PĀ GƏ̄ 118
118
Deē ndi kə kumneé i kə rī kənī gotə yá̰a̰ rāā Kɔ́ɔ̄ɓēé
1Ɔ́siī gɔn Kɔ́ɔ̄ɓē tɔdɔ̄ ni i de kə́ majə ō,
kem majə yān a to ngándáńg ō.
2Ādə̄ Israel gə̄ tél ədan̄ ɓáý to̰:
Kem majə yān a to ngándáńg!
3Ādə̄ de kə́ gír kojə yā Aaro̰ tə́ gə̄ tél ədan̄ ɓáý to̰:
Kem majə yān a to ngándáńg!
4Ādə̄ ngé ɓōĺ ndíĺ Kɔ́ɔ̄ɓē gə̄ tél ədan̄ ɓáý to̰:
Kem majə yān a to ngándáńg!
5Dan ń yá̰a̰ tɔȳ dɔḿ ní m̄-ɓāŕ Kɔ́ɔ̄ɓē,
anī ni ndigəm̄, ni-taā əya̰m̄ dɔɔ́.
6Kɔ́ɔ̄ɓē i dām̄ yāḿ tə́, adə̄ m̄-ɓōĺ yá̰á̰ kógə̄ḿ alé,
de gə̄ a rāān̄ i rí seḿ?
7Kɔ́ɔ̄ɓē i dām̄ yāḿ tə́, ni dḭḭ̄m̄,
adə̄ m̄-kídə̄ madə̄ ba̰ā̰ḿ gə̄.
8Kadə̄ deē ɓɔ̄ɔ̄ rɔ̄n rɔ̄ Kɔ́ɔ̄ɓē tə́ i só tə́
tɔȳ kadə̄ deē əndā kemən dɔ de gə̄ tə́!
9Kadə̄ deē ɓɔ̄ɔ̄ rɔ̄n rɔ̄ Kɔ́ɔ̄ɓē tə́ i só tə́
tɔȳ kadə̄ deē əndā kemən dɔ ngār gə̄ tə́!
10Nápar de gə̄ malang gīrə̄n̄ gidəḿ əlan̄ ta naā tə́,
ba mā m̄-tā̰də́ rɔ̄ɔ̄ m-ə̄ndādə́ sa̰y kə ta kūl̄ Kɔ́ɔ̄ɓēé.
11Nin̄ gīr̄mə̄n̄, gīrə̄n̄ gidəḿ,
ba mā m̄-tā̰də́ rɔ̄ɔ̄ m-ə̄ndādə́ sa̰y kə ta kūl̄ Kɔ́ɔ̄ɓēé.
12Nin̄ gīrə̄n̄ gidəḿ tītə̄ tejə gə̄ beé,
banī nin̄ oyn̄ láẃ ngá̰ý tītə̄ hor mu beé. Mā m̄ tā̰də́ rɔ̄ɔ̄ m-ə̄ndādə́ sa̰y kə ta kūl̄ Kɔ́ɔ̄ɓēé.
13Ḭ̄ ī-mbərem̄ kadə̄ m-ə̄sō,
banī Kɔ́ɔ̄ɓē rāā seḿ.
14Tɔ́gə́ḿ kə́ ngá̰ý i Kɔ́ɔ̄ɓē,
m̄-tetə rɔ̄ɔ̄ i kə ta kūl̄neé.
15Kɔĺ rɔ̄nel̄ ō kɔĺ tetə rɔ̄ɔ̄ ō
taā loo kem kújə tandā yā de kə́ súmūú gə̄ tə́.
Jī Kɔ́ɔ̄ɓē kə́ ko̰ó̰ rāā yá̰á̰ kə́ to kɔsə gɔn.
16Kɔ́ɔ̄ɓē əla jī ko̰n kə̄ dɔɔ́!
Jī Kɔ́ɔ̄ɓē kə́ ko̰ó̰ rāā yá̰á̰ kə́ to kɔsə gɔn!
17Adə̄ m-ā m-óy alé, m-ā m̄-ndi kə kumḿ,
yā kənī gotə yá̰á̰ ń Kɔ́ɔ̄ɓē rāā ní.
18Kɔ́ɔ̄ɓē əndam̄ najə̄ yá̰á̰ kə́ gōtə́ aĺ kə́ m̄-rāā tə́ rɔ̄kum,
banī ni əya̰m̄ adə̄ m-óy alé.
19Ī-teēī ta róbə yā de kə́ gōtə́ ādə̄mī,
m-ā m-údə kemeé yā tɔ̄ȳ Kɔ́ɔ̄ɓē.
20I ta róbə yā Kɔ́ɔ̄ɓē,
ādə̄ de kə́ súmūú gə̄ udən̄ kemeé!
21Kɔ́ɔ̄ɓē, m-ā m̄-ɓōkíī tɔ̄ȳ tām̄ ī-ndigə ɓār̄ yāḿ,
m̄-tetə rɔ̄ɔ̄ i kə ta kūlīí.
22Mbal̄ ń ngé kəndā kújə gə̄ mbátə́n̄ kɔ̄ɔ́ ní,
tél mbal̄ kə́ kíĺ kújə́ tə́.
23Nge ń noō i kəla rāā Kɔ́ɔ̄ɓē:
Tām̄ yājí tə́ ɓáa i yá̰á̰ kə́ to kɔr kum!
24Ndɔ̄ ń Kɔ́ɔ̄ɓē rāā ní n toó:
I ndɔ̄ ndi majə yājí ō, ndɔ̄ rɔ̄nel̄ yājí ō!
25Kɔ́ɔ̄ɓē, ájə́jí!
Kɔ́ɔ̄ɓē, ī-rāā ādə̄ jə-tetə rɔ̄ɔ̄!
26Ādə̄ Nə́ɓā rāā majə kə deē ń a udə laā kə rī Kɔ́ɔ̄ɓēé ní!
Jə-ndi kem kújə yā Kɔ́ɔ̄ɓē tə́, jə-tɔ́rəń tají dɔsí tə́.
27Kɔ́ɔ̄ɓē i Nə́ɓā ō, ni-adə̄jí loo kə́ unjə̄ kow ō.
Əhɔī ta jī kāgə̄ gə̄ jīsí tə́ ba ī-raī kə gō naá
bátə́ kíl loo tun̄ yá̰á̰ tə́.
28Kɔ́ɔ̄ɓē, ḭ̄ i Nə́ɓā yāḿ, m̄-ndigə ɓōkíī tɔ̄ȳ,
m̄-ndigə kəda kə kɔrɔ́ na ḭ̄ i de kə́ bo.
29Ɔ́siī gɔn Kɔ́ɔ̄ɓē, tɔdɔ̄ ni i de kə́ majə ō,
kem majə yān a to ngándáńg ō.
Currently Selected:
PĀ GƏ̄ 118: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.