JOB 31
31
Job tūr̄ əda na: M-āw̄ m̄-ra no Nə́ɓā tə́ ō, dɔḿ i dɔɔ́ ō
1J-oō naā jḭḭ kə kumḿ, kadə̄ m-ə̄ndā kumḿ dɔ ngōmandə kə́ ger̄ dəngam aĺ tə́.
2Ré i beé aĺ ní m-ā m-ə̄ndā kemḿ i dɔ kənge rí tə́
jī Nə́ɓā kə́ tɔ́gən i ngá̰ý ń ndi dɔɔ́ tə́ ní?
3Nujə sák sák i tām̄ yā de kə́ nge rāā háĺ tə́ aĺ a?
Kɔ́l a əsō i gō ngé rāā yá̰a̰ majaĺ gə̄ tə́ aĺ a?
4Hálə́ḿ mā ní, ni a̰ā̰ aĺ a?
Ni tə́da kutə njaḿ ń m̄-njə̄rań ní malang aĺ a?
5Ní, sor̄ i madə̄ njə̄rāḿ a? m̄-nāgə́ láẃ kadə̄ m-āw̄ m̄-ɓogə a?
6Ādə̄ Nə́ɓā mbɔ̄jə́ kɔȳḿ kə yá̰a̰ mbɔ̄jə́ kɔȳ yá̰a̰ kə́ gōtə́.
Loo ń noō tə́ ní, a ger̄ kadə̄ najə̄ gətóo dɔḿ tə́.
7Ré róbə́ ń ni njar ní njaḿ əya̰ kɔ̄ɔ́ ō, ré kemḿ un gō kumḿ ō,
ré yá̰á̰ kə́ yḛr kógə̄ḿ tákə̄ jīḿ ō anī,
8ādə̄ yá̰á̰ ń m̄-dubə̄ ní de kə́ rang əsa, aĺ anī ādə̄ ró̰ȳn̄ kōō yāḿ kɔ̄ɔ́!
9Ré kemḿ gḛy dəyá̰ kə́rēý tām̄ majən tə́,
adə̄ m̄-rā m-ūmən ta kújə yā madə̄ ɓēḿ tə́ anī,
10ādə̄ nə̄yá̰ḿ ur yá̰a̰ adə̄ de kə́ rang ō, ādə̄ de kə́ rang gə̄ ɓīīn̄ seneé ō.
11Tɔdɔ̄ nge ń noō ní m̄-rāā i yá̰á̰ kə́ majaĺ ngá̰ý ō,
kə́ to yḛr kum kə́ ngé gān̄g sarya gə̄ a gāngə̄n̄ sarya dɔ tə́ ō.
12Nge ń noō i hor kógə̄ḿ kə́ a o̰o̰m̄ bátə́ kem bəlo kə́ bo tə́ ō,
i hor kógə̄ḿ kə́ a nujə yá̰a̰ malang ń m-ə́ngé ní kɔ̄ɔ́ ō.
13Dan ń nge kəla yāḿ kə́ dəngam, aláa kə́ dəyá̰,
reē nōō rɔ̄n rɔ̄ḿ tə́ tām̄ najə̄ kə́rēý kə́ to dɔ dáńjí tə́ seneé tə́ ní,
yá̰á̰ ń najə̄n i yādə́ ní, mā m̄-ɓōĺ gidə ngándáńg.
14Ré i beé aĺ ní, dan ń Nə́ɓā a əndā najə̄n dɔḿ tə́ ní,
m-ā m-ə́da na i rí?
Dan ń ni a dəje najə̄ kə́ dɔ tə́ ní, m-ā m̄-tél yā kədan na i rí?
15Deē ń rāām̄ kem kó̰ó̰ḿ tə́ ní, rāādə́ nin̄ ō aĺ a?
I Nə́ɓā kə́ kógə̄ḿ beē n rāājí kem kó̰ó̰jí gə̄ tə́ ní.
16Nja kógə̄ḿ m̄-mbātə́ rāā yá̰á̰ kə́ ngé ndoō gə̄ dəjemə̄n̄ a?
m̄-rāā dəyá̰ kə́ ngaa koy adə̄ kumən tō ndoō a?
17Yá̰a̰ kəsa kə́ tām̄ yāḿ tə́ ní, m-ə́sa kə́ kérə́ḿ
kanjə̄ kadə̄ m̄-kēgə̄ m-ādə̄ ngōn̄ hal a?
18Tá əla gír kə ngōn̄ dūúḿ beē n m-ə̄tōń ngōn̄ hal tītə̄ ngōn̄ kemḿ beē adə̄ tɔgə ní.
Nəkɔ́ ń jóo toó m-ā m-ādə̄ i dəyá̰ kə́ ngaa koy kɔjə̄.
19M-á̰a̰ nge rɔ̄ tō ndoō kə́ nal̄ kūbə̄,
de kə́ ndoō kə́ ənge yá̰á̰ kə́ yā kənī dɔn tə́ alé,
20kanjə̄ kadə̄ ni tɔ́r̄ tan dɔḿ tə́
najə̄ kūbə̄ kə́ rāā kə bḭḭ̄ batə̄ yāḿ kə́ m-ādə̄n tə́ a?
tām̄ loo təngān hɔy i kə ta kūl̄neé.
