AJE 1
1
I kum mbang kə́ yā tél rāań kújə́ yā Kɔ́ɔ̄ɓē gogə́ rang
1Kem ɓāl̄ ko̰o̰ ɓē kə́ nge ko̰o̰ jōó yā Darius, mban̄g kə́ Persə tə́ ní, kem nāā kə́ nge ko̰ mehḛ́ tə́, kə ndɔ̄ nāā kə́ ta kəga dɔɔ́ anī, Kɔ́ɔ̄ɓē ɔr̄ najə̄ kə Aje nge koō ta. Ni dəjen kadə̄ ɔr̄ najə̄ kə Jorobabel nge ko̰o̰ ɓē kə́ Juda ń i ngōn̄ Saltiel ní, kə adə̄n ō, kə ɔr̄ najə̄ kə Yesua ngol ngé tun̄ yá̰a̰ gə̄ ń i ngōn̄ Yosadak ní, kə adə̄n ō. 2-3Adə̄ Aje əda najə̄ ń toō ń Kɔ́ɔ̄ɓē əndā tan tə́ ní, ni-əda na:
Najə̄ ń Kɔ́ɔ̄ɓē kə́ bo kə́ tɔ́gən i ngá̰ý əda ní n toó: De gə̄ ń noó ədan̄ na kum mbang kə́ yā tél rāań kújə́ kə́ bo yāḿ gogə́ n toó aĺ ɓáý. 4Ní, dan ń kújə́ kə́ bo yāḿ i kɔkərɔ gə̄ kə́ kán̄ dɔ naā tə́ bing ní, i kum mbang kə́ yā ndiń kem kújə yāsí kə́ rāā kadə̄ majə gə̄ tə́ a? 5Ngɔlaā ní, Kɔ́ɔ̄ɓē kə́ bo kə́ tɔ́gən i ngá̰ý dəjesí kadə̄ ī-gírī yá̰á̰ ń ī-rāāī ní. 6Ī-dubī kōō ngá̰ý, banī ə́jaī kōō i sḛ́ý beē. Ə́saī yá̰a̰, ba tɔ̄l̄ ɓōsí alé. Ā̰yī yá̰a̰, banī asə tasí alé. Sḭḭ̄ ō̰ō̰ī kūbə̄, banī kūl̄ o̰o̰sí. Ə́ngeī nar gír kəla kə́ ī-rāāī tə́ banī ī-ɓōkíī nar yāsí ní i kem ngong kə́ mbutə tə́. 7Kɔ́ɔ̄ɓē kə́ bo kə́ tɔ́gən i ngá̰ý ədasí ɓáý to̰: Ī-gírī yá̰á̰ ń ī-rāāī ní. 8Ālī kə̄ dɔ ngán mbal̄ gə̄ tə́, ī-sāāī kāgə̄ gə̄ ī-reēīń, ba ī-tél ī-rāāī kújə́ kə́ bo yāḿ gogə́ rang. Loo ń noō tə́ a nelə̄m̄ ō, m-ā m-ə́nge kɔsə gɔn tū tə́ ō. I mā Kɔ́ɔ̄ɓē n m-ə́da najə̄ ń noō ní. 9Sḭḭ̄ ī-ngóōī kadə̄ ndɔr̄ yāsí gə̄ teēn̄ kōō ngá̰ý, banī ə́jaī kōō i sḛ́ý beē. Yá̰á̰ ń ə́ngeī á āwīneé ɓēé ní, m̄-tóo kɔ̄ɔ́, adə̄ yá̰á̰ ní gətóo kɔ̄ɔ́ malang. I tām̄ rí tə́? Kɔ́ɔ̄ɓē kə́ bo kə́ tɔ́gən i ngá̰ý dəjesí najə̄ ń noō. I tām̄ kújə́ kə́ bo yāḿ kə́ i kɔkərɔ gə̄ kə́ ra dɔ naā tə́ bing, dan ń sḭḭ̄ kógə̄ḿ kógə̄ḿ ə̄ndāī kumsí gíŕ kújə yāsí gə̄ tə́ ī-rāāī ādī majə ní. 10I tām̄ najə̄ ń noō tə́ n man̄ edə aĺ ō, dɔ nang teē yá̰a̰ aĺ ō ní. 11m̄-rāā ādə̄ man̄ əhɔ laa kem ɓēé: Dɔ ngán mbal̄ gə̄ tə́ ō, dɔ ndɔr̄ kōō gémē tə́ ō, dɔ ndɔr̄ kāgə̄ nduú gə̄ tə́ ō, dɔ ndɔ̄r̄ kāgə̄ olibə gə̄ tə́ ō, dɔ ndɔr̄ kə́ rang gə̄ tə́ ō. Deē ndul gə̄ ō, dā̰ gə̄ ō a̰a̰n̄ tápə̄ najə̄ man̄ kə́ əhɔ laa tə́ ō, kəla malang ń ī-rāāī ní udə kɔ̄ɔ́ ō.
12Jorobabel kə́ ngōn̄ Saltiel ō, Yesua kə́ ngōn̄ Yosadak ń i ngol ngé tun̄ yá̰a̰ gə̄ ní ō, de gə̄ malang ń ɔyn̄də́ aw̄n̄ sedə́ dɔ ɓē kə́ rang tə́ dɔ gúú tə́ á tél reēn̄ gogə́ ɓēé ní ō, oōn̄ najə̄ gə̄ ń Kɔ́ɔ̄ɓē Nə́ɓā yādə́ əndā ta Aje nge koō ta tə́ adə̄ əda ní. Aje rāā kəla ń Kɔ́ɔ̄ɓē mērə̄n rāā ní tɔ̄l̄ ta i tītə̄ ń noō. Adə̄ ngán Israel gə̄ a̰a̰n̄ tɔ́gə ko̰o̰ ɓē yā Kɔ́ɔ̄ɓē gerə̄n̄. 13Gō tə́ anī, Aje ń i nge kəla yā Kɔ́ɔ̄ɓē ní, ədadə́ najə̄ ń toō ń Kɔ́ɔ̄ɓē əndā tan tə́ ní: Mā Kɔ́ɔ̄ɓē m-ə́dásí kə̄ ndágá wáńg na mā i naā tə́ sesí. 14Loo ń noō tə́ Kɔ́ɔ̄ɓē ndól̄ kəhɔ rɔ̄ tɔgə yā Jorobabel nge ko̰o̰ ɓē kə́ Juda ń i ngōn̄ Saltiel ní ō, ndól̄ kəhɔ rɔ̄ tɔgə yā Yesua ngol ngé tun̄ yá̰a̰ gə̄ ń i ngōn̄ Yosadak ní ō, ndól̄ kəhɔ rɔ̄ tɔgə yā de gə̄ malang ń ɔyn̄də́ aw̄n̄ sedə́ dɔ ɓē kə́ rang tə́ dɔ gúú tə́ á tél reēn̄ gogə́ ɓēé ní ō, adə̄ reē rāān̄ kújə́ kə́ bo yā Nə́ɓā yādə́ ń i Kɔ́ɔ̄ɓē kə́ bo kə́ tɔ́gən i ngá̰ý ní gogə́, 15kem nāā kə́ nge ko̰ mehḛ́ yā ɓāl̄ ngeé ń noō tə́, kə ndɔ̄ nāā kə́ nge ko̰ kutə jōó gidə i sɔ́.
Currently Selected:
AJE 1: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.