PĀ GƏ̄ 39
39
Ādə̄ m̄-taā koō na deē a ndi ta kaw̄ sa̰y alé
1Pā kə́ kem makətūbə̄ yā ngār yā gōsə̄ pā gə̄ tə́, adə̄ i yā Yedutun. I pā yā Dabid.
2M-ə́da na: M-ā m-ə́hɔ rɔ̄ḿ tɔgə kadə̄
m-ɔ̄r̄ najə̄ kə́ majaĺ alé.
Ré m̄-ndi loo kə nge kem nduluú anī, m-ā m-ə́hɔ taḿ dɔ najə̄ tə́.
3Adə̄ m̄-ndi sélélé, m̄-ndi taḿ mbóo.
Banī rɔ̄ḿ tɔ̄rə̄m̄ kə́ al̄ naā.
4Wurəḿ nēgə́m̄ biting biting.
Gír̄ najə̄ tɔȳ dɔḿ ō kemḿ o̰o̰ hor ō.
Anī m̄-tḛḛ̄ taḿ m-ɔ̄r̄ najə̄ m-ə́da na:
5Kɔ́ɔ̄ɓē, ɔ́jəm̄ ndɔ̄ ń gír yāḿ a gāngəń ní ādə̄ m̄-ger̄.
M-ā m̄-rāā i ndɔ̄ kóndóńg?
Ādə̄ m̄-ger̄ kadə̄ mā i de kə́ ndɔ̄ḿ i ngá̰ý alé!
6Ḭ̄ ī-rāā ādə̄ ndɔ̄ḿ malang asə naā i kə laa da jī deé.
Ɓālə̄ḿ gə̄ malang i yá̰a̰ alé ta kumií tə́.
A̰á̰ā̰, de kə́ ngan̄g sim gə̄gē ni i koō ngóy ta kumií tə́!
7Rɔ̄kum, deē aw̄ ō tél ō banī ni i ndíĺ yá̰a̰ karī!
A̰á̰ā̰ aw̄ kə̄ yóō aw̄ kə̄ laā, banī ni i koō ngóy!
Ni kán̄ yá̰a̰ kə̄ dɔ naā tə́ banī ger̄ deē ń a ɔy ní alé.
8Ɓáa ń noō ní Kɔ́ɔ̄ɓē, kə̄ m̄-ngóō i rí kə́ rang?
I ḭ̄ ngóy n m-ə̄ndā kemḿ dɔí tə́ ní.
9Ī-gān̄g dɔḿ tū majaĺ yāḿ gə̄ tə́ malang.
Ī-lōō kəya̰m̄ kadə̄ mbóo gə̄ əgōmə̄n̄.
10M-ūtə̄ taḿ kɔ̄ɔ́, m-ā m-ə́da najə̄ to̰ alé,
tɔdɔ̄ i ḭ̄ n ī-rāā yá̰á̰ ní.
11Ādə̄ asiī kəndam̄, na ndéy jīí a tɔ̄lə̄m̄.
12Ḭ̄ ɔ́jə deē yá̰a̰ kə ndéy jīí tām̄ yá̰a̰ rāān kə́ gōtə́ aĺ tə́.
Yá̰á̰ ń kemən gḛy ngá̰ý ní ī-nujəń kɔ̄ɔ́ tītə̄ yā kur̄ beé.
Rɔ̄kum deē ndul i nél karī.
13Kɔ́ɔ̄ɓē, ōō ndɔ̄ȳ yāḿ ō nōō yāḿ ō.
Ī-nēl̄ mbīí ōoń nōō yāḿ.
Tɔdɔ̄ mā i de kə́ nge nam̄ ɓēé looí,
mā i mbā tītə̄ yā kaaḿ gə̄ malang.
14Ún kumií kɔ̄ɔ́ taḿ tə́,
ādə̄ m̄-mūŕ kəgō tá m-āw̄ ō, m̄-gətóo kɔ̄ɔ́ ō.
Currently Selected:
PĀ GƏ̄ 39: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.