JOB 5
5
1Ī-ɓār̄ ɓār̄ tā! Deē kógə̄ḿ ndi noó yā ndigiī a?
I de kə́ táĺ kə́ rá n ā ī-tūr̄ rɔ̄í kə̄ rɔ̄n tə́ ní?
2Tɔdɔ̄ wōn̄g tɔ̄l̄ de kə́ ɓodə ō, nii tɔ̄l̄ mbóo deē ō.
3A̰á̰ā̰, m-á̰a̰ de kə́ ger̄ yá̰a̰ aĺ loo teē deē tə́.
Banī de gə̄ kə́ kem kújə yān tə́ ní, m-ɔ́r bā̰ā̰ loo ndɔ̄ĺdə́ tə́ alé.
m̄-ndɔ̄ĺdə́ m-ə́da na:
4Ādə̄ deē dḭḭ̄ ngánən gə̄ alé.
Ré ran̄ loo sarya tə́ anī, ādə̄ gāngə̄n̄ sarya dɔdə́ tə́
kanjə̄ kadə̄ deē dḭḭ̄də́
5Ba ni ɓáa, kōō ń sāā ní, ādə̄ nge ɓō əsa!
Ādə̄ nge ɓō aw̄ bátə́ gō tə́ dan kōn̄ gə̄ tə́ ō,
ādə̄ ngé sāā yá̰a̰ pak pak gə̄ əsan̄ yá̰a̰ kənge yān gə̄ kɔ̄ɔ́ malang ō!
6Tɔdɔ̄ yá̰á̰ kə́ nujə sák sák teē i dɔ nang tə́ aĺ ō,
rɔ̄ ndoō kə́ al̄ naā əɓa i nang tə́ aĺ ō.
7A̰á̰ā̰, ojən̄ deē i yā kadə̄ ndi dan ndoō kə́ al̄ naā tə́,
tītə̄ ń hor ndɔ̄bə̄ anī a kə̄rā i kum kə̄ dɔɔ́ ní.
8Mā tā a, i Nə́ɓā n m-ā m-ɔ̄r̄ najə̄ seneé ní ō,
i ni n m-ā m-ɔ́jən najə̄ yāḿ ō ní.
9Nge rāā yá̰á̰ kə́ bo gə̄ kə́ deē asə ger̄ kum aĺ gə̄,
ni ń deē asə tə́da kutə yá̰á̰ kə́ to kɔr kum gə̄ ń ni-rāā ní malang aĺ ní.
10I ni n i nge rāā kadə̄ man̄ edə dɔ nang tə́ ní ō,
nge rāā kadə̄ man̄ edə dɔ ndɔr̄ gə̄ tə́ ō ní.
11I ni n i nge kɔr̄ ngé kəto gírí nang tə́ gə̄ kəndādə́ ta tə́ dɔɔ́ ní ō,
nge rāā kadə̄ rɔ̄ ngé kəhɔ ndoō gə̄ tél nel̄də́ gogə́, tām̄ ajən̄ kɔ̄ɔ́ ní ō.
12Yá̰a̰ gə̄ ń ngé kum kedə̄ ngá̰ý gə̄ rāān̄ loo mundə̄ tə́ ní, ni nujəń kɔ̄ɔ́.
Yá̰a̰ gə̄ ń nin̄ sāān̄ rāā ní nujə jīdə́ tə́ kɔ̄ɔ́.
13I ni n i nge kəhɔ ngé kum kedə̄ gə̄ kə gūmbə̄ kum kedə̄ yādə́ nin̄ kɔ́ gɔ̄ɔ́ ní.
Adə̄ kɔjə̄ yādə́ gə̄ kə́ kə kum kedēé ngá̰ý rāā yá̰á̰ kógə̄ḿ to̰ alé.
14Loo kə́ risə til əgadə́ bə̄dē tə́ dan kadaá.
Nin̄-mámə̄n̄ loo dan kadə ndaá tītə̄ kə́ ndin̄ i ndɔ̄ɔ́ beē.
15Banī ni ajə nge ndoō ta kaskar yādə́ tə́ ō, tadə́ tə́ ō,
ta hēl̄ jīdə́ kə́ tɔ́gən i ngá̰ý tə́ ō.
16Ngé gə̄ ń tɔ́gə́də́ gətóo al̄ naā ní, ni-rāā adə̄ nin̄ tél əndān̄ kemdə́ dɔ yá̰á̰ kógə̄ḿ tə́ ɓáý ō,
ni utə̄ ta ngé rāā yá̰a̰ majaĺ gə̄ malang kɔ̄ɔ́ ō.
17Á̰a̰ā̰, rɔ̄nel̄ i kə deē ń Nə́ɓā ndángən ní.
I beé ní ī-lōō kídə̄ gɔŕyɔ̄ ń Nə́ɓā kə́ tɔ́gən i ngá̰ý gɔŕyɔ̄ī ní.
18I ni n i nge kadə̄ do ō, nge ndem̄ ta do ō ní.
Ni-adə̄ deē do ō, jīn rāā do ní adə̄ idə̄ ō.
19Ni a ɔrī kum yá̰á̰ kə́ to ndíl ka̰ȳ kə́ mehḛ́ gə̄ tə́,
tá kə́ nge ko̰ sīrí tə́ anī, yá̰á̰ kə́ majaĺ a ɔdiī alé.
20Ni a taāī jī yo tə́ dan yā ɓō tə́.
Dan ń rɔ̄ɔ̄ təngā ngá̰ý ní, ni ajiī ta yo kaskar tə́.
21Ndéy ta deē a rāā yá̰a̰ seí alé, tɔdɔ̄ ā ī-ndi loo kə́ ni a rāā yá̰a̰ seí aĺ tə́.
Ré yá̰á̰ kə́ majaĺ teē dɔí tə́ anī, ā ī-sōl̄ yá̰á̰ kógə̄ḿ alé.
22Ā ə̄gō yá̰á̰ kə́ majaĺ kə́ teē dɔí tə́ ō, ā ə̄gō ɓō ō,
ā ī-ɓōĺ dā̰ kə́ do̰ kə́ bembeé gə̄ aĺ ō.
23Ngán kɔkərɔ gə̄ ń a tə́nīn̄ kə̄ kem ndɔ̄r̄ yāí tə́ ō,
dā̰ ngān̄g gə̄ ń a mānə̄n̄ ō ní, a nujən̄ ndɔr̄ yāí alé.
24Ā ī-ndi majə kem kújə yāí tə́.
Ā ī-tél yā kə́nge yá̰a̰ kul̄ yāí gə̄ gogə́ kadə̄ kumdə́ ɔsə naā.
25Ā á̰a̰ā̰ kadə̄ ngání gə̄ i ngá̰ý ō,
ngán kaaí gə̄ a ton̄ tītə̄ mu kə́ dɔ nang tə́ ō.
26Tītə̄ ń kum mbang asə anī ɔyn̄ dɔ kōō aw̄nəń ní,
ā ī-tɔgə ɓə́gá pá tá ā āw̄ ɓádá ɓáý.
27Yá̰á̰ ń jə-ndəle gír dan oy tām̄ tá jə-teē dɔ tə́ ní n noó.
Yá̰á̰ ní to i tītə̄ ń noō rɔ̄kum.
Ōō yá̰á̰ ní, ba ī-ndigə tām̄ yāí tə́.
Currently Selected:
JOB 5: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.