JOB 19
19
Najə̄ ń Job tūr̄ əda kə tɔ́gɔ́ ní, əda na nge rɔ̄ɔ̄ dɔn tə́ a ḭḭ yān na i ta tɔ̄l̄ ta tə́
1Anī Job ɔr̄ najə̄ əda na:
2Ā ī-rāāī kumḿ ndoō tə́ kə najá ō,
ā ī-rējə̄mī kə najá ō, i bátə́ ndɔ̄ kə́ rá tə́?
3Ī-tájə̄mī nja kutə kɔ̄ɔ́ ɓá.
Rɔ̄sí sɔl̄sí loo rāām̄ yá̰á̰ kə́ tōr̄ tə́ aĺ a?
4Ká ré kə́ rɔ̄kum tə́ m̄-ndúm̄ i mbée gə̄gē anī, i najə̄ yāḿ mə̄kɔ́.
5Rɔ̄kum, sḭḭ̄ ī-téliī seḿ kə̄ nang tə́
i kadə̄ sḭḭ̄ kɔ́ gə̄ ī-tɔgiīneé kum kə̄ dɔɔ́ ō,
sḭḭ̄ ī-kɔ̄lī seḿ tām̄ rɔ̄sɔl̄ kə́ ngá̰ý kə́ əlan̄ dɔḿ tə́ ō.
6I beé ní, majə kadə̄ ī-gerī na i Nə́ɓā n rāā yá̰á̰ kə́ gōtə́ aĺ ń noō seḿ ní ō,
i ni n ɓírə̄m̄ kə réng yānneé ní ō.
7Yá̰á̰ ń rāān̄ seḿ dɔ gúú tə́ ní, ré m̄-teē kə gírneé ndágá anī,
deē tūrə̄m̄ najə̄ tə́ alé.
Ré m̄-ɓāŕ yá̰a̰ kadə̄ deē dḭḭ̄m̄ gə̄gē anī,
de kə́ yā gān̄g sarya yāḿ kə gōó gətóo ō.
8Ni-dēsə́ yá̰á̰ róbə́ḿ tə́ ɔgə̄m̄neé mān̄ ō,
ni-ənī til dɔ kə̄lá róbə yāḿ gə̄ tə́ ō.
9Ni-ɔr̄ kɔsə gɔn yāḿ kɔ̄ɔ́ ō,
ɔr̄ jākā mbang kə́ dɔḿ tə́ kɔ̄ɔ́ ō.
10Ni-gán̄g ngəraḿ kə̄ loo gə̄ tə́ malang adə̄ m-óy kɔ̄ɔ́.
Ni-ɔr̄ kəndā kem dɔ tə́ yāḿ kɔ̄ɔ́ tītə̄ loo kɔr̄ kāgə̄ beé.
11Ni bə̄gā wōn̄g yān dɔḿ tə́ ō, rāām̄ i madə̄ ba̰ā̰n kógə̄ḿ tə́ ō.
12Ɓūtə̄ ngé rɔ̄ɔ̄ yān gə̄ reēn̄ reē kə́ to ɓōĺ ngá̰ý.
Nin̄ njarən̄ róbə tām̄ yādə́ tə́ bátə́ reē ugə̄n̄neé rɔ̄ḿ tə́ ō,
gīrə̄n̄ gidə kújə tandā yāḿ ō.
13Ni-tə̄ɓā ngákó̰ó̰ḿ gə̄ rɔ̄ḿ tə́ kɔ̄ɔ́ əndādə́ sa̰y ō,
ngé gə̄ ń ger̄mə̄n̄ ní, rāān̄ rɔ̄də́ i tə̄rā gə̄ tə́ tām̄ yāḿ tə́ ō.
14Ngééḿ gə̄ əya̰mə̄n̄ kɔ̄ɔ́ ō, dɔ madə̄ taḿ gə̄ ndígə̄naləḿ kɔ̄ɔ́ ō.
15Mbā yāḿ kə́ kújú gōḿ tə́ gə̄ ō, ngé kəla yāḿ kə́ dəyá̰ gə̄ ō,
rāāmə̄n̄ i tə̄rā deē tə́.
