JOB 22
22
Elipaj əda na Job na rāā yá̰á̰ kə́ gōtə́ aĺ rɔ̄kum
1Loo ń noō tə́ Elipaj kə́ Teman ɔr̄ najə̄ əda na:
2Deē ndul asə rāā yá̰á̰ kógə̄ḿ kə́ majə tām̄ yā Nə́ɓā tə́ a?
Ni asə rāā yá̰á̰ kógə̄ḿ kə́ majə tām̄ yā rɔ̄n nəkɔ́ tə́ i dan ń kumən edə̄ ní.
3Háĺ kə́ gōtə́ yāí nel̄ Nə́ɓā kə́ tɔ́gən i ngá̰ý a?
Ré ī-tūr̄ hálí anī, ni a ənge i rí gírí?
4Najə̄ kə́ yā kunəń najə̄ dɔn tə́ kɔ̄ɔ́ ń ni a ɔr̄ seí ō,
kaw̄ ń ni-aw̄ seí saryaá ō ní, ɔjə kadə̄ ni ɓōlíī i mbée a?
5Rɔ̄kum, kem ndul yāí i ngá̰ý, ta ngóy yá̰a̰ rāāí kə́ gōtə́ aĺ gə̄ gətóo.
6Ḭ̄ ī-taā yá̰a̰ tə̄nā yá̰a̰ jī ngákó̰ó̰í tə́ kanjə̄ kumən,
ī-táā kūbə̄ yān kə́ kal kógə̄ḿ beé jīn tə́.
7Deē ń kəndā man̄ rāān ní, ḭ̄ ādə̄n man̄ ō,
deē ń ɓō rāān ní, ḭ̄ ɔ̄gən yá̰a̰ kəsa ō.
8Deē ń a o̰o̰ ɓē i kə tɔ́gɔ́ ní ənge dɔ nang ō,
deē ń de gə̄ ndigən̄ najə̄ yān ngá̰ý ní n ndi tū tə́ ō ní.
9Ḭ̄ ī-tə̄ɓā dəyá̰ kə́ ngé ngaa koy gə̄ adə̄ aw̄n̄ kɔ̄ɔ́ jīdə́ karī ō,
ḭ̄ ī-rāā kum ngán hal gə̄ ndoō tə́ ō.
10I tām̄ najə̄ ń noō tə́ n əyān̄ gūmbə̄ adə̄ gīr̄ gidií ō,
ɓōĺ kə́ ngá̰ý nujə kemií gidə kógə̄ḿ ō ní.
11Aĺ ɓáa, i loo kə́ risə til nding adə̄ á̰a̰ loo to̰ aĺ ō,
i man̄ kə́ ngá̰ý kə́ un dɔí kɔ̄ɔ́ ō.
12Nə́ɓā ndi i dɔɔ́ dɔ rā̰ tə́ aĺ a?
Á̰a̰ no rā̰ ń tə́yō̰ gə̄ ndangən̄ ngururu tū tə́ ní,
i dɔɔ́ sa̰y ngá̰ý rɔ̄kum.
13Loo ń noō tə́ ɓáa, ə́da na ké i rí n Nə́ɓā asə ger̄ wa,
ké ni asə ka̰a̰ loo kum kil̄ man̄ kə́ risə til nding tə́ yā rāań sarya sejí wa.
14Kil̄ man̄ gə̄ na utə̄n̄ ta kumən kɔ̄ɔ́, adə̄ na asə ka̰a̰ loo alé.
Ni na njə̄rā a gīr̄ na i gidə dɔ rā̰ ngóy.
15I beé ní, ī-ndigə kun róbə́ kə́ jóó ń
de kə́ háĺdə́ nujə kɔ̄ɔ́ gə̄ unən̄ ní a?
16Ɔyn̄də́ aw̄n̄ sedə́ kété kɔ̄ɔ́ no ndɔ̄də́ tə́.
Gír gisədə́ i tītə̄ man̄ bā kə́ a nugə̄ beé.
