JOB 24
24
Job tūr̄ əda kə tɔ́gɔ́ na Nə́ɓā əya̰ ngé kem ndul gə̄ adə̄ rāān̄ yá̰á̰ ń kemdə́ gḛy ní
1Nə́ɓā kə́ tɔ́gən i ngá̰ý ɔr̄ ndɔ̄ gə̄ əndādə́ dɔ jīn aĺ ō,
deē yān gə̄ a̰a̰n̄ ndɔ̄ yān gə̄ ní aĺ ō, i tām̄ rí tə́?
2De gə̄ ndɔ́tə̄n̄ kə dɔ nin̄ ndɔr̄ gēé kum kə̄ gogə́ ō,
aw̄n̄ kə ɓūtə̄ yá̰a̰ kul̄ kə́ ɓogə gēé dɔ mu tə́ ō.
3I kərō yā ngōn̄ hal n əhɔ aw̄n̄neé ní ō,
i man̄g yā dəyá̰ kə́ ngaa koy n əhɔn̄ ta kə̄rā tə́ ní ō.
4Tə̄ɓān̄ ngé rɔ̄ tō ndoō gə̄ kɔ̄ɔ́ kum róbó ō,
yá̰á̰ ń kadə̄ ngé ndoō kə́ kem ɓēé gə̄ rāān̄ ní,
i kadə̄ nin̄ ɓɔ̄ɔ̄n̄ rɔ̄də́ kɔ̄ɔ́ ngóy ō.
5Nin̄ ton̄ i tītə̄ kərō kə́ bembeé gə̄ kə́ ran̄ kem dəla loo tə́ beē.
A aw̄n̄ kəlaá i kə gír looí ɓatə yā sāā yá̰a̰ kəsa kə́ tām̄ yādə́ tə́.
Nin̄ a əngen̄ yá̰a̰ kəsa kə́ tām̄ yā ngáńdə́ gə̄ tə́ i kem kə̄sā gə̄ tə́.
6Nin̄ sāān̄ mu bembeé tām̄ yādə́ nin̄ kɔ́ gə̄ tə́ ō,
ɓurən̄ gotə kan̄ nduú kem ndɔr̄ yā nge kem ndul tə́ ō.
7Ndɔ̄ɔ́ anī nin̄ ton̄ i rɔ̄də́ karī sɔɔ̄ń kūbə̄ kə́ gətóo ō,
dan ń kūl̄ o̰o̰ anī, bájo kə́ kadə̄ selə́n̄ dɔdə́ tə́ gətóo ō.
8Man̄ kə́ edə dɔ mbalá əndadə́ adə̄ nɔ̄l̄ kūbə̄ yādə́.
Nin̄ əhɔn̄ kadə mbal̄ gan̄g ran̄neé,
tɔdɔ̄ loo kə́ yā kadə̄ nin̄ ɓɔ̄ɔ̄n̄ rɔ̄də́ tū tə́ gətóo.
9Ɔrə̄n̄ ngōn̄ hal kɔ̄ɔ́ ta mba tə́ kadə kó̰o̰n tə́ ō,
əhɔn̄ yá̰a̰ yā nge ndoō gíŕ yá̰á̰ kə́ tə̄nā tə́ ō.
10Ɔgə̄nən̄ kūbə̄ yān kɔ̄ɔ́ adə̄ njə̄rā i rɔ̄n karī ō,
adə̄n̄ de kə́ ɓō rāādə́ gə̄ ətōn̄ dɔ do̰ō̰ kōō kə ɓōó ō.
11Nin̄ usən̄ kan̄ olibə kə mbalá kadə̄ a̰ȳ yibə̄ kem ndogə̄ yā madə̄də́ gə̄ tə́ ō,
rāān̄ kasə kan̄ kāgə̄ nduú kanjə̄ kadə̄ ɔdə tadə́ ō.
12De kə́ kem ɓēé gə̄ nōōn̄ rɔ̄də́.
Ngé gə̄ ń əngen̄ do ní, kɔŕ kə́ dan gān̄g aĺ yādə́ rāā rɔ̄n i ɓāŕ kə́ nin̄ a ɓārə́n̄ yá̰a̰
kadə̄ rāān̄ sedə́ tə́.
Ba usə Nə́ɓā dɔ yá̰á̰ kə́ majaĺ ngá̰ý gə̄ ń noō tə́ alé!
13Ngé rāā yá̰a̰ gə̄ ń noō i ngé mbātə́ najə̄ gō loo kə́ unjə̄ kow tə́ gə̄.
