PĀ GƏ̄ 102
102
Yá̰á̰ kə́ tɔȳ dɔ deē ō kəndā kem dɔ Nə́ɓā tə́ ō
1Ndɔ̄ȳ yā de kə́ nge rɔ̄ tō ndoō kə́ tɔ́gən təgā kɔ̄ɔ́, kə́ a ɔjə Kɔ́ɔ̄ɓē yá̰á̰ kə́ tōr̄ rɔ̄n gə̄.
2Kɔ́ɔ̄ɓē, ōō ndɔ̄ȳ yāḿ,
ādə̄ nōō yāḿ aw̄ bátə́ ugə̄ rɔ̄í tə́!
3Ī-lōō tūr̄ gidií kɔ̄ɔ́ taḿ tə́,
ndɔ̄ ń wur kɔl əsōń dɔḿ tə́ ní.
Ī-nēl̄ mbīí kə̄ rɔ̄ḿ tə́.
Ī-ndigəm̄ láẃ ndɔ̄ ń m-ā m-ɓārīneé kadə̄ ī-rāā seḿ tə́ ní.
4Tɔdɔ̄ ndɔ̄ḿ gə̄ mānə̄n̄ tītə̄ sa hor beé,
kə̄ngāḿ gə̄ o̰o̰n̄ hor tītə̄ ta kīr̄ hor beé.
5Dan wurəḿ tutə tītə̄ mu kə́ deē əja beé,
adə̄ dɔḿ ndígə̄nal kəsa yá̰a̰ kɔ̄ɔ́.
6m̄-to i dan to̰ō̰ tə́ bátə́ adə̄ ń toō
na̰y i kə̄ngāḿ ngóy.
7m̄-to tītə̄ ngāndḭḭ̄ kə́ kem dəla loo tə́ ō,
tītə̄ kɔȳ kə́ gotə ɓēé ō beé.
8Ɓīī ɔdə kumḿ alé, m̄-ndi i kə kérə́ḿ
tītə̄ yel̄ kə́ ndi kə kérneé dɔ kújú beē.
9Madə̄ ba̰ā̰ḿ gə̄ sāān̄ taḿ kə dɔ ndɔ̄ gə̄,
wōn̄g rāādə́ ngá̰ý seḿ, nin̄ túbən̄ seḿ.
10Yá̰a̰ kəsaḿ i bū hor.
Man̄ kumḿ əla naā kə man̄ ka̰ȳḿ.
11Ḭ̄ únəm̄ kə̄ dɔɔ́ pá tá ə́la ə̄nīm̄
sɔɔ̄ń wōn̄g ń rāāī ní, wōn̄g kə́ ngá̰ý ń rāāī seḿ ní.
12Ndɔ̄ḿ gə̄ mānə̄n̄ ngá̰ý tītə̄ ndíĺ kə́ loo sɔlí beē,
m̄-tutə tītə̄ mu beé ō.
13Banī Kɔ́ɔ̄ɓē, ḭ̄ i mban̄g ngándáńg, ḭ̄ i Nə́ɓā kə dɔ ɓāl̄ gə̄ ɓāl̄ gə̄.
14Ā ḭ́ḭ dɔɔ́ tām̄ yā Siyo̰ tə́, tām̄ táŕ kə́ ī-tárən tə́,
tɔdɔ̄ mbang kə́ kadə̄ kumií o̰o̰īneé tām̄ yān tə́ asə.
A̰á̰ā̰ kum mbang ní asə kɔ̄ɔ́!
15O̰o̰ ngé kəla yāí gə̄ tɔdɔ̄ mbal̄ kəndā kújə́ kə́ tū tə́ gə̄ ngá̰ý,
bū loo kə́ ndəbā ɓē kə́ Siyo̰ tə́ gə̄gē kumdə́ o̰o̰də́ tɔdɔ̄ ngá̰ý.
16-18Dan ń Kɔ́ɔ̄ɓē a tél yā rāā ɓē kə́ Siyo̰ gogə́ rang ō,
a teē hɔy kadə̄ de gə̄ a̰a̰nən̄ loo ndə́lē tə́ ō,
a oō ndɔ̄ȳ yā ngé rɔ̄ tō ndoō gə̄ ō,
a asən kídə̄də́ ō ní anī,
nápar de gə̄ a ɓōlə́n̄ rī Kɔ́ɔ̄ɓē ō,
mban̄g kə́ dɔ nang tə́ gə̄ malang a a̰a̰n̄ kɔsə gɔn yān yā ger̄ ō.
19Ādə̄ ndangən̄ yá̰á̰ ń noō tām̄ yā ngáńdə́ gə̄ tə́.
Loo ń noō tə́ gír deē kógə̄ḿ kə́ tél kəndā kijə gə̄ a ɓōkə́n̄ Kɔ́ɔ̄ɓē tɔ̄ȳ.
20Kɔ́ɔ̄ɓē ndi dɔɔ́ kem kújə́ kə́ táĺ yān tə́
ba əga kumən kə̄ nang tə́ a̰a̰ń loo.
Kɔ́ɔ̄ɓē ndi dɔ rā̰ tə́ a̰a̰ń loo kə̄ dɔ nang tə́,
21yā koōń sō̰ḿ dəngáy gə̄ ō,
yā tútəń kəlā kɔ̄ɔ́ rɔ̄ ngé gə̄ ń
gāngə̄n̄ sarya yo dɔdə́ tə́ ní ba kəya̰də́ dɔɔ́ ō.
22A rāān̄ kadə̄ rī Kɔ́ɔ̄ɓē a ɓār̄ kem ɓē kə́ Siyo̰ tə́ ō,
a tɔ̄ȳnən̄ kem ɓē kə́ Jerusalem tə́ ō,
23dan ń gír de gə̄ ō, ɓē ko̰o̰ gə̄ ō, a əngen̄ naā
yā rāā kəla yā Kɔ́ɔ̄ɓē ní.
24Ni-ɔr̄ tɔ́gə́ḿ dɔ ngɔ̄də̄ tə́,
ni-gān̄g ta ndɔ̄ḿ dɔɔ́.
25Adə̄ m-ə́da na: Nə́ɓā yāḿ,
ī-lōō kunəm̄ kɔ̄ɔ́ dan ń ɓālə̄ḿ ugə̄ kə̄ danaá ɓáý ní!
Ḭ̄ ā ī-ndi i kə dɔ ɓāl̄ gə̄ malang.
26Ḭ̄ ə̄ndā dɔ nang i kété jóo ō,
i jīí n rāā dɔ rā̰ ō ní.
27Yá̰a̰ gə̄ ń noō a gətóon̄ kɔ̄ɔ́ banī ḭ̄ ā ī-ndi kum gotií.
Nin̄ malang a ngísən̄ tītə̄ kūbə̄ kə́ əsō ngísə beé.
Ḭ̄ ā ī-mbél̄ gíŕdə́ tītə̄ loo mbél̄ gír kūbə̄ beé ō,
nin̄ a aw̄n̄ kɔ̄ɔ́ yā kəya̰ń loo ō.
28Banī ḭ̄ ī-ndi kum gotií,
ta tɔ̄l̄ ta ndɔ̄í gətóo.
29Ngán kem ngé kəla yāí gə̄ a ndin̄ gotə kógə̄ḿ ō,
ngán kaadə́ gə̄ a ndin̄ ta kumií tə́ ō.
Currently Selected:
PĀ GƏ̄ 102: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.