PĀ GƏ̄ 29
29
Ndū Kɔ́ɔ̄ɓē
1Pā yā Dabid.
Sḭḭ̄ de kə́ bo kə́ dɔ rā̰ tə́ gə̄, ī-rɔyī Kɔ́ɔ̄ɓē.
Ɔ́siī gɔnən ō, ɔ́jiī tɔ́gən ō.
2Ɔ́siī gɔn Kɔ́ɔ̄ɓē ō, ī-tɔ̄yī rīn ō.
Ɔ́siī nosí nang tə́ non tə́ ndágə loo kə́ táĺ yān tə́.
3Ndū Kɔ́ɔ̄ɓē ɓār̄ dɔ man̄ tə́.
Nə́ɓā kə́ nge kɔsə gɔn rāā adə̄ man̄ ndang.
Kɔ́ɔ̄ɓē o̰o̰ ɓē dɔ man̄ kə́ bo gə̄ tə́.
4Ndū Kɔ́ɔ̄ɓē ɓār̄ kə tɔ́gɔ́.
Ndūn ɓār̄ ngo̰ ngo̰, ndū de kə́ bo.
5Ndū Kɔ́ɔ̄ɓē tétə̄ kāgə̄ sédər gə̄.
Kɔ́ɔ̄ɓē tétə̄ kāgə̄ sédər kə́ Liban tə́ gə̄.
6Ni-rāā adə̄ mbal̄ kə́ Liban tə́ gə̄ tḭ́ḭ̄n̄ bal tītə̄ duĺ man̄g gə̄ ō,
adə̄ mbal̄ Hermon tḭ́ḭ̄ bal tītə̄ balsáa dɔgə ō.
7Ndū Kɔ́ɔ̄ɓē rāā adə̄ ndo̰ hor gán̄g bəlim bəlim.
8Ndūn rāā adə̄ dəla loo ndebə.
Kɔ́ɔ̄ɓē rāā adə̄ dəla loo kə́ Kades ndebə.
9Ndū Kɔ́ɔ̄ɓē rāā adə̄ dul gə̄ ojən̄ dɔ gúú tə́ ō,
rāā adə̄ ngán bə̄yā̰ kɔ̄r̄ gə̄ teēn̄ kem kó̰də́ gə̄ tə́ ō.
Yá̰a̰ gə̄ malang kə́ kem kújə yā Kɔ́ɔ̄ɓē tə́ ədan̄ na:
Kɔsə gɔn i yā Nə́ɓā!
10Kɔ́ɔ̄ɓē ndi dɔ man̄ kə́ taā loo tə́,
ni-ndi mban̄g ngándáńg.
11Kɔ́ɔ̄ɓē a adə̄ gír deē yān gə̄ tɔ́gə.
Ni a rāā sedə́ kadə̄ ndin̄ kə lápə́yaá.
Currently Selected:
PĀ GƏ̄ 29: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.