JOB 42
42
Job əda na ger̄ yá̰a̰ yān na asə loon tə́ alé
1Loo ń noō tə́ Job tūr̄ əda Kɔ́ɔ̄ɓē na:
2m̄-ger̄ kadə̄ ásə rāā yá̰a̰ malang ō, yá̰á̰ kə́ núm̄ rāā kə́ dum̄ tɔ́gí gətóo ō.
3Ḭ̄ ə́dá ɓá, ə́da na yá̰a̰ gə̄ ń ī-nóm̄də́ ní, mā na m̄-nāā rāā kadə̄ kumdə́ unjə̄ alé,
tɔdɔ̄ mā na m-ɔ̄r̄ najə̄ yá̰á̰ kə́ m̄-ger̄ aĺ gə̄ kə̄ nja naā tə́.
Rɔ̄kum, m-ɔ̄r̄ najə̄ yá̰á̰ kə́ to loo ɓɔ̄ɔ̄ tə́ gə̄ kə́ tə́lamə̄n̄ mə̄kɔ́ naā tə́ kanjə̄ kadə̄ m̄-ger̄.
4Ḭ̄ ə́dam̄ na kə m-ōō najə̄ kɔrīí, tɔdɔ̄ ta kɔr̄ najə̄ i dɔí tə́.
M-ā m̄-dəjeī najə̄ ō, ā ī-tūrə̄m̄ tə́ ō.
5Kété ní, m̄-gerī i kə ta kūl̄ najə̄ yāí kə́ ədan̄ adə̄ m-ōō ngóy.
Ba ngɔlaā ní, m-á̰a̰ī kə kumḿ.
6Adə̄ m-á̰a̰ rɔ̄ḿ i yá̰á̰ kə́ majaĺ ngá̰ý tə́ ta kumḿ mə̄kɔ́ tə́ ō,
m̄-mbātə́ najə̄ kɔrə̄ḿ mə̄kɔ́ ō.
Adə̄ m̄-ndi kum bumbə́rú tə́ ō, kum bū tə́ ō.
Kɔ́ɔ̄ɓē rāā adə̄ Job tél ndi majə gogə́
7Dan ń Kɔ́ɔ̄ɓē ɔr̄ najə̄ gə̄ ń noō kə Jóbó oy anī, əda Elipaj kə́ Teman na: Wōn̄g rāām̄ seí ō, kə madí kə́ jōó gēé ō. Tɔdɔ̄ sḭḭ̄ ə́daī najə̄ kə́ rɔ̄kum dɔḿ tə́ tītə̄ yā nge kəla yāḿ Job alé. 8Ba ń toō ɓáa ə́hɔī man̄g kə́ bəra gə̄ sīrí ō, bal batə̄ gə̄ sīrí ō, ba āw̄ ə́ngeī nge kəla yāḿ Job. Ī-tɔ̄lī dā̰ gə̄ ń noō ī-tunīdə́ kə taá malang tām̄ yá̰á̰ kə́ gōtə́ aĺ ń ī-rāāī tə́ ní ō, ādə̄ nge kəla yāḿ Job ndɔ̄ȳ Nə́ɓā tām̄ yāsí tə́ ō. Ré m̄-rāāsí yá̰á̰ kə́ tōr̄ tām̄ kɔ̄r̄ yāsí tə́ aĺ anī, i najə̄ yā nge kəla yāḿ Job tə́. Tɔdɔ̄ sḭḭ̄ ə́daī najə̄ kə́ rɔ̄kum dɔḿ tə́ tītə̄ nge kəla yāḿ Job alé.
9Elipaj kə́ Teman ō, Bildad kə́ Suwa ō, Sopar kə́ Naama ō, aw̄ rāān̄ yá̰á̰ ń Kɔ́ɔ̄ɓē ədadə́ ní ō, Kɔ́ɔ̄ɓē ndigə ndɔ̄ȳ yā Job ō.
