PĀ GƏ̄ 53
53
Nə́ɓā nin̄ kə deē yān gēé dan de kə́ nujə kɔ̄ɔ́ gə̄ tə́
(Á̰a̰ī Pā 14)
1Pā kə́ kem makətūbə̄ yā ngār yā gōsə̄ pā gə̄ tə́. Deē ā ə̄nīn i kə ndūí kə́ ɔjə kadə̄ rɔ̄í nelī alé. I pā yā Dabid kə́ yā ndóoń deē yá̰a̰.
2Mbóo gə̄ gírə̄n̄ kemdə́ tə́ na Nə́ɓā na gətóo.
Nin̄ i de kə́ nujə kɔ̄ɔ́ gə̄ ō, yá̰a̰ rāādə́ to yḛr kum ō,
deē kógə̄ḿ kə́ dandə́ tə́ kə́ rāā yá̰a̰ kə gōó gətóo ō.
3Nə́ɓā ndi dɔ rā̰ tə́ ba əga kumən kə̄ nang tə́ əndāń ma̰ȳ de gə̄,
yā ka̰a̰ ké nge kə́rēý kumən edə̄ sḛ́ý, adə̄ a sāā Nə́ɓā wa.
4Nin̄ malang ndúmə̄n̄ kɔ̄ɔ́, nin̄ malang nujən̄ kɔ̄ɔ́.
De kógə̄ḿ sḛ́ý dandə́ tə́ kə́ rāā yá̰a̰ kə gōó gətóo,
kal kógə̄ḿ lélék gə̄gē gətóo.
5Nə́ɓā əda na ngé rāā majaĺ gə̄ ń noō
gerə̄n̄ yá̰a̰ aĺ i mbée a?
Nin̄ əsan̄ deē yāḿ gə̄, rāān̄də́ i yá̰a̰ kəsa yá̰a̰ yādə́ tə́
ba ndɔ̄ȳmə̄n̄ alé!
6Loo ń yá̰á̰ kə́ to ɓōĺ gətóo tū tə́ anī,
nin̄ a ɓōlə́n̄ i mbéé kə́ ndewn̄ yakə yakə.
Tɔdɔ̄ ngé kənīī rɔ̄ɔ̄ gə̄ ní,
Nə́ɓā tə́nī kə̄ngādə́ kógə̄ḿ kógə̄ḿ kə̄ loo gə̄ tə́.
Ī-mbóo sedə́ tɔdɔ̄ Nə́ɓā tə̄ɓādə́ kɔ̄ɔ́.
7I náā n ndi Siyo̰ yā tetə rɔ̄ɔ̄ kadə̄ Israel ní?
Dan ń Nə́ɓā a tél kə deē yān gə̄ ń aw̄n̄ sedə́ ɓəlo tə́ ní
kə̄ gogə́ ɓēé anī,
Jakob a rāā walya, rɔ̄ Israel a nelə̄n.
Currently Selected:
PĀ GƏ̄ 53: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.