Mā i tə̄rā kɔ̄r̄ ta kumdə́ tə́.
16m̄-ɓāŕ nge kəla yāḿ kə́ dəngam anī, ni ndigəm̄ alé.
m̄-rāān ɓɔ́ kə taḿ gə̄gē, ni tūrə̄m̄ najə̄ tə́ alé.
17Koō kə́ taḿ tə́ i yá̰á̰ kə́ yḛr tām̄ yā nə̄yá̰ḿ tə́ ō,
nel̄ ngán kemḿ gə̄ seḿ to̰ aĺ ō.
18Ngáń kə́ dūú gə̄gē kídə̄mə̄n̄, m-ḭ́ḭ dɔɔ́ anī nin̄ tāmə̄n̄ seḿ.
19m̄-tél i yá̰á̰ kə́ to yḛr kum tām̄ yā madə́ḿ gə̄ kə́ j-ənī kemjí j-adə̄ naā malang tə́ ō,
ngé gə̄ ń m̄-táŕdə́ ní gə̄gē a, tél a rɔ̄ɔ̄mə̄n̄ i mbée ō.
20Ndārə́ḿ law̄ gidə kə̄ngāḿ gə̄ ō, dā̰ḿ ō.
m̄-teē kum tə́ i kə ndāŕ gidə gɔgəḿ#19.20 Ndāŕ gidə gɔgəḿ: Kumən na m̄-teē kum yá̰á̰ kə́ tōr̄ tə́ i jīḿ karī, adə̄ i kanjə̄ yá̰á̰ kógə̄ḿ..
21Sḭḭ̄ madə́ḿ gə̄, á̰a̰ī kum tō ndoō yāḿ tə́, á̰a̰ī kum tō ndoō yāḿ tə́,
tɔdɔ̄ Nə́ɓā əndam̄.
22Ī-ngɔ̄də̄mī tītə̄ ń Nə́ɓā a ngɔ̄də̄məń ní i tām̄ rí tə́?
Dā̰ḿ asə tasí aĺ i mbée a?
23Aa, m̄-ndigə ngá̰ý kadə̄ ndangən̄ najə̄ kɔrə̄ḿ,
kadə̄ ndangən̄ kadə̄ to ngándáńg!
24Kadə̄ ndangən̄ kə gində̄ kə́ ta kataá ō, kə gində̄ pəlɔm#19.24 Gində̄ pəlɔm: I gində̄ kə́ ɔȳ ngá̰ý ō ɓálən i kə́ ndul ō. ō.
25Mā m̄-ger̄ majə kadə̄ nge gān̄g dɔḿ ndi kə kumneé ō,
m̄-ger̄ kadə̄ a ḭḭ dɔɔ́ gō gogə́ dɔ nang tə́ ō.
26Dan ń a nujən̄ ndārə́ḿ kɔ̄ɔ́ anī,
m-ā m-á̰a̰ majə Nə́ɓā.
27Mə̄kɔ́ m-ā m-á̰a̰n kə kumḿ.
I mā n m-ā m-á̰a̰n ní, ba i de kə́ rang alé.
M-ɔ́ŕ ngá̰ý loo ngóō kum mbang ngeé ń noō tə́.
28Sḭḭ̄ ī-dəjeī rɔ̄sí najə̄ ə́daī na ké ā ī-rāāī i ba̰ý n ā ī-rāāīneé yá̰á̰ kə́ tōr̄, yā kəngeń
yá̰á̰ kə́ yā kəga rɔ̄ gidə tə́, ba rāań sarya seneé ní wa.
29Ī-ɓōlíī kaskar kə́ kadə̄ a ɔsəsí sḭḭ̄ kɔ́ gə̄,
tɔdɔ̄ tə́ya̰ lagəra gō yá̰á̰ tə́ a reē kə yoó dɔsí tə́.
Majə kadə̄ ī-gerī na sarya kógə̄ḿ to noó!
Currently Selected:
JOB 19: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.