10Dan ń Job ndɔ̄ȳ Nə́ɓā tām̄ yā madə̄n gə̄ tə́ oy anī, Kɔ́ɔ̄ɓē rāā adə̄ ni-tél ndi majə gogə́. Yá̰á̰ ń Job ənge kété ní, Kɔ́ɔ̄ɓē rāā adə̄ ni-tél ənge gogə́ loo nja tə́ jōó. 11Loo ń noō tə́ ngákó̰o̰ Job kə́ dəngam gə̄ ō, kə́ dəyá̰ gə̄ ō, de gə̄ malang ń ger̄nən̄ kété ní ō, reēn̄ go̰ō̰n tə́. Nin̄ əsan̄ yá̰a̰ seneé kem kújə yān tə́. Nin̄ nōōnən̄ ō, sɔlə̄n̄ kemən najə̄ yá̰á̰ kə́ to kum kaȳ aĺ gə̄ malang ń Kɔ́ɔ̄ɓē rāā adə̄ reē dɔn tə́ ní ō. Nin̄ adə̄nən̄ kesita#42.11 Kesita kógə̄ḿ i nar gír batə̄ kógə̄ḿ. kógə̄ḿ kógə̄ḿ kə dɔdə́ gēé ō, nə̄ngá lɔ́ŕ kógə̄ḿ kógə̄ḿ kə dɔdə́ gēé ō, kadə̄ karī tə́.
12Kɔ́ɔ̄ɓē rāā majə kə Jóbó ngá̰ý tɔȳ kə́ kété. I beé n Job əngeń batə̄ gə̄ dūbú kutə gidə i sɔ́ ō, jámbal gə̄ dūbú mehḛ́ ō, man̄g kə́ bəra gə̄ jōó jōó nja dūbú ō, kó̰o̰ kərō gə̄ dūbú ō ní. 13Ni ojə ngán kə́ dəngam gə̄ sīrí ɓáý to̰ ō, kə́ dəyá̰ gə̄ mətá ɓáý to̰ ō. 14Ni-əndā rī ngōnən kə́ dəyá̰ kə́ ta kəga dɔ na i Yemima ō, rī nge kə́ ko̰ jōó na i Kesiya ō, rī nge kə́ ko̰ mətá na i Keren Hapuk ō#42.14 Yemima, Kesiya, Keren Hapuk: Yemima ní kumən na i dér dum. Kesiya ní kumən na i hútə̄ kāgə̄ kanel. Keren Hapuk ní kumən na i jóo ngɔ̄m̄ yá̰á̰ súū rɔ̄. Dér dum i yel̄ kə́ ɔjə kum gotə háĺ kə́ sɔl̄ lɔ́ḿ lɔ́ḿ ō, yá̰á̰ kə́ nel̄ deē ngá̰ý ō, yá̰á̰ kə́ unjə̄ njáý njáý ō. Kanel i ndujə̄ yá̰á̰ kə́ otə majə kə́ rāān̄ i kə ngɔ́ɔ kāgə̄ kógə̄ḿ.. 15Deē ənge dəyá̰ gə̄ kə́ mandən̄ tītə̄ ngán Job kə́ dəyá̰ gə̄ beé kem ɓēé aĺ ō, bɔbə̄də́ kēgə̄ yá̰a̰ kənge yān adə̄də́ tītə̄ ń adə̄ń ngákó̰ó̰də́ kə́ dəngam gə̄ ní ō.
16Gō yá̰a̰ gə̄ ń noō tə́ ní, Job rāā ɓāl̄ ɓú kə kutə sɔ́ ɓáý. Ni a̰a̰ ngán kemən gə̄ ō, ngán kaan gə̄ ō, kaa gugūn gə̄ ō, kaa dɔgən gə̄ ō. 17Gō tə́ anī, Job rāā ɓāl̄ ngá̰ý adə̄ tɔgə ɓə́gá pá tá kadə̄ oy ɓáý.
Currently Selected:
JOB 42: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.