JOB 8
8
Bildad əda na: A əgān̄ kə̄rā yá̰á̰ kə́ gōtə́ aĺ i ngɔr ń toō tə́, aláa i ndɔ̄ń tə́ ɓáý
1Loo ń noō tə́ Bildad kə́ Suwa un najə̄ ɔr̄, ni-əda Job na:
2Ā ə́dá yá̰a̰ gə̄ ń noō kə najə̄ kə́ kɔr̄
tītə̄ nél man̄ kə́ əla kə tɔ́gɔ́ beē i bátə́ rə́ngáý tə́?
3Nə́ɓā i nge rāā kadə̄ yá̰á̰ kə́ súmūú téĺ yá̰á̰ kə́ súmūú aĺ a?
Nə́ɓā kə́ tɔ́gən i ngá̰ý i nge nujə yá̰á̰ kə́ gōtə́ a?
4Majə aĺ anī, ngání gə̄ rāān̄ i yá̰á̰ kə́ gōtə́ aĺ seneé n
ni əndadə́ ní.
5Ba ré ḭ̄ ī-sāā Nə́ɓā ō, ī-rāā Nə́ɓā kə́ tɔ́gən i ngá̰ý ɓɔ́ ō,
6ré ɔ́jə kadə̄ ḭ̄ i de kə́ rɔ̄kum ō, kə́ súmūú ō anī, ni a a̰a̰ gōí ō,
loo ń ásə ndi tū tə́ ní, ni a téləń yā kadī gogə́ ō.
7Loo ń noō tə́ ndií kə́ kété ō, ndií kə́ ndɔ̄ń tə́ ō ní,
ré deē əndādə́ kadə naā tə́ anī, nge kə́ kété i yá̰á̰ kə́ sḛ́ý beē.
8I beé ní, ngé gə̄ ń ojən̄də́ kem ɓāl̄ kə́ kété tə́ ní, ī-dəjedə́ najə̄ ō,
ī-nēl̄ mbīí ōoń yá̰á̰ ń kaadə́ gə̄ gerə̄n̄ majə ní ō.
9Jḭḭ i de kə́ tagə́bēé laā gə̄ ō, jə-ger̄ yá̰á̰ kógə̄ḿ aĺ ō.
Tɔdɔ̄ ndɔ̄jí gə̄ ń jə-ndiń kə kumjí dɔ nang tə́ ní,
ton̄ i tītə̄ ndíĺ yá̰á̰ kə́ a mān̄ beé.
10Banī nin̄ a ɔjiīn̄ yá̰a̰ ō, a ɔrə̄n̄ najə̄ seí ō.
Nin̄ a əngen̄ najə̄ kemdə́ tə́ yā kəda:
11Mu papirus a əɓa i ndágá kanjə̄ kadə̄ i kum mbō tə́ a?
Tə̄ɓā asə tɔgə kanjə̄ kadə̄ i kum man̄ tə́ a?
12Hútə̄n i tū tə́ ɓáý ō, əjanən̄ aĺ ō anī,
ni tutə kété no mu kə́ rang gə̄ tə́.
13Ngé gə̄ ń dɔdə́ ndígə̄nal Nə́ɓā kɔ̄ɔ́ ní,
yá̰á̰ ń əndān̄ dɔdə́ tə́ kadə̄ rāādə́ ní n noó.
Kəndā kem dɔ tə́ yā nge tɔ́sə̄ najə̄ kə̄ ndágá a oy kɔ̄ɔ́.
14Kem sōl̄ yá̰á̰ kógə̄ḿ aĺ yān ní, kə̄ngōn a tétə̄ rárák kɔ̄ɔ́,
tām̄ kənī kem báŕ báŕ yān to i tītə̄ dəndō súū ngóy.
15Ni ndə̄nā rɔ̄n tū kújə yān tə́ anī, kújə́ yéȳ.
Ni-əhɔ kújə yān adə̄ ngan̄g anī, kújə əsō.
16Ni-ra kum mbang tə́ tītə̄ kāgə̄ kə́ bəton i ngá̰ý rɔ̄n tə́ beé,
adə̄ tə́nī ta jīn gə̄ dɔ ndɔr̄ tá̰a̰ yān tə́.
17Ni tə́la ngəran gə̄ mbo̰ō̰ mbal̄ gə̄ tə́ ō, ngəran gə̄ túdə̄n̄ kə̄ kem bəlo mbal̄ gə̄ tə́ ō.
18Banī ré deē ɔrə̄n kɔ̄ɔ́ loo ń ni-ra tū tə́ ní anī,
loo ní a nējə̄ a əda na ni na n-a̰a̰n nja kógə̄ḿ alé.
19Á̰a̰ā̰, rɔ̄nel̄ kə́ tū yá̰á̰ ń to a ngóōn tə́ ní n noó ō,
kāgə̄ kə́ rang a əɓa tóon tə́ ō.
20Á̰a̰ā̰, de kə́ nge kəndā kumən gíŕ yá̰á̰ kə́ súmūú tə́ rāā kə gōó majə ní,
Nə́ɓā a kídə̄n aĺ ō, Nə́ɓā i nge rāā kə ngé rāā yá̰a̰ majaĺ gēé aĺ ō.
21Ni a rāāī kadə̄ ā ə̄gō ngá̰ý ō, kadə̄ ā ə́ga kɔŕ rɔ̄nel̄ ō.
22Rɔ̄ madə̄ ba̰ā̰í gə̄ a sɔl̄də́ ō,
kújə tandā yā ngé kem ndul gə̄ a gətóo kɔ̄ɔ́ ō.
Currently Selected:
JOB 8: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.