PĀ GƏ̄ 96
96
Pā kə́ kijə kə́ yā rɔȳń Kɔ́ɔ̄ɓē
(Á̰a̰ī 1 Yá̰a̰ 16.23-33)
1Ə̄nīī pā kə́ kijə ī-rɔyīneé Kɔ́ɔ̄ɓē.
De gə̄ malang kə́ dɔ nang tə́, ə̄nīī pā ī-rɔyīneé Kɔ́ɔ̄ɓē.
2Ə̄nīī pā ī-rɔyīneé Kɔ́ɔ̄ɓē,
ī-tɔ̄yī rīn.
Ə̄nīī mbēr̄ dɔ kajə yān tə́ kə dɔ ndɔ̄ gə̄.
3Ə̄nīī mbēr̄ kɔsə gɔn yān dan nápar de gə̄ tə́,
ə̄nīī mbēr̄ yá̰á̰ kə́ yáā gə̄ ń ni-rāā ní dan nápar de gə̄ tə́ malang.
4Tām̄ Kɔ́ɔ̄ɓē i de kə́ bo ō, majə kadə̄ de gə̄ ɓōkə́nən̄ tɔ̄ȳ ō.
Ni to ɓōĺ ngá̰ý ō, tɔȳ nə́ɓā gə̄ malang ń i ɓesə̄ gə̄ ní ō.
5Nə́ɓā gə̄ malang yā gír de gə̄ i yá̰á̰ kə́ kanjə̄ kumən,
banī Kɔ́ɔ̄ɓē rāā dɔ rā̰.
6Loo kə́ ndə́lē pipir ō unjə̄ kow ō i kété non tə́,
tɔ́gə ō yá̰á̰ kə́ ɔjə kadə̄ ni i de kə́ bo ō i kem loo yān kə́ táĺ tə́.
7Gír de gə̄ kə́ kə gō ɓē gə̄ malang, ī-reē ī-rɔyī Kɔ́ɔ̄ɓē,
ə́daī najə̄ kɔsə gɔn yān ō, tɔ́gə yān ō
8Ī-reē ɔ́siī gɔn rīn,
ī-reēī kə yá̰a̰ ndējə̄ yāsí gēé údiīneé ndágə loo kə́ gīr̄ gidə kújə yān tə́.
9Dan ń Kɔ́ɔ̄ɓē ɔjə kadə̄ ni i de kə́ táĺ ta kumsí tə́ adə̄ á̰a̰niī anī,
ɔ́siī nosí nang tə́ non tə́.
De gə̄ malang kə́ dɔ nang tə́, ī-ndebiī ta kumən tə́.
10Ə́daī nápar de gə̄ malang na Kɔ́ɔ̄ɓē i mban̄g,
adə̄ dɔ nang a ndi ngan̄g, yá̰a̰ a yéȳn alé.
Ni-gān̄g sarya yā gír de gə̄ i kə gōó.
11Ādə̄ dɔ rā̰ rāā rɔ̄nel̄,
ādə̄ dɔ nang tḭ́ḭ̄ bal walya.
Ādə̄ kōō bā bo kə yá̰a̰ malang kə́ tū tə́ ɓār̄ bu bu!
12Ādə̄ loo kə́ bembeé kə yá̰á̰ kə́ kemeé gə̄ malang rāān̄ rɔ̄nel̄!
Ādə̄ kāgə̄ gə̄ malang kə́ kem ku gə̄ tə́ túrə̄n̄ kɔĺ rɔ̄nel̄
13ta kum Kɔ́ɔ̄ɓē tə́ tā, tɔdɔ̄ ni a reē i mbée,
a reē i kə̄ ko̰o̰ ɓē tə́ dɔ nang tə́.
Ni a o̰o̰ ɓē dɔ de kə́ dɔ nang tə́ gə̄ tə́ i kə gōó ō,
dɔ gír de gə̄ tə́ i kə hálən kə́ súmūú ō.
Currently Selected:
PĀ GƏ̄ 96: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.