Nin̄ gerə̄n̄ róbə gə̄ ń loo kə́ unjə̄ kow i tū tə́ ní aĺ ō, njə̄rān̄ dɔ róbə gə̄ ní tə́ aĺ ō.
14Dan ń loo a rāā yā tīī anī, nge tɔ̄l̄ deē ḭḭ dɔɔ́,
ni tɔ̄l̄ nge ndoō ō, de kə́ nge rɔ̄ tō ndoō ō.
Ba ndɔ̄ɔ́ anī, ni-rāā yá̰á̰ kə́ de kə́ nge ɓogə tə́.
15Ngaa dəyá̰ kə́ nge sāā dəyá̰ loo kaya tə́ a ngóō i loo kə́ to pit pit.
Ni-əda na: Deē a a̰a̰m̄ alé.
Loo ń noō tə́ ni utə̄ ta kumən kə kūbūú kɔ̄ɔ́.
16Ndɔ̄ɔ́ anī, nge ɓogə túdə̄ kə̄ kem kújə gə̄ tə́.
Kadaá anī, ni utə̄ ta kújə dɔn tə́ kɔ̄ɔ́ ō,
ni ger̄ yá̰á̰ ń i loo kə́ unjə̄ kow ní aĺ ō.
17Ta gír loo i loo kə́ risə til nding tām̄ yā de gə̄ ń noō tə́ malang.
Banī ɓōĺ kə́ ngá̰ý ń loo kə́ risə til nding a əla kem nge kɔy yá̰a̰
yā de gə̄ dɔ gúú tə́ ní ndérən kɔ̄ɔ́.
18Ni-ḭḭ kal dɔɔ́ tītə̄ kə́ to i dɔ man̄ tə́ beē.
De kə́ kem ɓēé gə̄ ndɔ̄lə́n̄ loo yān.
Banī ni un róbə́ kə́ ta kaw̄ kə̄ ndɔr̄ ń kāgə̄ nduú i tūtə́ ní tə́ to̰ alé.
19Dɔ nang kə́ tutə káḿ káḿ ō, loo təngā ō,
rāān̄ adə̄ man̄ néjə#24.19 Néjə: Á̰a̰ī 2 Sam 23.20 gə̄ iin̄ kɔ̄ɔ́ malang.
Adə̄ de gə̄ ədan̄ na i tītə̄ ń noō n loo kə́ ɓádá a urəń nge rāā yá̰a̰ majaĺ ní.
20Dɔ dəyá̰ ń ndānən kemən tə́ ní ndígə̄nalən kɔ̄ɔ́,
banī ni i yá̰a̰ kəsa kə́ nel̄ tām̄ yā kəde gə̄ tə́, əga kem deē dɔn tə́ to̰ alé.
Tetən̄ yá̰a̰ rāā kə́ gōtə́ aĺ i tītə̄ loo tetə kāgə̄ beé.
21Ni-rāā dəyá̰ kə́ kujə majaĺ ō,
rāā kem ndaa kə dəyá̰ kə́ ngaa koyoó aĺ ō.
22Banī Nə́ɓā ń ɔy de kə́ ngan̄g gə̄ aw̄ sedə́ kɔ̄ɔ́ dɔ gúú tə́ ní,
ḭḭ ra dɔɔ́ anī, deē yājí ngeé ń toō əndā kemən dɔ ndin kə kumneé tə́ to̰ alé.
23Ɓá tā ba Nə́ɓā əya̰n adə̄ ra ngan̄g ō,
ndi loo yān jəke kanjə̄ sōl̄ yá̰á̰ kógə̄ḿ ō,
banī ni-əndā kumən gíŕ hál de kə́ rang gə̄ tə́.
24Ɔsən̄də́ kə̄ dɔɔ́ i kum mbang kə́ sḛ́ý beē tə́, ba gō tə́ anī gətóon̄ kɔ̄ɔ́.
Nin̄ tə́sō tétə̄n̄ tītə̄ de gə̄ malang ń əjan̄də́ tītə̄ loo kəja kōō beé ní ō,
a əjan̄də́ i tītə̄ loo kəja dɔ kōō beé ō.
25Yá̰á̰ ń m-ə́dá ní i yá̰á̰ kə́ rɔ̄kum!
I náā n asə kɔjə kadə̄ najə̄ kɔrə̄ḿ i najə̄ kə́ kanjə̄ kumən ní?
Currently Selected:
JOB 24: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.