MATIYE 12
12
Jeju ō, ndɔ̄ Sabat ō
(Á̰a̰ī Mark 2.23-28; Luk 6.1-5)
1Dan ngeé ń noō tə́ ní, Jeju ənda dan ndɔr̄ kōō gémē a mān̄ ndɔ̄ sabat tə́. Ɓō rāā ngé ndóō yá̰a̰ yān gə̄, adə̄ a gángə̄n̄ dɔ kōō gə̄ ní a əsan̄. 2Parijiyḛ gə̄ a̰a̰n̄də́ loo rāā tə́ anī, ədan̄ Jeju na:
Á̰a̰ā̰, ngé ndóō yá̰a̰ yāí gə̄ a rāān̄ yá̰á̰ ń ndū najə̄ ɔgə̄ rāā ndɔ̄ sabat tə́ ní.
3Ba ni-tél ədadə́ na:
Yá̰á̰ ń Dabid rāā dan ń ɓō rāān ni ō, madə̄n gə̄ ō, ní ī-tə́daī kem makətūbūú aĺ a? 4Ni udə kújə yā Nə́ɓā tə́, əsan̄ mápá kə́ ndējə̄ gə̄ kə madə̄n gēé. Ba ndū najə̄ ɔgə̄n ni ō madə̄n gə̄ ō kəsa mápa gə̄ ní, ba i ngé tun̄ yá̰a̰ gə̄ ngóy n a əsan̄ karī ní. 5Aláa ngé tun̄ yá̰a̰ gə̄ ń rāān̄ kəla ndɔ̄ sabat tə́ kem loo kə́ táĺ tə́, ba de gə̄ a̰a̰n̄ nge ń noō i rāā majaĺ aĺ ní ī-tə́daī kem makətūbə̄ ndū najə̄ yā Moijə tə́ aĺ a? 6Ba m-ə́dásí na: Yá̰á̰ kə́ tɔȳ loo kə́ táĺ i loo ń toō tə́ laā. 7Najə̄ ń na:
Yá̰á̰ ń m̄-ndigə ní i rāā kem ndaa ba i yá̰a̰ tun̄ alé ní,
nə́ngētə́ ī-gerī i kumən anī, ā ī-gāngī sarya dɔ de gə̄ ń toō ń najə̄ gətóo dɔdə́ tə́ ní alé. 8Tɔdɔ̄ Ngōn̄ Deē i kɔ́ɔ̄ ndɔ̄ sabat.
Jeju rāā adə̄ jī deē kógə̄ḿ kə́ oy tél majə gogə́
(Á̰a̰ī Mark 3.1-6; Luk 6.6-11)
9Jeju ɔtə loo ń noō tə́ aw̄ udə kem kújə́ kán̄ naā yādə́ tə́. 10Anī deē kógə̄ḿ kə́ jīn oy kɔ̄ɔ́ ndi tū tə́. Nin̄-dəjen̄ Jeju na ké ndū najə̄ adə̄ deē ta róbə tɔ̄l̄ mo̰y dɔ deē tə́ ndɔ̄ sabat tə́ wa. Dəjenən̄ najə̄ ní i yā kadə̄ kə n-sekə́nən̄neé.
11Ba Jeju tél ədadə́ na:
I náā kə́ dansí tə́ laā n ré batə̄ yān i kógə̄ḿ beē, ba batə̄ ní əsō bəloó ndɔ̄ sabat tə́ anī a udə gōn tə́ yā kɔrə̄n teē seneé ndágá aĺ ní? 12Ba gātə̄ deē ndul tɔȳ gātə̄ batə̄ sa̰y aĺ a? I beé ní ndū najə̄ adə̄ ta róbə rāā majə kə deé ndɔ̄ sabat tə́.
13Loo ń noō tə́ Jeju əda dəngam ní na kə sə́ra jīn. Dəngam ní sə́ra jīn ɓáa jīn tél majə gogə́ tītə̄ madə̄.
