄ Nə́ɓā túbə ənīń míndən adə̄n yā kəndā ngōn̄ kaan kógə̄ḿ dɔ kōr̄ kāgə̄ mbang yān tə́ ō. 31Ni-a̰a̰ yo *Kərist ō, ndólə̄n ō kété kɔ̄ɔ́, adə̄ əda najə̄ yān na
a əya̰nən̄ kɔ̄ɔ́ ɓádá aĺ ō,
na a ndum aĺ ō.
32Jeju ngeé ń toō oy ba Nə́ɓā ndólə̄n, adə̄ jḭḭ̄ malang i de kə́ kum tə́ gə̄. 33Nə́ɓā ɔsən kə̄ dɔɔ́ kə tɔ́gəneé, adə̄ ni-ənge *Ndíĺ kə́ Táĺ ń Bɔbə̄ Ngōn̄ ənī míndən yā kadə̄ ní. I Ndíĺ kə́ Táĺ ngeé ń ni-ənge ní n ni-rāā adə̄ reē á á̰a̰ī ō, ōōī ō toó. 34Dabid aw̄ dɔ rā̰ tə́ aĺ ɓá tā ba əda na:
Kɔ́ɔ̄ɓē Nə́ɓā əda Kɔ́ɔ̄ḿ na kə reē kə ndi dɔ jī ko̰n tə́,
35bátə́ kadə̄ n-əlań madə̄ ba̰ā̰n gə̄ gír njan tə́
tītə̄ kōr̄ kāgə̄ taā gír nja yān beé.
36I beé ní ādə̄ ngán *Israel gə̄ malang gerə̄n̄ najə̄ ń toō majə:
Jeju ń ə́ndaniī kə mayá̰ tū kāgə̄ kə́ dēsə́ tə́ ní, i ni n Nə́ɓā tūrə̄n Kɔ́ɔ̄ɓē tə́ ō, *Kərist tə́ ō ní.
37Dan ń de gə̄ oōn̄ najə̄ ń noō ní, kemdə́ əgadə́ biting biting, adə̄ dəjen̄ Piyer ō gotə ngámbang kəla gə̄ ō najə̄ ədan̄ na:
Ngákó̰ó̰jí gə̄, yá̰á̰ ń kadə̄ jə-rāā ní i rí?
38Piyer ədadə́ na:
Ī-tūrī háĺsí malang, ba ādə̄ rāān̄sí *batém kógə̄ḿ kógə̄ḿ kə rī Jeju *Kərist, kadə̄ Nə́ɓā mā̰yń rɔ̄n dɔ yá̰á̰ kə́ majaĺ gə̄ ń ī-rāāī tə́ ní. Ɓá anī ā ə́ngeī *Ndíĺ kə́ Táĺ ń Nə́ɓā adə̄ de gə̄ karī ní. 39Tɔdɔ̄ Nə́ɓā ənī míndən i tām̄ yāsí tə́ ō, i tām̄ yā ngáńsí gə̄ tə́ ō, de gə̄ ń ndin̄ sa̰y ngá̰ý tə́ ní ō, de kə́ ngá̰ý gə̄ ń Kɔ́ɔ̄ɓē Nə́ɓā yājí a ɓāŕdə́ ní tə́ ō.
40Piyer ɔr̄ najə̄ kə́ rang gə̄ ngá̰ý sedə́ loo de kə́ kum yá̰á̰ tə́ tə́ ɔjəńdə́ yá̰a̰ kadə̄ gerə̄n̄ ō, mēr̄də́ kəhɔ rɔ̄də́ tɔgə ō ədadə́ na:
Ī-ndigiī yá̰á̰ ń i kajə ní ādə̄ ajən̄sí, loo ń noō tə́ ā ī-teēī kɔ̄ɔ́ dan gír de kə́ tadə́ tḭ̄ḭ̄ kɔ̄ɔ́ gə̄ ń toō tə́!
41Ngé gə̄ ń ndigən̄ najə̄ kɔr̄ Piyer ní rāān̄də́ *batém. Adə̄ ndɔ̄ ngeé ń noó tə́ ní de gə̄ kə́ asən̄ dūbú mətá ń noō ərōn̄ ngámbang kəla gə̄.
Yá̰a̰ rāā ngé taā kem gə̄
42Nin̄-əhɔn̄ gō yá̰á̰ ndóō yā ngámbang kəla gə̄ ō, ɔsən̄ dɔdə́ naā tə́ kə́ loo ngákó̰o̰ naā gə̄ tə́ ō, tetən̄ mápá ō, ɔrə̄n̄ najə̄ kə Nə́ɓāá ō kanjə̄ kəya̰ ta. 43Ngámbang kəla gə̄ rāān̄ yá̰á̰ kə́ yáā gə̄ ō, yá̰á̰ kə́ to kɔr kum gə̄ ō ngá̰ý, adə̄ de gə̄ malang ndin̄ i kə ɓōló kemdə́ tə́. 44Ngé taā kem gə̄ malang ɔsən̄ dɔdə́ naā tə́ ō, yá̰a̰ malang ń nin̄-əngen̄ ní kēgə̄n̄ naā dɔ dáńdə́ tə́ ō. 45Nin̄-igən̄ loo yādə́ gə̄ ō, yá̰a̰ kənge yādə́ gə̄ ō, ba nar ń əngen̄ gírí ní kēgə̄n̄ naā dɔ dáńdə́ tə́ malang. 46Nin̄-kánə̄n̄ naā ngándáńg kə dɔ ndɔ̄ gə̄ kem *kújə yā Kɔ́ɔ̄ɓē tə́ ō, tetən̄ mápa əsan̄ kə ta kújə gə̄ ō, əsan̄ yá̰a̰ yādə́ kə rɔ̄nelēé ō, kə kem kə́ kógə̄ḿ beē ō. 47Nin̄-tɔ̄ȳn̄ Nə́ɓā ō, nel̄ de gə̄ malang sedə́ ō. Ngé gə̄ ń ajən̄ ní Kɔ́ɔ̄ɓē reē sedə́ kə̄ dɔ ngé kán̄ naā gə̄ tə́ kə dɔ ndɔ̄ gə̄.
Currently Selected:
Kəla rāā Ngámbang kəla gə̄ 2: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad