PĀ GƏ̄ 71
71
m̄-tɔgə ɓə́ga kɔ̄ɔ́ ɓá tā ba, ī-lōō kəya̰m̄
1Kɔ́ɔ̄ɓē, m̄-rāāī i loo ɓɔ̄ɔ̄ rɔ̄ yāḿ tə́.
Ādə̄ m-ə́nge rɔ̄sɔl̄ gogə́ to̰ aĺ bátə́!
2Ā ī-gān̄g dɔḿ, ā ī-taām̄ jī de gə̄ tə́, sɔɔ̄ń hál kə́ gōtə́ yāí.
Ī-nēl̄ mbīí kə̄ kōōḿ tə́, ájəm̄.
3Ādə̄ ḭ̄ i mbal̄ ń m-ā m̄-déw gidə tə́ kadə̄ yá̰a̰ ɔdə rɔ̄ḿ aĺ ní,
mbal̄ ń m-ásə kaw̄ tū tə́ kə kum mbang gə̄ malang ní.
Ḭ̄ ī-gḛy kajəm̄.
A̰á̰ā̰, ḭ̄ i mbal̄ yāḿ, ɓē kə́ ngan̄g ngá̰ý yāḿ.
4Nə́ɓā yāḿ, ī-taām̄ jī nge kem ndul tə́,
ī-taām̄ jī ngé rāā yá̰a̰ gōtə́ aĺ ngá̰ý gə̄ tə́, jī ngé dɔ́nɔ gə̄ tə́.
5Kɔ́ɔ̄ɓē Nə́ɓā, m-ə̄ndā kemḿ i dɔí ḭ̄ tə́.
M-ə́lá gír kənī kemḿ kadī i kə ngōn̄ dūúḿ.
6M-ə́lá gír ndə̄nā rɔ̄ḿ rɔ̄í tə́ i dan ń m̄-teēń kem kó̰ó̰ḿ tə́ ní.
I ḭ̄ n ɔ̄rə̄m̄ kem kó̰ó̰ḿ tə́ ī-teē seḿ ndágá ní, i ḭ̄ n m-ā m̄-ɓōkíī tɔ̄ȳ kanjə̄ kɔr ta tə́ ní.
7De gə̄ ngá̰ý rāāmə̄n̄ i de kə́ ḭ̄ ī-ndɔ̄lə́n kɔ̄ɔ́ tə́,
banī nge ngɔ̄mə̄ḿ kə́ rɔ̄kum i ḭ̄.
8Taḿ ɓōkíī tɔ̄ȳ ō, m-ɔ́sə gɔnií ō,
kə dɔ ndɔ̄ gə̄.
9Dan ń m̄-tɔgə ɓə́ga kɔ̄ɔ́ toō ī-lōō mbātə́m̄,
ī-lōō kəya̰m̄ kɔ̄ɔ́ dan ń tɔ́gə́ḿ gətóó ní.
10Tɔdɔ̄ madə̄ ba̰ā̰ḿ gə̄ ɔrə̄n̄ najə̄ yāḿ,
ngé kumə̄ḿ gə̄ oōn̄ naā dɔḿ tə́.
11Nin̄ ədan̄ na: Nə́ɓā əya̰n kɔ̄ɔ́,
ādə̄ njasí ra gōn tə́, ə́hɔniī.
De kə́ yā taān jīsí tə́ gətóo!
12Nə́ɓā, ī-lōō ra sa̰y rɔ̄ḿ tə́, Nə́ɓā yāḿ, ī-reē láẃ ī-dḭḭ̄m̄!
13Ngé gə̄ ń sāān̄ tɔ̄lə̄m̄ ní,
ādə̄ rɔ̄də́ sɔl̄də́ ō, yá̰á̰ kə́ majaĺ teē dɔdə́ tə́ ō!
ngé gə̄ ń sāān̄ kadə̄ yá̰á̰ kə́ majaĺ teē dɔḿ tə́ ní,
ādə̄ kídə̄n̄də́ ō əlan̄ rɔ̄sɔl̄ dɔdə́ tə́ ō!
14Mā m-ə̄ndā kemḿ dɔí tə́ ngándáńg ō,
m-ā m̄-na̰y kə̄ loo kənī pā tə́ yā ɓōkíīneé tɔ̄ȳ ō.
15Kə ndɔ̄í bátə́ kadə̄ loo tíbəń ní,
m-ɔ̄r̄ i najə̄ háĺ kə́ gōtə́ yāí ō,
m-ɔ́jə i loo kajə ń ájə deē ní ō,
tām̄ kem majə ń ī-rāā ní deē asə tə́da kutən təgā alé.
16Kɔ́ɔ̄ɓē Nə́ɓā, m-ā m-údə ɓēé looí
i kə ta kūl̄ dḭḭ̄ ń ī-dḭḭ̄m̄ ní ō,
i háĺ kə́ gōtə́ yāí ngóy n m-ā m-ɔ̄r̄ najə̄n ní ō.
17Nə́ɓā, ə́lá gír kɔjəm̄ yá̰a̰ i kə ngōn̄ dūúḿ ō,
m-ə̄nī mbēr̄ dɔ yá̰a̰ rāāí kə́ majə ngá̰ý gə̄ tə́ bátə́ ɓōólaā ō.
18Ngɔlaā ń dɔḿ ndaa toō ní, Nə́ɓā, ī-lōō kəya̰m̄ kɔ̄ɔ́.
Loo ń noō tə́ m-ā m-ásə kɔjə balsáa gə̄ ō,
ngé gə̄ ń a utə̄n̄ gōdə́ ní ō, kəla rāāí gə̄ ō tɔ́gí ō.
19Nə́ɓā, háĺ kə́ gōtə́ yāí ngāl̄ ngá̰ý kə̄ dɔɔ́ ō,
ī-rāā yá̰á̰ kə́ bo ngá̰ý gə̄ ō!
Nə́ɓā, de kə́ to tītīí gətóo.
20Ḭ̄ ī-rāā ādə̄ wur kɔl əsō dɔḿ tə́ ō,
yá̰á̰ kə́ to kum kaȳ aĺ gə̄ teēn̄ dɔḿ tə́ ō.
Banī ā ī-reē yā rāām̄ kadə̄ m-ā m̄-ndi kə kumḿ gogə́.
Ā ī-reē yā teē seḿ kɔ̄ɔ́ ɓádá, kem bəlo kə́ lú ngá̰ý tə́.
21Ā ī-tél yā sɔl̄ kemḿ ō,
ā ī-rāā kadə̄ a tél rɔȳmə̄n̄ ō.
22Loo ń noō tə́ m-ā m̄-ɓōkíī tɔ̄ȳ kə kəndeé.
Nə́ɓā yāḿ, m-ā m-ə̄nī pā seí najə̄ ra kə̄ ī-ra dɔ ndūí tə́.
M-ā m-úgə kənde yā kɔsəń gɔnií,
ḭ̄ Nə́ɓā kə́ táĺ yā Israel.
23M-ā m-úgə kənde yā kɔsəń gɔnií,
taḿ a ənī pā kə rɔ̄nelēé,
tɔdɔ̄ ī-gān̄g dɔḿ.
24M-ā m-ɔ́sə gɔn háĺ kə́ gōtə́ yāí kə dɔ ndɔ̄ gə̄,
tɔdɔ̄ ngé gə̄ ń sāān̄ kadə̄ yá̰á̰ kə́ to kum kaȳ aĺ teē dɔḿ tə́ ní,
rɔ̄də́ sɔl̄də́ ō, əlan̄ rɔ̄sɔl̄ dɔdə́ tə́ ō.
Currently Selected:
PĀ GƏ̄ 71: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.