14 Parijiyḛ gə̄ ń ndin̄ noó ní teēn̄ ndágá anī oōn̄ naā dɔ Jeju tə́ ké n-a n-rāān̄ i ba̰ý n n-ā n-tɔ̄l̄nən̄neé ní wa.
Nge kəla ń Nə́ɓā gə̄rān ní
15Dan ń Jeju oō najə̄ yá̰á̰ ń sāān̄ rāā seneé ní anī ndɔ́tə̄ loo ní tə́ kɔ̄ɔ́, ba de gə̄ ngá̰ý unən̄ gōn. Ni tɔ̄l̄ mo̰y gə̄ dɔ de gə̄ tə́ malang. 16Ba tāādə́ ɓa ɓang na kə lōōn̄ rāā kadə̄ deē gerə̄n, 17yā kadə̄ najə̄ ń Ijai nge koō ta əda ní reē udəń gírí. Ni-əda na:
18Nge kəla yāḿ ń m̄-gə̄rān ní n toó,
kó tár yāḿ ń nelə̄m̄ seneé adə̄ m̄-gə̄rān ní.
M-ā m̄-rāā kadə̄ Ndílə́ḿ a ndi dɔn tə́,
adə̄ a ɔjə nápar de gə̄ yá̰á̰ kə́ gōtə́ kə́ yā rāā.
19Ni a kɔ̄l̄ kə deé aĺ ō, a əga kɔŕ aĺ ō.
Deē a oō ndūn ndágə loo gə̄ tə́ aĺ ō.
20A tetə tə̄ɓā kə́ rugə aĺ ō,
a tɔ̄l̄ hor ń a o̰o̰ njḛḛ tū lámbá tə́ ní aĺ ō,
bátə́ kadə̄ ni-rāań kadə̄ yá̰á̰ kə́ gōtə́ tetə rɔ̄ɔ̄.
21Nápar de gə̄ a əndān̄ kemdə́ dɔn tə́.
Jeju ō Beljebul ō
(Á̰a̰ī Mark 3.22-30; Luk 11.14-23)
22Anī reēn̄ kə deē kógə̄ḿ rɔ̄ Jeju tə́. Deē ní a̰a̰ loo aĺ ō, ɔr̄ najə̄ aĺ ō, tɔdɔ̄ ndíĺ kə́ majaĺ i kemən tə́. Jeju rāā adə̄ rɔ̄ deē ní ngáā, adə̄ deē ní ɔr̄ najə̄ ō, a̰a̰ loo ō. 23Ɔr kum kósə de gə̄ malang, adə̄ ədan̄ na ké deē ń noō i ngōn̄ Dabid aĺ wa.
24Banī Parijiyḛ gə̄ ń oōn̄ ní, ədan̄ na Jeju na a tə̄ɓā ndíĺ kə́ majaĺ gə̄ na i kə ta kūl̄ tɔ́gə́ ń Beljebul, ngār yā ndíĺ kə́ majaĺ gə̄ na adə̄n ní ngóy.
25Ba Jeju ger̄ gír̄ kə́ kemdə́ tə́, adə̄ ədadə́ na:
Ɓē ko̰o̰ malang ń de kə́ kemeé gə̄ a rɔ̄ɔ̄n̄ naā ní, a nujə kɔ̄ɔ́. Ré de kə́ kem ɓē kə́ kógə̄ḿ beē tə́ gə̄ ō, de kə́ gír kojə kə́ kógə̄ḿ beē tə́ gə̄ ō, a rɔ̄ɔ̄n̄ naā anī, loo kadə̄ ɓē ní aláa, gír kojə ní ndi ɓáý to̰ ní a gətóo. 26Adə̄ ré Sətan a tə̄ɓā Sətan anī i nəkɔ́ n a rɔ̄ɔ̄ kə rɔ̄neé noó. Ní loo kadə̄ ɓē ko̰o̰ yān a ndi i ba̰ý? 27Ré mā m̄-tə̄ɓā ndíĺ kə́ majaĺ gə̄ i kə ta kūl̄ tɔ́gə́ ń Beljebul adə̄m̄ ní anī, ngé ndóō yá̰á̰ yāsí gə̄ ní a tə̄ɓān̄də́ i kə ta kūl̄ tɔ́gə yā náā tā. I beé ní i nin̄ kɔ́ gə̄ n a télən̄ ngé gān̄g sarya dɔsí tə́ gə̄ ní. 28Ba ré m̄-tə̄ɓā ndíĺ kə́ majaĺ gə̄ i kə ta kūl̄ Ndíĺ yā Nə́ɓā anī, i Ɓē ko̰o̰ yā Nə́ɓā n-reē ugə̄ rɔ̄sí tə́ ɓá kɔ̄ɔ́ noō.
