MATIYE 18
18
De kə́ bo kə́ kem Ɓē ko̰o̰ kə́ dɔ rā̰ tə́
(Á̰a̰ī Mark 9.33-37; Luk 9.46-48)
1Dan ngeé ń noō tə́ ní, ngé ndóō yá̰a̰ yā Jeju gə̄ reēn̄ rɔ̄n tə́, ba dəjenən̄ na ké i náā n i de kə́ bo ngá̰ý tɔȳ madə̄n gə̄ kem Ɓē ko̰o̰ kə́ dɔ rā̰ tə́ ní wa.
2Anī Jeju ɓāŕ ngōn̄ kə́ dūú kógə̄ḿ əndān dɔ dandə́ tə́, ba ədadə́ na:
3Ādə̄ m-ə́dásí najə̄ kə́ bo ngá̰ý, ré ī-tūrī hálsí kadə̄ tél ī-toī tītə̄ ngáń kə́ dūú gə̄ aĺ anī, ā údiī kem Ɓē ko̰o̰ kə́ dɔ rā̰ tə́ tə́ alé. 4Deē ń tél kə rɔ̄neé kə̄ nang tə́ ō, tél to tītə̄ ngōn̄ ń toō ō ní, i ni n i de kə́ bo kem Ɓē ko̰o̰ kə́ dɔ rā̰ tə́ ní. 5Ba deē ń əhɔ ngōn̄ kə́ tītə̄ nge ń toō kə̄ rɔ̄n tə́ najə̄ yāḿ tə́ ní, əhɔm̄ i mā nəkɔ́ kə̄ rɔ̄n tə́.
Mān̄ dɔ ndū najə̄ yā Nə́ɓā i yá̰á̰ kə́ majaĺ ngá̰ý
(Á̰a̰ī Mark 9.42-48; Luk 17.1-2)
6Deē ń rāā ngōn̄ kógə̄ḿ kə́ dan ngáń gə̄ ń taān̄ kemḿ tə́ ní adə̄ əsō ní, kə́ só tə́ ngá̰ý tām̄ yā kɔ́ɔ̄ tə́ i kadə̄ do̰ō̰n̄ mbal̄ kusə yá̰á̰ kə́ bo kɔ́ɔn tə́ ba ənīnən̄ kum bā bo tə́. 7Rɔ̄ ndoō i kə de kə́ dɔ nang tə́ gə̄ tām̄ rāā ń nin̄-rāān̄ madə̄də́ gə̄ adə̄ tə́sōn̄ kum majaĺ tə́ ní. I gáŕ kadə̄ ngé rāā de gə̄ beé ndin̄ dan madə̄də́ gə̄ tə́ ɓá tā, ba rɔ̄ ndoō i yā deē ń a rāā yá̰a̰ adə̄ yá̰á̰ kə́ beé rāań yá̰á̰ ní.
8Ré i jīí aláa i njaí n a rāāī kadə̄ ə̄sō anī, ī-gān̄g ə̄nīn sa̰y rɔ̄í tə́ kɔ̄ɔ́. I só tə́ kadə̄ údə loo kə́ deē a ndi kə kumneé tū tə́ tə́ kanjə̄ jīí kógə̄ḿ, aláa njaí kógə̄ḿ, tɔȳ kadə̄ ənīnī kə jīí gə̄ jōó ō, njaí gə̄ jōó ō, kum hor kə́ a oy aĺ bátə́ tə́. 9Ba ré i kumií n a rāāī kadə̄ ə̄sō anī, ɔ̄r̄ ə̄nīn sa̰y rɔ̄í tə́ kɔ̄ɔ́. I só tə́ kadə̄ údə tū kajə tə́ kə kumií kə́ kógə̄ḿ beē, tɔȳ kadə̄ ənīnī kə kumií kə́ jōó gə̄ kum hor Gehen tə́.
Batə̄ kə́ tan tḭ̄ḭ̄ tá tél əngenən̄
(Á̰a̰ī Luk 15.3-7)
10Ngáń kə́ dūú gə̄ ń toō ní ī-lōōī kídə̄ nge kógə̄ḿ dandə́ tə́. Tɔdɔ̄ ādə̄ m-ə́dásí, dɔ rā̰ tə́ ní deē yādə́ kə́ dɔ rā̰ tə́ gə̄ a ran̄ ta kum Bɔbə́ḿ kə́ ndi dɔ rā̰ tə́ tə́ i ngándáńg.
