PĀ GƏ̄ 81
81
Nə́ngētə́ gēé gír deē yāḿ gə̄ oōn̄ i najə̄ taḿ tə́ anī
1Pā kə́ kem makətūbə̄ yā ngār yā gōsə̄ pā gə̄ tə́ ō, i pā yā Asap ō. A dānə̄n̄ gō i kə kənde kə́ Gat.
2Úriī kɔĺ rɔ̄nel̄ kə̄ dɔ Nə́ɓā tə́, ni ń i tɔ́gə́jí ní.
Ə́laī ndīĺ dɔ Nə́ɓā yā Jakob tə́.
3Əndaī yá̰a̰ gō pā tə́, ə́ndaī kɔdə ādī ɓār̄,
úgiī kənde kə́ kəlān i ngá̰ý kə́ ɓār̄ majə ō,
úgiī kənde kə́ kəlān i ngá̰ý aĺ ō.
4Ī-kɔlíī tōw̄ ndɔ̄ teē nāā tə́ ō,
ndɔ̄ ń nāā a gōrəń gong ō, a ndaań ō ní tə́, yā rāań nāā yājí.
5Nge ń noō i ndū najə̄ kə́ tām̄ yā ngán Israel gə̄ tə́,
i ndū ń Nə́ɓā yā Jakob un ní,
6i yá̰á̰ kə́ əndā dɔ Jəjep tə́ kadə̄ rāā
dan ń ni teē aw̄ ənī ɓē kə́ Ejiptə rɔ̄ɔ̄ ní
m-ōō ta ɓē kógə̄ḿ kə́ m-ōō kété aĺ ɓáý.
7M-ún yá̰a̰ kətō kə́ dɔ bɔ̄gə̄n tə́ kɔ̄ɔ́ ō,
usə̄ yá̰a̰ kətō kə́ ɔȳ əndā nang tə́ kə jīneé ō.
8Dan ń rāān̄ kumií ndoō tə́ á ə́ga kɔŕ ní m̄-gān̄g dɔí.
Man̄ ndang ngá̰ý, ba m̄-ndigiī kum tə́ loo mundə̄ tə́.
m̄-nāāī kadə man̄ kə́ Meriba tə́.
9Gír deē yāḿ gə̄, ī-nēlī mbīsí ba ōōī
yá̰á̰ kə́ kadə̄ m̄-tāāsí dɔ tə́ to laā,
Israel gə̄, nə́ngētə́ gēé ōōī i najə̄ taḿ tə́ anī,
10Nə́ɓā kə́ mbā a gətóo ɓēé loosí!
Ā ɔ́sə noí nang tə́ no nə́ɓā kə́ rang tə́ alé.
11I mā n i Kɔ́ɔ̄ɓē Nə́ɓā yāí ń m̄-teē seí kɔ̄ɔ́ kem ɓē kə́ Ejiptə tə́ ní.
Ī-teē taí ngá̰ý na m-ā m̄-ɓōkə́ yá̰a̰ kemeé kadə̄ rosə.
12Banī gír deē yāḿ gə̄ oōn̄ ndūḿ alé,
Israel ndigə najə̄ yāḿ alé.
13Loo ń noō tə́ m-ə́yá̰də́ kə kem ngan̄g yādə́,
kadə̄ rāān̄ yá̰á̰ ń kemdə́ gḛy ní tā!
14Nə́ngētə́ gēé gír deē yāḿ gə̄ oōn̄ najə̄ taḿ tə́ anī,
nə́ngētə́ Israel gə̄ unən̄ gō róbə yāḿ anī,
15m-ā m-ə́la rɔ̄sɔl̄ dɔ madə̄ ba̰ā̰də́ gə̄ tə́ ō,
m-ā m̄-tūr̄ jīḿ yā rɔ̄ɔń kə ngé rāā kumdə́ ndoō tə́ gēé ō láẃ ngá̰ý.
16Loo ń noō tə́ madə̄ ba̰ā̰ Kɔ́ɔ̄ɓē gə̄ a sāān̄ i kadə̄ nel̄ Kɔ́ɔ̄ɓē sedə́ ō.
Israel gə̄ a ndin̄ majə ngándáńg ō.
17Kəsa ń m-ā m-ūləńdə́ ní i kōō gémē kə́ majə tɔ̄ȳ madə̄ gə̄ ō,
m-ā m-ādə̄də́ yibə̄ tejə kə́ bembeé kadə̄ o̰o̰n̄ ndānə̄n̄ ō.
Currently Selected:
PĀ GƏ̄ 81: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.