PĀ GƏ̄ 107
107
Makətūbə̄ Pā gə̄ kə́ nge ko̰ mí
(Pā 107—150)
Ɓōkə́n̄ Nə́ɓā kə́ nge gān̄g dɔ deē tɔ̄ȳ
1Ɔ́siī gɔn Kɔ́ɔ̄ɓē tām̄ ni i nge kem ndaa,
tɔdɔ̄ ni-rāā kem majə ngándáńg.
2Majə kadə̄ ngé gə̄ ń Kɔ́ɔ̄ɓē rɔ̄ɔ̄ dɔdə́ tə́ ō,
ngé gə̄ ń ni-taādə́ jī madə̄ kɔ̄l̄də́ gə̄ tə́ ō,
3ni ɔydə́ kə dɔ ɓē gə̄ malang ō,
ḭḭ sedə́ gír ɓē tə́ ō no ɓē tə́ ō,
dām̄ mbɔ́r ɓē kə́ ko̰ó̰ tə́ ō, bā bo tə́ ō, ba kán̄də́ naā tə́ ní,
ədan̄ najə̄ ń toō kə̄ nja naā tə́.
4Ngé kə́rēý gə̄ ndɔmə̄n̄ kem loo gə̄ kə́ deē gətóo tū tə́ tə́,
dɔ róbə́ kə́ mángá tə́, kanjə̄ kənge ɓē kə́ deē ndi tū tə́.
5Ɓō rāādə́ ō, kəndā man̄ rāādə́ ō, tɔ́gə́də́ gətóo ō.
6Nin̄ nōōn̄ kə̄ dɔ Kɔ́ɔ̄ɓē tə́ dan ń wur kɔl əsōń dɔdə́ ní tə́,
anī ni-ɔr̄də́ kɔ̄ɔ́ kem sōl̄ yādə́ gə̄ tə́.
7Ni-rāā adə̄ unən̄ róbə́ kə́ aw̄ súmūú dɔ
ɓē kə́ de gə̄ ndin̄ kemeé tə́.
8Ādə̄ nin̄ ɔsən̄ gɔn Kɔ́ɔ̄ɓē tām̄ kem majə yān tə́ ō,
najə̄ yá̰á̰ kə́ yáā gə̄ ń ni-rāā tām̄ yā deē ndul gə̄ tə́ ní ō.
9Tɔdɔ̄ ngé gə̄ ń míndə́də́ tutə kákə́rá kákə́rá ní,
ni-adə̄də́ man̄ adə̄ a̰ȳn̄.
Ngé gə̄ ń ɓō asədə́ nák ní, ni-adə̄də́ yá̰a̰ kəsa adə̄ əsa ndānə̄n̄ ō.
10Ngé kə́rēý gə̄ ndin̄ i kum til tə́ kem jī yo tə́,
nin̄ i dan kum ko̰o̰ tə́ ō, tṵ́ṵ̄n̄də́ i kə kəlā gindīí ō.
11Tɔdɔ̄ nin̄ mbātə́n̄ rāā yá̰á̰ ń Nə́ɓā ɔsə kə de gēé ta rāā ní,
kídə̄n̄ yá̰á̰ ń Nə́ɓā kə́ dɔɔ́ sa̰y ngá̰ý sāā rāā ní.
12Ni-tetə dɔdə́ i kə yá̰á̰ kə́ tōr̄ kə́ adə̄ rāādə́.
Tɔ́gə́də́ gətóo ō, de kə́ yā rāā sedə́ gətóo ō.
13Nin̄ nōōn̄ kə̄ dɔ Kɔ́ɔ̄ɓē tə́ dan ń yá̰a̰ tɔyń dɔdə́ ní,
anī ni-ɔr̄də́ kɔ̄ɔ́ kem sōl̄ yādə́ gə̄ tə́.
