Makətūbə̄ kə́ ta kəga dɔ ń Ja̰a̰ ndang ní 1
1
Najə̄ kə́ dɔ ndi kə kumuú tə́
1Yá̰á̰ ń to kété pá tá kadə̄ Nə́ɓā əla gír rāā yá̰a̰ gə̄ ō, yá̰á̰ ń j-oō ō, j-a̰ā̰ kə kumjí ō, j-a̰a̰ majən ō, jījí ɔdə rɔ̄n ō ní, i najə̄ ń i nge rāā deē kadə̄ ndi kə kumneé ní. 2Ba ndi kə kumuú ní ɔjə rɔ̄n kə̄ ndágá adə̄ j-a̰ā̰ kə kumjí ō, j-əda najə̄ kə́ dɔ tə́ ō, ndi kə kumuú kə́ ngándáńg ń kété ndi i rɔ̄ Bɔbə̄n tə́, ba teē hɔy kə̄ rɔ̄jí tə́ ní, j-ədasí najə̄ kə́ dɔ tə́. 3Yá̰á̰ ń j-a̰a̰ ō, j-oō ō ní, j-ədasí sḭḭ̄ najə̄n ō, yā kadə̄ ī-rāāī kem kógə̄ḿ sejí dɔ tə́. Ba jə-rāāī kem kógə̄ḿ ní i kə bɔbɔ̄ɔ́ ō, kə ngōnən Jeju *Kərist ō. 4Jə-ndang najə̄ kə́ dɔ yá̰á̰ ní tə́ j-adə̄sí i yā kadə̄ rɔ̄nel̄ yājí i rɔ̄nel̄ kə́ majə ɔtə̄ kə taá.
Nə́ɓā i loo kə́ unjə̄ kow
5Ba najə̄ ń j-oō tan tə́ ō, j-ədasí kadə̄ sḭḭ̄ ī-gerī ō ní n toó: Nə́ɓā i loo kə́ unjə̄ kow, ba loo kə́ risə til gətóo kemən tə́. 6Ré j-ədaī na jə-rāāī kem kógə̄ḿ seneé, ba jə-njə̄rāī kum til tə́ anī, jə-sorī i mbée, adə̄ jə-rāāī yá̰á̰ kə́ rɔ̄kum alé. 7Banī ré jə-njə̄rāī i kum loo kə́ unjə̄ kow tə́ tītə̄ ń nəkɔ́ i kum loo kə́ unjə̄ kow tə́ ní anī, jə-rāāī i kem kasə naā mbo̰ō̰jí tə́ kógə̄ḿ kógə̄ḿ ō, mósə Ngōnən Jeju a tə́go majaĺ yājí gə̄ malang ō.
8Ré j-ədaī na majaĺ yājí na gətóo anī, jə-gólī i rɔ̄jí jḭḭ̄ kɔ́ gə̄, adə̄ najə̄ kə́ rɔ̄kum gətóo kemjí tə́. 9Ré j-ɔrī gír majaĺ yājí anī, Nə́ɓā a mā̰ȳ rɔ̄n dɔ tə́ ō, a tə́go yá̰á̰ kə́ gō tə́ aĺ gə̄ malang kɔ̄ɔ́ rɔ̄jí tə́ ō. Tɔdɔ̄ ni i de kə́ nge ra dɔ ndūn tə́ ō, de kə́ súmūú ō. 10Ré j-ədaī na jə-rāāī majaĺ aĺ anī, j-ɔsiī i Nə́ɓā sor̄, adə̄ najə̄ yān gətóo kemjí tə́.
Currently Selected:
Makətūbə̄ kə́ ta kəga dɔ ń Ja̰a̰ ndang ní 1: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad