PĀ GƏ̄ 66
66
Ādə̄ de gə̄ tɔ̄ȳn̄ Nə́ɓā
1Pā kə́ kem makətūbə̄ yā ngār yā gōsə̄ pā gə̄ tə́. Pā.
De kə́ dɔ nang tə́ gə̄ malang,
ī-ɓōkíī Nə́ɓā tɔ̄ȳ!
2Ī-tɔ̄yī rīn kə pā gēé, ɔ́siī gɔnən kə tɔ̄yɔ̄ɔ́,
3ə́daī Nə́ɓā na kəla rāān gə̄ na ton̄ ɓōĺ ngá̰ý ō,
dan ń madə̄ ba̰ā̰n gə̄ na a̰a̰n̄ tɔ́gən kə́ ngá̰ý al̄ naā
anī, na lōn̄ gír kɔsə rɔ̄də́ kə̄ dɔɔ́ tə́ ō,
4na de kə́ dɔ nang tə́ gə̄ malang na ɔsən̄ nodə́ nang tə́ non tə́ ō,
na ənīn̄ pā ɔsən̄neé gɔnən ō tɔ̄ȳn̄neé rīn ō.
5Ī-reē á̰a̰ī kəla rāā Nə́ɓā!
Kəla rāān gə̄ əla ɓōĺ kem de gə̄ tə́.
6Ni-rāā bā bo adə̄ tél loo kə́ aȳ sáẃ sáẃ,
rāā adə̄ de gə̄ gāngə̄n̄ bā kanjə̄ kadə̄ man̄ ɔdə njadə́.
Ādə̄ jə-rāāī rɔ̄nel̄ yá̰á̰ kə́ bo ngá̰ý ń noō.
7Ni-o̰o̰ ɓē kə tɔ́gəneé ngándáńg ō,
əndā kumən gō gíŕ nápar de gə̄ tə́ ō.
Ādə̄ ngé mbātə́ najə̄ gə̄ ɔsən̄ rɔ̄də́ kə̄ dɔɔ́ alé!
8Gír de gə̄ ī-tɔ̄yī Nə́ɓā yājí.
Úniī ndūsí kə̄ dɔɔ́ ī-ɓōkíin̄neé tɔ̄ȳ.
9Nge ń rāā adə̄ jə-ndiī kə kumjí ní
əya̰jí adə̄ j-əsōī kɔ̄ɔ́ alé.
10Nə́ɓā, ḭ̄ ī-nāājí adə̄ ī-ger̄jí,
ī-nāājí kum hor tə́ tītə̄ loo nō gində̄ arjā̰a̰ beé.
11Ḭ̄ ə́lájí kum gūmbə̄ tə́, ə̄ndā yá̰a̰ kətō kə́ kɔȳ dɔjí tə́.
12Ḭ̄ ādə̄də́ ta róbə adə̄ rāān̄jí dā̰ kətō yá̰á̰ tə́,
j-udə kum hor tə́ ō kum man̄ tə́ ō,
banī ḭ̄ ī-teē sejí kɔ̄ɔ́ kum tə́,
yā kəndājí ta yá̰a̰ kəsa kə́ ngá̰ý tə́.
13M-údə́ kújə yāí tə́ kə yá̰a̰ tun̄ gə̄ kə́ yā róō horoó kə taá malang,
yā rāā yá̰a̰ gə̄ ń m-ə̄nī ndūḿ yā rāā kadī ní,
14yá̰a̰ gə̄ ń m-ə́da rī rāā taḿ tə́
dan ń wur kɔl əsōń dɔḿ tə́ ní.
15m̄-ndējī dā̰ kə́ əndān̄ mbɔ́ĺdə́ gə̄ ō, bal batə̄ gə̄ ō,
m̄-tɔ̄l̄ man̄g kə́ bəra ō, bal bə̄yā̰ gə̄ ō, ba m̄-rāā dā̰də́
yā kadə̄ róōn̄ horoó,
adə̄ sēēdə́ aw̄ bátə́ ugə̄ rɔ̄í tə́.
16Sḭḭ̄ ngé ɓōĺ ndíĺ Nə́ɓā gə̄ malang ī-reēī ōōī,
m-ā m-ə̄nīsí gotə yá̰á̰ ń ní rāā tām̄ yāḿ tə́ ní.
17m̄-nōō kə̄ dɔn tə́ kə taḿ ō,
ta ndo̰ḿ ɓōkə́n tɔ̄ȳ ō.
18Loo kə́ beé tə́ ré m̄-gír̄ i yá̰á̰ kə́ majaĺ kemḿ tə́ anī,
Kɔ́ɔ̄ɓē a oō najə̄ yāḿ alé.
19Banī Nə́ɓā oō najə̄ yāḿ. Ni nēl̄ mbīn oōń ndɔ̄ȳ yāḿ.
20m̄-ɓōkə́ Nə́ɓā tɔ̄ȳ!
Ni-mbātə́ ndɔ̄ȳ yāḿ aĺ ō,
mbātə́ rāā kem majə seḿ aĺ ō.
Currently Selected:
PĀ GƏ̄ 66: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.