29Loo kadə̄ deē udə kújə yā de kə́ dəngam kə́ ngan̄g tə́ ō, ndúr̄ yá̰a̰ yān yā kaw̄ń, kanjə̄ kadə̄ əla gíŕ tṵ́ṵ̄ dəngam ní kə kəlāá kété ní i ba̰ý? A tṵ́ṵ̄n pá tá a ndúr̄ yá̰á̰ kə́ kem kújə yān tə́ yā kaw̄ń ɓáý. 30Deē ń ni i seḿ māá aĺ ní a tə̄ndā tḭ̄ḭ̄ i mbée. 31Tām̄ najə̄ ń toō tə́ ní ādə̄ m-ə́dásí: Yá̰á̰ kə́ majaĺ gə̄ malang ń de gə̄ rāān̄ ō, ndū gə̄ malang ń de gə̄ tájə̄n̄ ō ní, a mā̰ȳn̄ rɔ̄də́ dɔdə́ tə́ najə̄n tə́. Banī deē ń tájə̄ Ndíĺ kə́ Táĺ ní, a mā̰ȳn̄ rɔ̄də́ dɔn tə́ alé. 32A mā̰ȳn̄ rɔ̄də́ dɔ deē ń əda najə̄ kə́ majaĺ dɔ Ngōn̄ deē tə́ ní, ba deē ń ɔr̄ najə̄ kə́ majaĺ dɔ Ndíĺ kə́ Táĺ tə́ ní, a mā̰ȳn̄ rɔ̄də́ dɔn tə́ dɔ nang ń toō tə́ aĺ ō, dɔ nang kə́ kijə kə́ ndɔ̄ń tə́ tə́ aĺ ō.
Kāgə̄ ō kanə̄n ō
(Á̰a̰ī Luk 6.43-45)
33Ré kāgə̄ i kə majanī kanə̄n i kə́ majə ō, ré kāgə̄ i kə́ majanī kanə̄n i kə́ majaĺ ō. Tɔdɔ̄ a gerə̄n̄ kāgə̄ i kanə̄n tə́. 34Sḭḭ̄ ń i gír ɓūtə̄ lī kakə́m gə̄ ní, loo kadə̄ ā ɔ̄rī najə̄ kə́ majə dan ń sḭḭ̄ i kə́ majaĺ gə̄ ní i ba̰ý? Tɔdɔ̄ i yá̰á̰ kə́ rosə kemií ngá̰ý n a teē taí tə́ kə́ najə̄ tə́ ní. 35De kə́ majə a teē kə yá̰á̰ kə́ majə gə̄ dan yá̰a̰ kənge yān kə́ majə gə̄ tə́ ō, de kə́ majaĺ a teē kə yá̰á̰ kə́ majaĺ gə̄ dan yá̰a̰ kənge yān kə́ majaĺ gə̄ tə́ ō. 36Ādə̄ m-ə́dásí najə̄ kə́ bo ngá̰ý, ndɔ̄ gān̄g sarya tə́ anī de gə̄ a ɔrə̄n̄ gír najə̄ kə́ kanjə̄ kumən gə̄ malang ń nin̄-tə́dan̄ ní. 37Tɔdɔ̄ i kə gō najə̄ kɔrīí n a ədan̄ na najə̄ na gətóo dɔí tə́, aláa najə̄ na i dɔí tə́ ní.
De gə̄ mērə̄n̄ Jeju rāā yá̰á̰ kə́ to kɔr kum
(Á̰a̰ī Mark 8.11-12; Luk 11.29-32)
38Loo ń noō tə́ ngé ndóō de gə̄ ndū najə̄ kə́rēý gə̄ ō, Parijiyḛ kə́rēý gə̄ ō ədan̄ Jeju na: Ngoljí, jə-gḛy kadə̄ ī-rāā yá̰á̰ kógə̄ḿ kə́ to kɔr kum kadə̄ j-a̰ā̰.
