SOPONI 1
1
1Dan ń Josias kə́ ngōn̄ Amon i mban̄g kə́ Juda ní, Kɔ́ɔ̄ɓē ɔr̄ najə̄ kə Soponi kə́ ngōn̄ Kusi. Kusi i ngōn̄ Gedalia kə́ ngōn̄ Amaria. Amaria i ngōn̄ Ejekias.
Nə́ɓā a rāā yá̰á̰ kə́ tōr̄ kə yá̰a̰ malang kə́ dɔ nang tə́
2Kɔ́ɔ̄ɓē əda wáńg na:
M-ā m-ɔ̄r̄ yá̰a̰ malang
kɔ̄ɔ́ dɔ nang tə́.
3M-ā m̄-rāā kadə̄ deē ndul gə̄ gətóon̄ ō,
dā̰ gə̄ gətóon̄ ō, yel̄ kə́ dɔɔ́ gə̄ gətóon̄ ō,
kānjə̄ gə̄ kə́ kum bā bo tə́ gətóon̄ ō.
M-ā m̄-rāā kadə̄ de kə́ majaĺ gə̄ gətóon̄ ō,
yá̰á̰ ń rāādə́ adə̄ a rāān̄ yá̰a̰ majaĺ ní gətóo ō.
M-ā m̄-rāā kadə̄ deē ndul gə̄ a gətóon̄ kɔ̄ɔ́ dɔ nang tə́.
4M-ā m̄-rāā yá̰á̰ kógə̄ḿ
kə dɔ nang kə́ Juda ō,
kə de gə̄ malang
kə́ kem ɓē kə́ Jerusalem tə́ ō.
Gotə jī bēl̄ loo rāā ɓesə̄ Baal ń a na̰y ní ō,
yá̰á̰ ń a rāā kadə̄ əga kem de gə̄ dɔ
ngé tun̄ yá̰a̰ gə̄ yā nə́ɓā ń noō tə́ ní gə̄gē,
m-ā m̄-rāā kadə̄
a gətóon̄ kɔ̄ɔ́ loo ń toō tə́.
5Ngé kal̄ dɔ kújə́ dúŕ dur gə̄ tə́
yā ndɔ̄yń tə́yō̰ gə̄ ní,
m-ā m̄-rāādə́ kadə̄
nin̄ a gətóon̄ kɔ̄ɔ́.
Ngé gə̄ ń a rɔȳmə̄n̄ ō,
a túbən̄ kə nə́ɓā Milkom ō ní,
m-ā m̄-rāādə́ kadə̄
nin̄ a gətóon̄ kɔ̄ɔ́.
6Ngé tūr̄ gidədə́ taḿ tə́ gə̄ ō,
ngé sāāḿ aĺ gə̄ ō,
ngé koō najə̄ kə́
taḿ tə́ aĺ gə̄ ō ní,
mā Kɔ́ɔ̄ɓē, mā m̄-rāādə́
kadə̄ nin̄ a gətóon̄ kɔ̄ɔ́.
7Ī-ndiī tasí mbóo
kə̄ no Kɔ́ɔ̄ɓē Nə́ɓā tə́,
tɔdɔ̄ dɔ i ngɔr.
A̰á̰ā̰, Kɔ́ɔ̄ɓē əndā
dɔ yá̰á̰ tun̄ kógə̄ḿ danaá kɔ̄ɔ́.
De gə̄ ń ni-ɓāŕdə́
ta kəsa yá̰á̰ ní,
ni tə́gódə́ adə̄ unjə̄n̄
njáý njáý kɔ̄ɔ́ ɓá.
8Kɔ́ɔ̄ɓē əda na:
Ndɔ̄ tun̄ yá̰á̰ tə́ anī,
m-ā m̄-rāā yá̰á̰ kógə̄ḿ
kə de kə́ bo gə̄ ō, kə ngār gə̄ ō,
kə de gə̄ malang ń
a o̰ō̰n̄ kūbə̄ tītə̄ tə̄rā gə̄ ní ō.
9Ndɔ̄ ń noō tə́ ní,
m-ā m̄-rāā yá̰á̰ kógə̄ḿ kə de gə̄ malang ń
a gə̄lān̄ dɔ kāgə̄#1.9 Gə̄lān̄ dɔ kāgə̄: I yá̰á̰ kə́ nápar de kə́ rang gə̄ rāān̄ tām̄ nin̄ gírə̄n̄ kadə̄ ɓesə̄ gə̄ i tū kāgə̄ kə́ ta kújə́ tə́ ní. kə́ ta kújə́ tə́ ní.
De gə̄ malang ń rāān̄ adə̄ kem kújə
yā kɔ́ɔ̄də́ gə̄ rosə kə yá̰a̰ kənge gə̄ kə́
nin̄ əngen̄ i kə ta kūl̄ yá̰a̰ rāā kə́ kə dɔ́nɔ́ ō,
kə ta kūl̄ soró ō ní, m-ā m̄-rāā yá̰á̰
kógə̄ḿ sedə́ ō.
