JOB 27
27
Job tūr̄ əda kə tɔ́gɔ́ na ké deē ń rāā yá̰á̰ kə́ gōtə́ aĺ ní ké a ɓāŕ Nə́ɓā wa
1Job un ta kɔr̄ najə̄ yān kə míndə́ kə́ kə gōsōó əda na:
2m̄-túbə kə Nə́ɓā ń ndi kə kumneé ní, ni ń mbātə́ ger̄ yá̰á̰ kə́ gōtə́ yāḿ ní.
m̄-túbə kə Nə́ɓā kə́ tɔ́gən i ngá̰ý, ni ń rāā adə̄ rɔ̄ḿ atə̄m̄ ngá̰ý ní.
3Dan ń m-ásə taā koō ɓáý ō, koō yā Nə́ɓā i kónə́ḿ tə́ ɓáý ō ní,
4yá̰á̰ kə́ rɔ̄kum aĺ ní, taḿ a əda aĺ bátə́ ō, ta ndo̰o̰ḿ a gól̄ loo aĺ bátə́ ō.
5Ré m-ə́da na najə̄ yāsí na i gōtə́ anī, ādə̄ yá̰á̰ kə́ tōr̄ rāām̄.
M-ā m-ə́da na najə̄ gətóo dɔḿ tə́, bátə́ kadə̄ m-óyń.
6m̄-ra ngan̄g dɔ yá̰á̰ kə́ gōtə́ yāḿ tə́, m-ā mə́ya̰ alé!
Kemḿ rāām̄ najə̄ yá̰á̰ kógə̄ḿ kə́ gōtə́ aĺ kə́ m̄-rāā tə́ alé.
7Ādə̄ yá̰á̰ ń rāā nge kem ndul ní rāā madə̄ ba̰ā̰ḿ,
ādə̄ yá̰á̰ ń rāā nge rāā yá̰a̰ majaĺ ní rāā nge rɔ̄ɔ̄ḿ!
8Dan ń Nə́ɓā gān̄g ta ndɔ̄ yā nge rāā yá̰a̰ gōtə́ aĺ kɔ̄ɔ́,
aláa ɔr̄ koōn kɔ̄ɔ́ ní, ni a əndā kemən i dɔ rí tə́ ɓáý?
9Dan ń wur kɔl a əsō dɔn tə́ ní, Nə́ɓā a oō nōō yān a?
10Ré ni-ənge rɔ̄nel̄ yān i rɔ̄ Nə́ɓā kə́ tɔ́gən i ngá̰ý tə́ anī,
a ndɔ̄ȳ Nə́ɓā i kə kum mbang gə̄ malang.
11M-ā m-ɔ́jə́sí yá̰á̰ ń Nə́ɓā rāā ní,
yá̰á̰ ń Nə́ɓā kə́ tɔ́gən i ngá̰ý gír̄ ní, m-ā m̄-mundə̄sí alé.
12Dan ń sḭḭ̄ malang á̰a̰ī kadə̄ i rɔ̄kum ní,
ɔ̄rī najə̄ kə́ kanjə̄ kumən i tām̄ rí tə́?
Yá̰á̰ kə́ majə kə́ to dan i ngá̰ý alé
13Yá̰á̰ ń Nə́ɓā núm̄ rāā kə nge kem nduluú ō,
yá̰a̰ ndəbā ń de kə́ nge rāā de gə̄ yá̰á̰ kə́ tōr̄ a ənge jī Nə́ɓā kə́ tɔ́gən i ngá̰ý tə́ ō ní n toó:
14Ré ngánən gə̄ ojən̄ naā ngá̰ý anī, rɔ̄ɔ̄ a tɔ̄ldə́ kɔ̄ɔ́ ō,
ngán kaan gə̄ a nalə̄n̄ yá̰a̰ kəsa ō.
15Ngé gə̄ ń a teēn̄ ta yo tə́ ní, mo̰y ngāl̄bɔ̄gīí a tɔ̄l̄də́ kɔ̄ɔ́ ō,
nə̄yá̰də́ gə̄ a asən̄ nōōdə́ aĺ ō.
16Ré ni kán̄ nar kə̄ dɔ naā tə́ ngá̰ý tītə̄ bumbə́ru gə̄gē anī,
ré ni kán̄ kūbə̄ gə̄ kə̄ dɔ naā tə́ ngá̰ý tītə̄ nánjə gə̄gē anī,
17ādə̄ kán̄də́ kə̄ dɔ naā tə́, tɔdɔ̄ i de kə́ gōtə́ n a o̰ō̰də́ ō,
i de kə́ sew n a ɔy nar ní ō ní.
18Kújə rāān ngan̄g aĺ tītə̄ dəndō beé,
ngan̄g aĺ tītə̄ dabə ngɔm̄ yā nge kum̄ loo beé.
19Ni to nang tə́ kə́ loo de kə́ nge kənge yá̰á̰ tə́, banī i ta tɔ̄l̄ ta.
Dan ń ni teē kumən anī, yá̰a̰ gətóo kɔ̄ɔ́.
20Yá̰á̰ kə́ to ndíl ka̰ȳ gə̄ reēn̄ kə̄ dɔn tə́ tītə̄ bəngál man̄ beé.
Nél māĺ kógə̄ḿ unən ndɔ̄ɔ́ aw̄ seneé kɔ̄ɔ́.
21Néĺ kə́ təngā kə́ dūn̄ ɓē tə́ unən aw̄ seneé kɔ̄ɔ́,
nél ɔrə̄n ɓē yān tə́ aw̄ seneé.
22Urnən̄ kanjə̄ ka̰a̰ kum tō ndoō yān,
ba ni-əhɔ rɔ̄n tɔgə yā teē kɔ̄ɔ́ ta jī nge kur gərā tə́.
23Dan ń ni nujə sák sák kɔ̄ɔ́ anī, de gə̄ əndan̄ jīdə́ ɓur ɓur ō,
Kɔ̄rə́n̄ ngél rɔ̄nel̄ dɔn tə́ kem kújə yān nəkɔ́ tə́ ō.
Currently Selected:
JOB 27: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.