39Jeju tél ədadə́ na:
De kə́ ngɔlaā gə̄ ń i de kə́ majaĺ gə̄ ō, i ngé kəhɔ gō Nə́ɓā aĺ gə̄ ō ní, dəjen̄ yá̰á̰ kə́ to kɔr kum a? A ɔjə̄n̄də́ yá̰á̰ kə́ to kɔr kum kə́ rang alé, ba i yā Jonas nge koō ta ngóy. 40Adə̄ tītə̄ ń Jonas toń kem kānjə̄ kə́ bo tə́ kadə mətá ō, ndɔ̄ mətá ō ní, Ngōn̄ Deē a to gíŕ nángāá kadə mətá ō, ndɔ̄ mətá ō tītə̄ ń noō. 41Ndɔ̄ sarya tə́ anī, de kə́ Ninibə gə̄ a ḭḭn̄ yā gān̄g sarya dɔ de kə́ ngɔlaā gə̄ tə́. Tɔdɔ̄ dan ń Jonas ɔjə najə̄ ní Ninibə gə̄ tūrə̄n̄ háĺdə́. Ba kə́ tɔȳ Jonas i laā. 42Ndɔ̄ sarya tə́ anī, mban̄g kə́ dəyá̰ kə́ dām̄ mbɔ́r ɓē kə́ geleé tə́ a ḭḭ yā gān̄g sarya dɔ de kə́ ngɔlaā gə̄ tə́. Tɔdɔ̄ ni-ḭḭ i ta ngóy dɔ nang tə́ nú n-reē koō kum kedə̄ yā Salomo̰ tə́ ní. Ba kə́ tɔȳ Salomo̰ i laā.
Ndíĺ kə́ majaĺ tél reē gogə́
(Á̰a̰ī Luk 11.24-26)
43Dan ń ndíĺ kə́ yḛr teē kem deē tə́ anī, aw̄ dáȳ kə̄ kem loo gə̄ kə́ man̄ gətóo tū tə́ tə́ a sāāń loo kə́ yā koōń rɔ̄n. Ba dan ń ənge aĺ anī 44əda na kə n-tél kə n-aw̄ gogə́ kem kújə yān ń na n-teē kemeé tə́ ní. Dan ń reē ugə̄ anī, a̰ā̰ kadə̄ kem kújə ra i karī ō, yá̰a̰ gə̄ i kə́ tə́ndān̄də́ kə gōó majə ō. 45Anī ɔtə aw̄ sāā ndíĺ kə́ majaĺ ngá̰ý tɔȳn gə̄ sīrí reē sedə́, adə̄ rāān̄ ɓē seneé kem kújə́ ní tə́. Loo ń noō tə́ dəngam ní ndi majaĺ ngá̰ý ta tɔ̄l̄ ta tə́ tɔȳ ndin kə́ kété.
Kó̰o̰ Jeju ō ngákó̰o̰n gə̄ ō
(Á̰a̰ī Mark 3.31-35; Luk 8.19-21)
46Jeju ra a ɔr̄ najə̄ kə kósə de gēé kə̄ tan tə́ ɓáý anī, kó̰o̰n nin̄ kə ngákó̰o̰n gēé reē ran̄ ndágá, sāān̄ kɔr̄ najə̄ seneé. 47Deē kógə̄ḿ ədan na:
Ōō tá, kó̰ó̰í nin̄ kə ngákó̰ó̰í gə̄ ran̄ ndágá noō, a sāān̄ kɔr̄ najə̄ seí.
48Anī Jeju tél əda deē ń ədan kōōdə́ ní na:
I náā n i kó̰ó̰ḿ ō, i náā gə̄ n i ngákó̰ó̰ḿ gə̄ ō ní?
49Ni-əla jīn kə̄ dɔ ngé ndóō yá̰a̰ yān gə̄ tə́ ba əda na:
I nin̄ gə̄ ń toō n i kó̰ó̰ḿ ō ngákó̰ó̰ḿ gə̄ ō ní. 50Tɔdɔ̄ deē ń rāā yá̰a̰ kə gō kem ndigə yā Bɔbə́ḿ kə́ ndi dɔ rā̰ tə́ ní, kɔ́ɔ̄ i ngōkó̰ó̰ḿ kə́ dəngam ō, kə́ dəyá̰ ō, i kó̰ó̰ḿ ō.
Currently Selected:
MATIYE 12: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.