PĀ GƏ̄ 108
108
m̄-gḛy ndól̄ ta gír loo dɔ ɓīī tə́
(K. 2-6: Á̰a̰ī Pā 57.8-12; K. 7-14: Á̰a̰ī Pā 60.7-14)
1Pā. I pā yā Dabid.
2m̄-sōl̄ alé, Nə́ɓā yāḿ, m̄-sōl̄ alé,
m-ā m-ə̄nī pā yā kɔsəń gɔnií.
3Kənde kə́ kəlān i ngá̰ý ō, kə́ kəlān i ngá̰ý aĺ ō,
ī-ndólī dɔ ɓīī tə́,
m-ā m̄-ndól̄ ta gír loo dɔ ɓīī tə́.
4Kɔ́ɔ̄ɓē, m-ā m̄-rāāī kə́ra dan gír de gə̄ tə́,
m-ā m-ə̄nī pā yā kadī dan nápar de gə̄ tə́.
5Tɔdɔ̄ kem majə yāí bo tɔȳ dɔ rā̰ ō,
najə̄ yāí kə́ rɔ̄kum aw̄ bátə́ ugə̄ rɔ̄ kil̄ man̄ gə̄ tə́ ō.
6Nə́ɓā, ḭ́ḭ ī-ra dɔ rɔ̄í tə́ dɔɔ́ dɔ rā̰ tə́!
Ādə̄ kɔsə gɔn yāí taā loo dɔ nang tə́ malang!
7Yā kadə̄ kó tár yāí gə̄ télən̄neé de gə̄ kə́ gāngə̄n̄ dɔdə́ kɔ̄ɔ́ ní,
ájə́jí kə jī ko̰í ō, ī-ndigə ɓār̄ yāḿ ō.
8Nə́ɓā ɔr̄ najə̄ kem kújə́ kə́ táĺ yān tə́ əda na:
I mā n m̄-tetə rɔ̄ɔ̄ ní!
M-ā m̄-kēgə̄ ɓē kə́ Sisem naā tə́,
m-ā m̄-gán̄g wól loo kə́ Sukot naā tə́ gír loo ngá̰ý.
9Galaad i yāḿ ō Manase i yāḿ ō.
Epəraim i jākā gində̄ kə́ dɔḿ tə́ ō, Juda i kāgə̄ ko̰o̰ ɓē yāḿ ō.
10Moab i səmbē ndogə̄ man̄ yāḿ.
m̄-ɓōkə́ sākə̄rā yāḿ dɔ Edom tə́ tɔdɔ̄ ni i yá̰a̰ yāḿ.
M-úr kɔĺ rɔ̄ɔ̄ dɔ dɔ nang yā Pilistin gə̄ tə́.
11I náā n a aw̄ seḿ kem ɓē kə́ ngan̄g tə́ ní?
I náā n a aw̄ seḿ bátə́ yā kugə̄ seḿ dɔ nang kə́ Edom tə́ ní?
12I ḭ̄ Nə́ɓā ń ī-mbātə́jí kɔ̄ɔ́ ní ngóy aĺ a?
I ḭ̄ Nə́ɓā ń ī-teē kə ngé rɔ̄ɔ̄ yājí gēé to̰ aĺ ní ngóy aĺ a?
13Ī-rāā sejí ādə̄ jə-rɔ̄ɔń madə̄ ba̰ā̰jí,
tɔdɔ̄ kadə̄ deē ndul dḭḭ̄ deē madə̄n i gól̄ loo karī.
14Ré Nə́ɓā i sejí anī, j-a jə-tetə rɔ̄ɔ̄.
Tɔdɔ̄ i ni n a tə́ɓā ngé rɔ̄ɔ̄jí gə̄ kə njaneé ní.
Currently Selected:
PĀ GƏ̄ 108: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.