PĀ GƏ̄ 97
97
Kɔ́ɔ̄ɓē i mban̄g, rɔ̄ de kə́ dɔ nang tə́ gə̄ malang nel̄də́
1Kɔ́ɔ̄ɓē i mban̄g.
Ādə̄ dɔ nang tḭ́ḭ̄ bal walya,
ādə̄ de gə̄ malang ń ndin̄ ta kaw̄ nú ní rāān̄ rɔ̄nel̄!
2Loo kə́ ndul ndí ndḭ́ ō kil̄ man̄ ō gīrə̄n̄ gidən,
yá̰a̰ rāā kə́ gōtə́ ō kə́ súmūú ō i bir̄ nja kōr̄ kāgə̄ mbang yān gə̄.
3Hor kógə̄ḿ njə̄rā non tə́,
o̰o̰ madə̄ ba̰ā̰n gə̄ kə gō gidəneé.
4Tel̄ man̄ yān gə̄ rāān̄ adə̄ loo kə́ dɔ nang tə́ malang unjə̄ kow.
Dɔ nang a̰a̰ anī ndebə.
5Mbal̄ bo gə̄ yḛḛ̄n̄ kɔ̄ɔ́ no Kɔ́ɔ̄ɓē tə́ tītə̄ tībə̄ tejə beé,
yḛḛ̄n̄ kɔ̄ɔ́ no kɔ́ɔ̄ dɔ nang malang tə́.
6Dɔ rā̰ ənī mbēr̄ dɔ háĺ kə́ gōtə́ yān tə́ ō,
gír de gə̄ malang a̰a̰n̄ kɔsə gɔn yān ō.
7Ngé rāā ɓesə̄ gə̄ malang ń
i ngé kɔjə rɔ̄də́ kə yá̰á̰ kə́ kumən gətóo gə̄ ní, rɔ̄də́ sɔl̄də́.
Sḭḭ̄ nə́ɓā kə́ rang gə̄ malang, ɔ́siī nosí nang tə́ no Kɔ́ɔ̄ɓē tə́!
8 Siyo̰ oō najə̄n anī rāā rɔ̄nel̄.
Kɔ́ɔ̄ɓē, ɓē kə́ Juda tə́ gə̄ tḭ́ḭ̄n̄ bal walya
najə̄ sarya gāngīí tə́.
9Tām̄ i ḭ̄ Kɔ́ɔ̄ɓē ń i Nə́ɓā kə́ dɔɔ́ sa̰y ngá̰ý dɔ dɔ nang tə́ malang ní.
Ḭ̄ ī-ndi dɔɔ́ dɔ nə́ɓā kə́ rang gə̄ tə́ malang.
10Sḭḭ̄ ngé táŕ Kɔ́ɔ̄ɓē gə̄, ī-kídī yá̰a̰ kə́ majaĺ.
Ni ngɔ̄m̄ gō deē yān gə̄,
ni-taādə́ jī ngé kem ndul gə̄ tə́ əya̰də́ dɔɔ́.
11Loo kə́ unjə̄ kow teē tām̄ yā de kə́ sew tə́,
tá de gə̄ ń kemdə́ i súmūú ní rɔ̄də́ nel̄də́ ō.
12Sḭḭ̄ de kə́ sew gə̄, ī-rāāī rɔ̄nel̄ najə̄ yā Kɔ́ɔ̄ɓē tə́,
ī-ɓōkíin̄ tɔ̄ȳ ə́daī na ni i de kə́ táĺ.
Currently Selected:
PĀ GƏ̄ 97: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.