10Kɔ́ɔ̄ɓē əda wáńg na:
Ndɔ̄ ń noō tə́ ní,
deē a oō kōō kɔŕ kə́ ngá̰ý
kem ɓē kə́ Jerusalem tə́,
ta róbə yā kānjə̄ gə̄ tə́ ō,
kōō sōḿ kem ɓē kə́ kijə tə́ ō,
deē a oō kōō yá̰á̰ kə́ ɓār̄ ngá̰ý
dɔ ngán mbal̄ gə̄ tə́ ō.
11Sḭḭ̄ de kə́ Wóló gə̄,
ī-sōmíī, tɔdɔ̄ ngé gātə̄ gə̄ malang a oyn̄,
a tɔ̄lə̄n̄ ngé mbɔ̄jə́ kɔȳ
gində̄ arjā̰a̰ gə̄ malang kɔ̄ɔ́.
12Kum mbang ngeé ń
noō tə́ ní, m-ā m-ə̄ndā hor
tū lámbá kógə̄ḿ tə́,
yā ndəleń ɓē kə́ Jerusalem.
De kə́ kem ɓēé gə̄ ń
ndin̄ kanjə̄ rāā yá̰á̰ kógə̄ḿ,
tītə̄ kasə nduú kə́ ɗīgə̄
adə̄ manə̄n a ɔr̄ koō dɔ bisə̄n tə́ ní,
m-ā m̄-rāā yá̰á̰ kógə̄ḿ sedə́.
Nin̄ ədan̄ na:
Kɔ́ɔ̄ɓē na asə rāā yá̰á̰ kógə̄ḿ alé.
Ni na asə rāā yá̰á̰ kə́ majə aĺ ō,
kə́ majaĺ aĺ ō.
13I beé ɓá ní, a ɔyn̄ yá̰a̰
kənge yādə́ gə̄ dɔ gúú tə́ ō,
a nujən̄ kújə yādə́ gə̄ kɔ̄ɔ́ ō.
Nin̄ rāān̄ kújə gə̄,
banī a ndin̄ kemeé alé.
Nin̄ əhɔn̄ kāgə̄ nduú gə̄,
banī a a̰ȳn̄ kasən alé.
Ndɔ̄ yā Kɔ́ɔ̄ɓē
14Dɔ ndɔ̄ kə́ bo yā Kɔ́ɔ̄ɓē i ngɔr.
Dɔ̄ to ngɔr.
Ndɔ̄ ní a reē i láẃ ngá̰ý.
Ndɔ̄ ngeé ń noō tə́ ní,
deē a oō kɔŕ
kə́ to ɓōĺ ngá̰ý gə̄.
De gə̄ kə́ wur kil yādə́
tɔȳ yā madə̄də́ gə̄ gə̄gē
a ɓārə́n̄ yá̰a̰ kadə̄ dḭḭ̄n̄də́.
15Ndɔ̄ ngeé ń noō
i ndɔ̄ yā wōn̄g ō, wur kɔl ō,
i ndɔ̄ yā ɓōĺ ō, loo kə́ nujə ō,
i ndɔ̄ yā yo ō, loo kə́ ndɔ̄ɔ́ ō,
i ndɔ̄ yā loo kə́ risə til ō, yā kil̄ man̄ gə̄ ō,
i ndɔ̄ yā kə́ tuútu ō.
16Ndɔ̄ ngeé ń noō tə́ ní,
deē a oō kōō áskar gə̄
loo kɔ̄ŕ bərúnjə́ tə́ ō,
loo túr̄ kɔĺ rɔ̄ɔ̄ tə́ ō,
dɔ ɓē gə̄ kə́ ndogə̄ mbal̄ gə̄
gīrə̄n̄ gidədə́ gə̄ tə́ ō,
dɔ kújə́ ngɔ̄m̄ ɓē yādə́ gə̄
kə́ ngāl̄ ɓururu
kum kə̄ dɔɔ́ gə̄ tə́ ō.
17Kɔ́ɔ̄ɓē əda na:
De gə̄ mānə̄n̄ dɔ ndūḿ.
Ní, m-ā m-ə́la tadə́ kum wur kɔl tə́,
adə̄ nin̄ a hə́yān̄ loo njə̄rā tə́
tītə̄ ngé kum tɔ̄ɔ̄ gə̄ beé.
A ɓōkə́n̄ mósə́də́ tītə̄ loo ɓōkə́ bumbə́ru beé ō,
nīńdə́ a ndum tītə̄ loo kə́ yḛr beé ō.
18Gində̄ arjā̰a̰ yādə́ ō,
lɔ́r yādə́ ō, a asə kajədə́
ndɔ̄ ń Kɔ́ɔ̄ɓē
a rāań wōn̄g tə́ ní alé.
Hor wōn̄g yān kə́ ngá̰ý
a nujə dɔ nang malang.
A̰á̰ā̰, i yá̰á̰ kə́ to ɓōĺ ngá̰ý.
Kɔ́ɔ̄ɓē a nujə de gə̄
malang kə́ dɔ nang tə́ kɔ̄ɔ́.
Currently Selected:
SOPONI 1: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.