11Tɔdɔ̄ Ngōn̄ Deē reē i kajə ngé gə̄ ń tadə́ tḭ̄ḭ̄ kɔ̄ɔ́ tə́ ní#18.11 K. 11 gətóo kem makətūbə̄ yā Matiye kə́rēý gə̄ kə́ kété tə́ kə ta Gərek..
12Ré deē kógə̄ḿ aw̄ kə batə̄ gə̄ ɓú, ba ta kə́ kógə̄ḿ tḭ̄ḭ̄ anī, a əya̰ kə kutə ndōhó gidə i ndōhó gə̄ dɔ mbalá ba a aw̄ yā sāā nge ń tan tḭ̄ḭ̄ ní aĺ a? 13Ré əngen anī ādə̄ m-ə́dásí najə̄ kə́ bo ngá̰ý, rɔ̄n a nelə̄n ngá̰ý tām̄ yān tə́ tɔȳ yā ngé kə́ kutə ndōhó gidə i ndōhó gə̄ ń tadə́ tḭ̄ḭ̄ aĺ ní. 14I tītə̄ ń noō kə Bɔbə̄sí kə́ ndi dɔ rā̰ tə́. Ni gḛy kadə̄ ngáń kə́ dūú gə̄ ń toō ní, ta nge kə́ kógə̄ḿ tḭ̄ḭ̄ alé.
Lon ń ré ngōkó̰ó̰í rāā yá̰á̰ kə́ majaĺ kógə̄ḿ anī
15Ré ngōkó̰ó̰í rāā yá̰á̰ kə́ majaĺ kógə̄ḿ seí anī, āw̄ ə́ngen kə kérneé ba ɔ́jən yá̰á̰ kə́ gōtə́ aĺ ń ni-rāā ní. Ré ni-oō najə̄ yāí anī, ə́nge ngōkó̰ó̰í ní kɔ̄ɔ́. 16Ba ré ni-mbātə́ koō najə̄ yāí anī, āwī kə madí kógə̄ḿ, aláa kə madí gə̄ jōó, ə́ngeniī ɓáý to̰, tɔdɔ̄ ndangən̄ na:
A gāngə̄n̄ sarya malang i kə gō najə̄ kɔr̄ de kə́ kum tə́ gə̄ jōó, aláa mətá.
17Ré ni-ɔdə koō najə̄ yādə́ aĺ anī, ə́da Egəlijə. Ba ré ni-mbātə́ koō najə̄ yā Egəlijə to̰ anī, ī-rāān de kə́ nge taā kem tə́ aĺ ō, ī-rāān̄ de kə́ nge taā lambóó tə́ ō.
Kɔgə̄ deē rāā yá̰a̰ ō, kadə̄ deē ta róbə rāā yá̰a̰ ō
18Ādə̄ m-ə́dásí najə̄ kə́ bo ngá̰ý, yá̰a̰ malang ń ī-do̰ō̰ī dɔ nang tə́ ní, i kə́ do̰ō̰n̄ dɔ rā̰ tə́ ō, yá̰a̰ malang ń ī-tútiī dɔ nang tə́ ní, i kə́ tútən̄ dɔ rā̰ tə́ ō.
19Ādə̄ m-ə́dásí najə̄ kə́ bo ngá̰ý kə́rēý ɓáý to̰: Ré de gə̄ jōó dansí tə́ kemdə́ i gō naā tə́ ba dəjen̄ yá̰á̰ kógə̄ḿ kə ndɔ̄yɔ̄ɔ́, ká i rí gə̄gē anī, Bɔbə́ḿ kə́ ndi dɔ rā̰ tə́ a adə̄də́ yá̰á̰ ní. 20Tɔdɔ̄ loo ń de gə̄ jōó aláa mətá kánə̄n̄ naā tū tə́ kə rīḿ ní, mā i dandə́ tə́ noō.
Kūjə́ najə̄ yā nge kəla kə́ mbātə́ ma̰ȳ rɔ̄n
21Anī Piyer ndɔ́tə̄ kə̄ rɔ̄ Jeju tə́ ba dəjen najə̄ ń toō, əda na:
Kɔ́ɔ̄ɓē, ré ngōkó̰ó̰ḿ rāā majaĺ seḿ kə̄ naā tə́ naā tə́ anī, kə m̄-mā̰ȳ rɔ̄ḿ dɔn tə́ nja i kóndóńg? I nja sīrí a?