21Ré m-ún jīḿ kə́ ɓir̄ kə̄ dɔɔ́ yā kəndań ngōn̄ hal,
tām̄ m̄-ger̄ kadə̄ ngé sarya gə̄ ndigən̄ najə̄ gōḿ tə́ anī,
22ādə̄ kār̄ bɔ̄gə̄ḿ ɔr̄ ta naā tə́ ō, ādə̄ jīḿ ɔr̄ kɔ̄ɔ́ ta kílə́ḿ tə́ ō.
23A̰ á̰, kété ní m̄-ɓōĺ ndéy jī Nə́ɓā ngá̰ý.
Ni i kə bo adə̄ m̄-rā ta kumən tə́ anī, m-ásə rāā yá̰á̰ kógə̄ḿ alé.
24Ré m-ə̄nī kemḿ mámák m-ādə̄ lɔ́r ō,
m-ə́da lɔ́ŕ kə́ unjə̄ njáý njáý najə̄ ń m-ə́da na m̄-ndi kə kūlīí adə̄ m̄-sōl̄ yá̰a̰ alé ō,
25Ré i yá̰a̰ kənge yāḿ kə́ ngá̰ý n i rɔ̄nel̄ yāḿ ō,
i yá̰á̰ ń m-ə́ngé ngá̰ý kə ta kūl̄ jīḿ ní n i rɔ̄nel̄ yāḿ ō,
26ré m-á̰a̰ loo kə́ unjə̄ kow kə́ ndə́lē ō, nāā kə́ ndaa ngóńg ngóńg loo njə̄rā tə́ ō,
27ba nelə̄m̄ sedə́ kemḿ tə́ loo mundə̄ tə́ ō,
m̄-rāādə́ i nə́ɓā yāḿ gə̄ tə́ ō, m̄-rɔȳńdə́ ō anī,
28nge ń noō m̄-rāā i yá̰á̰ kə́ majaĺ ngá̰ý ō, kə́ nge gān̄g sarya yāḿ a gān̄g sarya dɔ tə́ ō.
Tɔdɔ̄ nge ń noō i nējə̄ kə́ m̄-nējə̄ m-ə́da na Nə́ɓā kə́ dɔɔ́ i Nə́ɓā yāḿ alé.
29m̄-rāā rɔ̄nel̄ najə̄ nujə kə́ madə̄ ba̰ā̰ḿ nujə sák sák kɔ̄ɔ́ tə́ a?
Dan ń yá̰á̰ kə́ to kum kaȳ aĺ teē dɔn tə́ ní m̄-rāā walya a?
30Mā m-ə́ya̰ taḿ adə̄ rāā majaĺ seneé alé, m̄-ndə̄ngān yo alé.
31I náā n m-ādə̄n dā̰ adə̄ əsa asə tan aĺ ní?
Mbā gə̄ ədan̄ nge ń noō ō aĺ a?
32M-ə́ya̰ mbā adə̄ ɓīī ndágá alé, tɔdɔ̄ m̄-tḛḛ̄ ta róbə yāḿ gə̄ m-ādə̄n.
33m̄-ɓɔ̄ɔ̄ dɔ majaĺ yāḿ gə̄ tītə̄ ń Adam rāań kété ní a?
m̄-mundə̄ dɔ yá̰a̰ kə́ gōtə́ aĺ kemḿ tə́ a?
34m̄-rāā nge ń noō i tām̄ ɓōĺ kə́ m̄-ɓōĺ gír̄ yā kósə de gə̄ tə́ ō,
tām̄ kídə̄ kə́ gír kojə gə̄ kídə̄mə̄n̄ adə̄ ɓōĺ rāām̄ ngá̰ý tə́ ō,
adə̄ m̄-ndi kə taḿ kə́ mbóó ō, m̄-teē ndágá aĺ ō a?
35I náā n a adə̄m̄ de kə́ kadə̄ oō najə̄ yāḿ ní?
Ta tɔ̄l̄ ta najə̄ yāḿ n noó.
Ādə̄ Nə́ɓā kə́ tɔ́gən i ngá̰ý tūrə̄m̄ najə̄ tə́!
Ba makətūbə̄ ń madə̄ kɔ̄lə̄ḿ ndang sekə́məń ní tā anī,
36m-ā m-ə̄tōn dɔ bɔ̄gə̄ḿ tə́,
m-ā m-ə́lan dɔḿ tə́ tītə̄ jākā mbang beé.
37A̰á̰ā̰, m-ā m-ɔ́jə́ Nə́ɓā tóo njaḿ gə̄.
M-ā m-āw̄ kə̄ rɔ̄n tə́ i tītə̄ ngōn̄ mban̄g beé.
38Ré dɔ nang yāḿ mbātə́ najə̄ gōḿ tə́ ō,
ré nán̄g ta kɔsə kə́ tū tə́ gə̄ nōōn̄ kə man̄ kumdə́ ō,
39ré m-ə́sá yá̰á̰ kə́ tū tə́ kanjə̄ kadə̄ m-ādə̄ yá̰á̰ gírí,
tɔdɔ̄ m̄-rāā kum kɔ́ɔ̄n ndoō tə́ anī,
40ādə̄ kōn̄ tɔgə dɔ nang yāḿ tə́ kum gotə gémē ō,
bar̄ tɔgə tū tə́ kum gotə kōō ɔ́rjə ō. Gír najə̄ yā Job gān̄g loo ń toō tə́.
Currently Selected:
JOB 31: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.