PĀ GƏ̄ 98
98
Ī-túrī kɔĺ rɔ̄nel̄ ō, ə́laī ndīĺ ō, dɔ Kɔ́ɔ̄ɓē ń a reē tə́ ní
1Pā.
Ə̄nīī pā kə́ kijə ī-rɔyīneé Kɔ́ɔ̄ɓē,
tɔdɔ̄ ni-rāā yá̰á̰ kə́ to kɔr kum gə̄.
Jī ko̰o̰n ō, jīn kə́ táĺ ngá̰ý ō, rāān̄ adə̄ ni-tetə rɔ̄ɔ̄.
2Kɔ́ɔ̄ɓē rāā adə̄ de gə̄ gerə̄n̄ kadə̄ i ni n i nge kajə gír deē yān gə̄ ní.
Ni ɔjə háĺ kə́ gōtə́ yān kə̄ ndágá ta kum nápar de gə̄ tə́.
3Əga kemən dɔ kem majə yān kə́ rāā kə ngán Israel gēé tə́ ō, dɔ ra kə́ ni-ra dɔ ndūn tə́ sedə́ ō.
De gə̄ ń ndin̄ ta kaw̄ kə̄ ta ngóy dɔ nang tə́ nú ní a̰a̰n̄ Nə́ɓā yājí loo tetə rɔ̄ɔ̄ tə́.
4Sḭḭ̄ de kə́ dɔ nang tə́ gə̄ malang, úriī kɔĺ rɔ̄nel̄ dɔ Kɔ́ɔ̄ɓē tə́.
Ādī pā rɔ̄nel̄ yāsí ō,
yá̰a̰ gōsə̄ yāsí gə̄ ō ɓārə̄n̄ ngá̰ý.
5Úgiī kənde tām̄ yā Kɔ́ɔ̄ɓē tə́, úgiī kənde kə gō ndū yá̰a̰ gōsə̄ gēé.
6Ī-kɔ̄ríī bərúnjə gə̄ ō, ī-kɔ̄ríī tōw̄ ō,
úriī kɔĺ ō, dɔ mban̄g tə́, dɔ Kɔ́ɔ̄ɓē tə́.
7Ādə̄ kōō bā bo kə yá̰a̰ malang kə́ tū tə́ ɓār̄ bu bu ō,
ādə̄ kōō dɔ nang kə de kə́ dɔ nang tə́ gə̄ ɓār̄ ō.
8Ādə̄ bā gə̄ əndan̄ jīdə́,
ādə̄ mbal̄ bo gə̄ əndān̄ rɔ̄də́ naā tə́ sedə́ ba urən̄ kɔĺ rɔ̄nel̄
9kété no Kɔ́ɔ̄ɓē tə́, tɔdɔ̄ ni a reē i mbée.
A reē i kə̄ ko̰o̰ ɓēé dɔ dɔ nang tə́.
Ni a o̰o̰ ɓē dɔ de kə́ dɔ nang tə́ gə̄ tə́ i kə gōó ō,
dɔ gír de gə̄ tə́ i kə hálən kə́ súmūú ō.
Currently Selected:
PĀ GƏ̄ 98: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.