17Nin̄ ədan̄ Nə́ɓā na kə tūr̄ gidən kɔ̄ɔ́ tadə́ tə́!
Ké Nə́ɓā kə́ tɔ́gən i ngá̰ý a rāā i rí sedə́ wa.
18Tá i ni n i nge rāā kadə̄ ndin̄ majə kem kújə yādə́ tə́ ní.
Banī ni-əda na: Ādə̄ yá̰á̰ kə́ rāā loo mundə̄ tə́ yā ngé tɔ̄l̄ de gə̄ i rɔ̄ḿ tə́ ngɔr alé.
19De kə́ gōtə́ gə̄ a a̰a̰n̄ anī a rāān̄ rɔ̄nel̄.
De kə́ rɔ̄kum a əgōdə́ ba a əda na:
20Á̰a̰ī, nujən̄ madə̄ ba̰ā̰jí gə̄ sák sák kɔ̄ɔ́,
yá̰a̰ gə̄ ń nin̄ əngen̄ ní, hor o̰o̰ kɔ̄ɔ́!
21I beé ní, ī-tél ə̄ndā najə̄ yāí naā tə́ kə Nə́ɓāá ō,
ī-rāā ādə̄ lɔm to mbo̰ō̰sí tə́ seneé ō.
I beé n ā ī-téləń yā ndi majə gogə́ ní.
22I beé ní ī-taā yá̰á̰ ndóō kə́ tan tə́ ō,
ādə̄ najə̄ yān əhɔ kemií ō.
23Ré ī-tél ī-reē rɔ̄ Nə́ɓā kə́ tɔ́gən i ngá̰ý tə́ anī,
ni a tél yā rāā kadə̄ ī-ndi majə gogə́.
Yá̰a̰ malang ń i yá̰á̰ kə́ gōtə́ aĺ ní, ɔ̄rən ɓēé looí kɔ̄ɔ́ āw̄ seneé sa̰y.
24Gō tə́ anī, ə̄nī lɔ́r kum bumbə́rú tə́ ō,
ə̄nī lɔ́ŕ kə́ Opir kɔ̄ɔ́ dan kɔkərɔ gə̄ kə́ kum wól man̄ dɔ mbal̄ tə́ ō.
25I Nə́ɓā kə́ tɔ́gən i ngá̰ý n i lɔ́r yāí ō,
i ni n i gində̄ arjā̰a̰ yāí kə́ kán̄ dɔ naā tə́ ngá̰ý ní ō.
26Tɔdɔ̄ i loo ń noō tə́ n ā ī-rāā Nə́ɓā kə́ tɔ́gən i ngá̰ý rɔ̄nel̄ yāí kə́ al̄ naā tə́ ní ō,
ā ɔ̄r̄ dɔí dɔɔ́ yā ka̰a̰ loo kum kə̄ rɔ̄ Nə́ɓā tə́ ō ní.
27Dan ń ā ī-rāān ɓɔ́ anī, ni a oō nōō yāí ō,
yāí i kadə̄ ī-rāā yá̰á̰ ń ə̄nī ndūí yā rāā ní ngóy ō.
28Ré ī-gḛy rāā yá̰á̰ kógə̄ḿ anī, yá̰á̰ ní a udə róbó majə ō,
loo a unjə̄ kow dɔ róbə yāí tə́ ō.
29Ré tɔ́gə́ ngé kə́rēý gə̄ gətóo anī, ā ásə kədadə́ na kə ḭḭn̄ dɔɔ́!
Tɔdɔ̄ ni ajə deē ń əla dɔn nang tə́ ní.
30Deē ń najə̄ i dɔn tə́ ní gə̄gē, ni a gān̄g dɔn.
A̰á̰ā̰, deē ngeé ń toō ní, a gāngə̄n̄ dɔn i kə ta kūl̄ jīí kə́ unjə̄ njáý njáý.
Currently Selected:
JOB 22: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.