PĀ GƏ̄ 30
30
Kɔ́ɔ̄ɓē ajəm̄
1Pā rāā nāā kújə yā Kɔ́ɔ̄ɓē. I pā yā Dabid.
2Kɔ́ɔ̄ɓē, m-ɔ́sə gɔnií,
tɔdɔ̄ ɔ̄rə̄m̄ bəlo kə́ lú ngá̰ý tə́ kɔ̄ɔ́.
Ḭ̄ ə́ya̰ madə̄ ba̰ā̰ḿ gə̄ adə̄ əgōn̄ naā dɔḿ tə́ alé.
3Kɔ́ɔ̄ɓē Nə́ɓā yāḿ, m̄-nōō kə̄ dɔí tə́,
anī ḭ̄ ī-rāā adə̄ rɔ̄ḿ ngan̄g.
4Kɔ́ɔ̄ɓē, ḭ̄ ī-teē seḿ ɓádá kɔ̄ɔ́.
Mā i de kə́ gír yāḿ gān̄g kɔ̄ɔ́,
banī rāā adə̄ m̄-ndi kə kumḿ gogə́.
5Sḭḭ̄ deē yā Kɔ́ɔ̄ɓē gə̄ ə̄nīī pā ādīin̄,
ī-ɓōkíin̄neé tɔ̄ȳ ə́daī na, ni i de kə́ táĺ.
6Kɔ́ɔ̄ɓē a rāā wōn̄g kə deé i kum mbang kógə̄ḿ beē ngóy,
banī a rāā kem majə seneé i kə dɔ ndɔ̄ gə̄ malang ń kɔ́ɔ̄
ndiń kə kumneé ní.
Loo tíbí anī nōō ɓār̄ dan i ngá̰ý,
ba dəloí i kɔŕ rɔ̄nel̄.
7Ba mā tā a dan ń m̄-ndi majə ní m-ə́da na:
Yá̰a̰ a yéȳm̄ yek alé.
8Kɔ́ɔ̄ɓē, m̄-ndi loo kə́ ngan̄g tə́ i kə ta kūl̄ kem majə yāí.
Banī ḭ̄ ī-tūr̄ gidií kɔ̄ɔ́ taḿ tə́,
adə̄ ɓōĺ rāām̄.
9Kɔ́ɔ̄ɓē, m̄-nōō kə̄ dɔí tə́,
m̄-rāā Kɔ́ɔ̄ɓē ɓɔ́.
10Mósə́ḿ a teē i rí tām̄ yāí tə́?
Ā ə́nge i rí gotə yoḿ mā tə́?
Deē ń tél bumbə́ru kɔ̄ɔ́ ní a ɓōkíī tɔ̄ȳ ɓáý a?
A ənī gotə ra kə́ ī-ra dɔ ndūí tə́ i ba̰ý?
11Kɔ́ɔ̄ɓē, ōō ndūḿ, á̰a̰ kum tō ndoō yāḿ!
Kɔ́ɔ̄ɓē, ī-rāā seḿ!
12Ḭ̄ ī-rāā ādə̄ kəhɔ ndoō yāḿ tél ndām̄ rɔ̄nel̄.
Ḭ̄ ɔ̄r̄ kūbə̄ ndoō rɔ̄ḿ tə́ kɔ̄ɔ́ ba ə́la kūbə̄ rāā nāā gətóo.
13Adə̄ m-ɔ́sə gɔnií kə pāá kanjə̄ kɔr ta tə́.
Kɔ́ɔ̄ɓē Nə́ɓā yāḿ, m-ā m̄-ndadī ngándáńg!
Currently Selected:
PĀ GƏ̄ 30: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.