14Ni teē sedə́ kɔ̄ɔ́ kum til tə́ ō, taādə́ jī yo tə́ ō,
gán̄g kəlā gə̄ ń tṵ́ṵ̄n̄neédə́ ní kɔ̄ɔ́ ō.
15Ādə̄ nin̄ ɔsən̄ gɔn Kɔ́ɔ̄ɓē tām̄ kem majə yān tə́ ō,
najə̄ yá̰á̰ kə́ yáā gə̄ ń ni-rāā tām̄ yā deē ndul gə̄ tə́ ní ō.
16Tɔdɔ̄ ni tétə̄ ta róbə gə̄ kə́ rāān̄ kə gində̄ nə̄ngá kasaá gə̄ ō,
tétə̄ gində̄ gə̄ ń rákə̄n̄neé ta róbə gə̄ ní kɔ̄ɔ́ ō.
17Háĺ ngé kə́rēý gə̄ əla mbóo dɔdə́ tə́,
yá̰a̰ rāādə́ kə́ majaĺ rāā kumdə́ ndoō tə́.
18adə̄ yá̰a̰ kəsa tél i yá̰á̰ kə́ to yḛr ta kumdə́ tə́ ō, njadə́ i kə̄ ta bāá tə́ ō.
19Nin̄ nōōn̄ kə̄ dɔ Kɔ́ɔ̄ɓē tə́ dan ń wur kɔl əsōń dɔdə́ ní tə́,
anī ni-ɔr̄də́ kɔ̄ɔ́ kem sōl̄ yādə́ gə̄ tə́.
20Ni-ɔr̄ najə̄ adə̄ rɔ̄də́ ngan̄g ō,
taādə́ jī yo tə́ ō.
21Ādə̄ nin̄ ɔsən̄ gɔn Kɔ́ɔ̄ɓē tām̄ kem majə yān tə́ ō,
najə̄ yá̰á̰ kə́ yáā gə̄ ń ni-rāā tām̄ yā deē ndul gə̄ tə́ ní ō.
22Ādə̄ ndējə̄n̄ Nə́ɓā yá̰a̰ tun̄ gə̄ kə́ yā ɓōkə́nneé tɔ̄ȳ ō,
ənīn̄ gotə kəla rāān gə̄ kə kɔŕ rɔ̄nelēé ō.
23Ngé kə́rēý gə̄ aw̄n̄ dɔ bā bo tə́ kə to bo gēé,
a rāān̄ kəla yādə́ i dɔ man̄ kə́ bo ngá̰ý gə̄ tə́.
24A̰a̰n̄ kəla rāā Kɔ́ɔ̄ɓē ō,
a̰a̰n̄ yá̰á̰ kə́ yáā gə̄ ń ni-rāā dɔ bā bo tə́ ní ō.
25Kɔ́ɔ̄ɓē əda najə̄ tan kógə̄ḿ anī nél balway əla,
néĺ ní rāā adə̄ bəngál man̄ ḭḭ kə̄ dɔɔ́ kə̄ dɔɔ́.
26Un to aw̄ń kə̄ dɔɔ́ ō,
téləń kə̄ nang tə́ ō.
Wur de gə̄ rāādə́ tītə̄ kə́ yā tɔ̄l̄də́ beē.
27Nodə́ ḭḭ̄də́ ō bḭ́ḭ̄n̄ ō, tītə̄ ngé kasə rāā gə̄ beé.
Kum kedə̄ yādə́ gə̄ malang teēdə́ yá̰á̰ tə́ alé.
28Nin̄ nōōn̄ kə̄ dɔ Kɔ́ɔ̄ɓē tə́ dan ń wur kɔl əsōń dɔdə́ ní tə́,
anī ni-ɔr̄də́ kɔ̄ɔ́ kem sōl̄ yādə́ gə̄ tə́.
29Kɔ́ɔ̄ɓē rāā adə̄ nél balway ń əla ní dəba ō,
bəngál man̄ gə̄ tél ton̄ jəke ō.