22Jeju tél ədan na:
I nja sīrí beé ngóy alé, i nja kutə sīrí nja sīrí. 23I tām̄ najə̄ ń noō tə́ n Ɓē ko̰o̰ kə́ dɔ rā̰ tə́ to i tītə̄ mban̄g kógə̄ḿ kə́ gḛy tə́dá yá̰a̰ yān kə́ jī ngé kəla yān gə̄ tə́ ní. 24Dan ń ni-əla gíŕ tə́dá yá̰a̰ yān ní, reēn̄ kə nge kəla yān kógə̄ḿ kə́ kə̄rā yān kə́ dɔn tə́ asə gúrsə dūbú nja dūbú ngá̰ý. 25Dəngam ní ənge yá̰á̰ kə́ yā kəgāń kə̄rā ní alé, anī kɔ́ɔ̄n əda kadə̄ igən̄ seneé ō, kə nə̄yá̰n ō, ngánən gə̄ ō, kə yá̰a̰ yān gə̄ malang ō, kadə̄ asə kum gotə kə̄rā ní. 26Anī nge kəla ní əsō ɔsə non nang tə́ nja kɔ́ɔ̄n tə́ rāān ɓɔ́, ədan na: Kɔ́ɔ̄ḿ, ī-tə́gā taí dɔḿ tə́, na m-ā m-ə̄gāī kə̄rā yāí ní malang. 27Kɔ́ɔ̄n a̰a̰ kum tō ndoō yān, adə̄ əya̰ kə̄rā yān kə́ dɔn tə́ ní kɔ̄ɔ́ ō, əya̰n adə̄ aw̄ ō.
28Dan ń nge kəla ní teē ndágá anī, ənge nge kəla madə̄n kógə̄ḿ kə́ kə̄rā yān ni i dɔn tə́, gúrsə dūbú sɔ́. Anī əsō kə míndəneé əhɔ adə̄ na̰y i sḛ́ý a koō gāngən, ba ədan na kə əgān kə̄rā yān kə́ dɔn tə́. 29Nge kəla madə̄n ní əsō kə̄ nang tə́ njan tə́, rāān ɓɔ́ əda na: Ī-tə́gā taí dɔḿ tə́, na m-ā m-ə̄gāī kə̄rā yāí ní. 30Banī ni-ɔdə alé, ba aw̄ ənīn kújə dəngáyá yā ngóoń kadə̄ əgā kə̄rā kə́ dɔn tə́ ní. 31Madə̄ kəlan gə̄ ń a̰a̰n̄ yá̰á̰ ń ni-rāā ní tōr̄ kemdə́ ngá̰ý, adə̄ aw̄ ɔjən̄ kɔ́ɔ̄də́ gotə yá̰á̰ ń rāā yá̰á̰ ní malang 32Anī kɔ́ɔ̄ nge kəla ní əla gōn tə́, 33ba ədan na: Nge kəla kə́ nge kem ndul, m-ə́ya̰ kə̄rā yāḿ kə́ dɔí tə́ kɔ̄ɔ́ tɔdɔ̄ ī-rāām̄ ɓɔ́. Ní, majə kadə̄ á̰a̰ kum tō ndoō yā madí tītə̄ ń mā m-á̰a̰ń kum tō ndoō yāí ní ō aĺ a? 34Wōn̄g rāā kɔ́ɔ̄n seneé ngá̰ý, adə̄ əlan dəngáyá kadə̄ rāānən̄ yá̰á̰ kə́ tōr̄ kə̄ dɔɔ́ yā ngóoń kadə̄ əgā kə̄rā kə́ dɔn tə́ ní malang.
35Gō tə́ anī Jeju əda na:
Sḭḭ̄ kógə̄ḿ kógə̄ḿ malang ní, ré ī-mā̰yī rɔ̄sí dɔ naā tə́ kə́ rɔ̄kum tə́ aĺ anī, Bɔbə́ḿ kə́ ndi dɔ rā̰ tə́ a rāā sesí i tītə̄ ń noō ō.
Currently Selected:
MATIYE 18: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.