JOB 10
10
Najə̄ ń Job tūr̄ əda ní, əda na Nə́ɓā na rāā adə̄ ojənə̄n̄ i yā kadə̄ nujən̄ seneé ngóy
1Ndi kə kumuú ɔr̄ wurəḿ
adə̄ m-ā m-ə́ya̰ taḿ dɔɔ́ yā nōoń banī m-ā m-ə́hɔ rɔ̄ḿ to̰ alé.
M-ā m-ɔ̄r̄ najə̄ kə wur katāá.
2M-ā m-ə́dá Nə́ɓā na: Ī-lōō kəndā najə̄ dɔḿ tə́,
ba ɔ́jəm̄ yá̰á̰ kə́ majaĺ ń m̄-rāā á ī-ndángə̄m̄ najə̄ n tə́ ní.
3Yá̰á̰ kə́ tōr̄ ń ī-rāām̄ ní nelī a?
Yá̰á̰ ń īkɔ́ ī-rāā kə jīí á tōr̄ rɔ̄í ní nelī kídə̄n a?
Rāā ń ī-rāā majə kə ngé kem ndul gēé
adə̄ nin̄ rāānəń yá̰a̰ gə̄ ń nin̄ númə̄n̄ ní nelī ngá̰ý a?
4Ka̰a̰ loo yāí i tītə̄ ka̰a̰ loo yā deē ndul a? Ḭ̄ á̰a̰ loo ī-tɔȳ deē ndul aĺ a?
5Ā ī-ndi kə kumií dan i ngá̰ý aĺ tītə̄ yā deē ndul a?
Ɓālīí gə̄ i ngá̰ý aĺ tītə̄ yā deē á
6kadə̄ ī-sāā ger̄ yá̰á̰ kə́ gōtə́ aĺ ń m̄-rāā ní ō,
kadə̄ ī-ndəle gír majaĺ yāḿ ō ní a?
7Tá ī-ger̄ majə kadə̄ najə̄ gətóo dɔḿ tə́ ō,
de kə́ yā taām̄ jīí tə́ gətóo ō.
8I īkɔ́ n ə̄ndām̄ ō, ə̄ɓām̄ kə jīí ō,
ba ngɔlaā ī-ɓirə̄m̄ kə jīí ní adə̄ ngan̄g ō, ī-sāā nujə seḿ kɔ̄ɔ́ ō!
9Ādə̄ əga kemií dɔ tə́ na ə̄ɓām̄ i tītə̄ loo kəɓā yá̰a̰ kə nánjá beē ō,
ā ī-rāām̄ kadə̄ m̄-téĺ nán̄g gogə́ ō.
10Ī-ɓōkə́m̄ i tītə̄ loo ɓōkə́ mba kem yá̰á̰ beē aĺ a?
Gō tə́ anī, ī-rāām̄ adə̄ m̄-sīsə̄rī tītə̄ yibə̄ mba man̄g beé aĺ a?
11Ḭ̄ ī-rāā ndārə́ḿ ō, dā̰ḿ ō, ba ī-tə́ládə́ rɔ̄ḿ tə́ tītə̄ kūbə̄ beé.
Ḭ̄ ī-rāā kə̄ngāḿ gə̄ ō, ngəraḿ gə̄ ō.
12Ḭ̄ ī-rāā adə̄ m̄-ndi kə kumḿ ō, ī-ngɔ̄m̄ koōḿ ō.
13Tá āw̄ kə yá̰á̰ kógə̄ḿ kə́ ī-mundə̄m̄ kemií tə́ noō.
Banī yá̰á̰ ń ī-gír̄ kemií tə́ ní, m̄-ger̄.
14I kadə̄ ré m̄-rāā yá̰a̰ majanī, á̰a̰m̄ ō,
m̄-rāā yá̰a̰ gōtə́ aĺ anī, ə́da na najə̄ na gətóo dɔḿ tə́ aĺ ō.
15Ré najə̄ i dɔḿ tə́ anī, yāḿ a majə alé!
Ká ré najə̄ gətóoń dɔḿ tə́ gə̄gē anī, kə m̄-ndi ɓáa kə m-ə́la i dɔḿ nang tə́,
tām̄ rɔ̄ḿ sɔlə̄m̄ ngá̰ý ō, yá̰á̰ kə́ to kum kaȳ aĺ əsō dɔḿ tə́ ō.
16Ba ré m-ɔ̄r̄ dɔḿ dɔɔ́ anī, ī-ndo̰o̰m̄ tītə̄ kagə kə́ a ndo̰o̰ dā̰ beé ō,
yá̰a̰ rāāí kə́ to ɓōĺ ngá̰ý gə̄ ní, ī-rāādə́ kə̄ nja naā tə́ ī-rɔ̄ɔń seḿ ō,
17ḭ̄ ə̄nīm̄ rɔ̄ɔ̄ kə ngangá ngá̰ý kə̄ nja naā tə́ ō, wōn̄g rāāí seḿ tɔȳ dɔ ni kə́ kété ō,
ɓūtə̄ ngé rɔ̄ɔ̄ yāí gə̄ mbélə̄n̄ gír naā loo rɔ̄ɔ̄ḿ tə́ ō.
18Ḭ̄ ī-rāā ādə̄ m̄-teē kem kó̰ó̰ḿ tə́ i tām̄ rí tə́?
M-óy kemən tə́ kɔ̄ɔ́ anī, kum deē kógə̄ḿ a a̰a̰m̄ aĺ ō,
19m-ā m-āw̄ i súmūú kə̄ ɓádá,
tītə̄ kə́ m̄-ndi kə kumḿ nja kógə̄ḿ aĺ beé ō.
20Ngɔlaā ní, ndɔ̄ ń kadə̄ m̄-ndiń kə kumḿ ní, na̰y i ngá̰ý to̰ alé.
I beé ní, ādə̄ asiī kənīm̄ rɔ̄ɔ̄ ō, ə́ya̰m̄
ādə̄ m̄-rāā rɔ̄nel̄ gotə ndɔ̄ kə́ sḛ́ý beē ń na̰ym̄ tə́ ní ō,
21pá tá kadə̄ m-ā m-āw̄ kə̄ ɓē kə́ til ō,
ndíl yo ō i tū tə́ tə́ kanjə̄ tél.
22I ɓē kə́ ta gír loo kə́ tū tə́ i loo kə́ ndɔ̄ɔ́ kə́ risə til nding.
I ɓē kə́ ndíl yo utə̄ dɔ yá̰á̰ kə́ ka̰a̰ gō naā aĺ gə̄ kə́ tū tə́ kɔ̄ɔ́ ō,
loo kə́ kadá kə́ tū tə́ i tītə̄ loo kə́ ndɔ̄ɔ́ kə́ risə til nding ō.
Currently Selected:
JOB 10: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.