30Nin̄ rāān̄ rɔ̄nel̄ tām̄ loo ń tél to jəke ní ō,
Nə́ɓā ɔrdə́ ta róbə aw̄ sedə́ kum kā̰ ń gḛyn̄ kaw̄ tū tə́ ní tə́ ō.
31Ādə̄ ɔsən̄ gɔn Kɔ́ɔ̄ɓē tām̄ kem majə yān tə́ ō,
najə̄ yá̰á̰ kə́ yáā gə̄ ń ni-rāā tām̄ yā deē ndul gə̄ tə́ ní ō.
32Ādə̄ ɔsən̄ gɔnən dan deē yān gə̄ ń kánə̄n̄ naā tə́ ní ō,
ɓōkə́nən̄ tɔ̄ȳ loo kán̄ naā yā kum kɔɔ̄ gə̄ tə́ ō!
33I ni n i nge rāā kadə̄ bā gə̄ télən̄ dəla loo ō,
ta kəɓa man̄ gə̄ télən̄ loo kə́ kəndā man̄ a rāā de gə̄ tū tə́ ō ní.
34I ni n i nge rāā kadə̄ dɔ nang kə́ teē yá̰a̰ tél dɔ nang kə́ teē yá̰a̰ aĺ,
sɔɔ̄ń kem ndul yā de gə̄ kə́ ndin̄ tū tə́ ní.
35Ni asə rāā kadə̄ dəla loo tél gáŕ man̄ ō,
asə rāā kadə̄ loo kə́ kə̄sāá tél kəɓa man̄ ō.
36Ni-rāā adə̄ ngé ɓō gə̄ ndin̄ loo ń noō tə́,
nin̄ rāān̄ ɓē ndin̄neé.
37Nin̄ dubə̄n̄ yá̰a̰ kem ndɔr̄ yādə́ gə̄ tə́ ō,
əhɔn̄ kāgə̄ nduú gə̄ ō, tə́jān̄ kanə̄n gə̄ ō.
38Kɔ́ɔ̄ɓē rāā majə sedə́, adə̄ ojən̄ naā ngá̰ý ō,
rāā adə̄ yá̰a̰ kul̄ yādə́ gə̄ tél na̰yn̄ i sḛ́ý beē njék njék aĺ ō.
39Gō tə́ anī nin̄ télən̄ kə̄ nang tə́ ō, tɔ́gə́də́ gətóo ō,
sɔɔ̄ń yá̰a̰ gə̄ ń nin̄ nalə̄n̄ ní ō,
yá̰á̰ kə́ to kum kaȳ aĺ ń əsō dɔdə́ tə́ ní ō, yá̰á̰ kə́ tōr̄ ō.
40Kɔ́ɔ̄ɓē rāā adə̄ de gə̄ kídə̄n̄ de kə́ bo gə̄ ō,
əya̰də́ adə̄ dáȳn̄ kem dəla loo kə́ róbə gətóo tū tə́ tə́ ō.
41Banī ni un nge rɔ̄ tō ndoō kɔ̄ɔ́ kum ndoō kə́ ngá̰ý aĺ naā tə́ ō,
rāā adə̄ gír kojə gə̄ ojən̄ naā ngá̰ý tītə̄ ɓūtə̄ yá̰a̰ kuĺ gə̄ ō.
42De kə́ súmūú gə̄ a̰a̰n̄ yá̰a̰ gə̄ ń toō malang anī rāān̄ rɔ̄nel̄ ō,
ngé rāā yá̰á̰ kə́ majaĺ gə̄ malang ndin̄ kə tadə́ kə́ mbóó ō.
43De kə́ nge kum kedə̄ a əndā kumən gíŕ yá̰a̰ gə̄ ń noō tə́ malang ō,
a ger̄ kem majə yā Kɔ́ɔ̄ɓē ō.
Currently Selected:
PĀ GƏ̄ 107: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.