2 MAKABE GƏ̄ 15
15
Nikanor mbātə́ ɓōĺ gidə ndɔ̄ kə́ nge kṵ sīrí
1Nikanor oō kadə̄ Judas nin̄ kə de gə̄ yān gēé na i gō nang kə́ Samari tə́ anī, ndigə kənīdə́ rɔ̄ɔ̄ ndɔ̄ kɔr̄ koō tə́. I tītə̄ ń nuū n ni gírəń kadə̄ yá̰á̰ kógə̄ḿ na a rāan aĺ ní. 2Jipə kə́ ngé kun gōn dɔ gúú tə́ gə̄ ədanən̄ na: ī-tɔ̄l̄də́ tītə̄ dā̰ gə̄ beé ō, tītə̄ de kə́ kumən ṵṵn aĺ beē ō. Banī ī-ɓōĺ gidə ndɔ̄ ń Nə́ɓā rɔȳn ní, tām̄ ni ɔr̄ kamə̄n tayā tām̄ yān tə́, i ni n i nge kəndā kumən gíŕ yá̰a̰ malang tə́ ní. 3Banī Nikanor ń i de kə́ ndɔ̄ĺ i ngá̰ý dɔn tə́ ní, dəje na ké mban̄g kə́ bo kógə̄ḿ kə́ de kə́ dɔn tə́ gətóo ndi dɔ rā̰ tə́ nuú adə̄ ndūn kadə̄ de gə̄ rāān̄ rɔ̄nel̄ ndɔ̄ kə́ nge kṵ sīrí tə́ wa. 4Ɔjənən̄ kadə̄ i Kɔ́ɔ̄ɓē kə́ ndi kə kumneé ń i Mban̄g kə́ bo kə́ dɔ rā̰ tə́ kə́ de kə́ dɔn tə́ gətóó ní n adə̄ ndūn kadə̄ de gə̄ əndān̄ kumdə́ gír ndɔ̄ kə́ nge kṵ sīrí tə́ ní. 5Anī Nikanor tūr̄ əda na: Ba mā mban̄g kə́ dɔ nang tə́ kə́ de kə́ dɔḿ tə́ gətóo ō, m-ə́da na kadə̄ de gə̄ ɔȳn̄ yá̰a̰ rɔ̄ɔ̄ gə̄ ba rāān̄ kəla adə̄n̄ mban̄g. Ɓá tā ba yá̰á̰ kə́ majə aĺ ngá̰ý ń ni sāā rāā ní, asə rāā alé.
Judas əla go̰ kem madə̄n gə̄ tə́
6Kɔjə rɔ̄ asə Nikanor nák, adə̄ teē nga̰ā̰n ɔjəń lo rāā yá̰a̰ kəga kem dɔ tetə rɔ̄ɔ̄ tə́ kə yá̰a̰ rɔ̄ɔ̄ gə̄ yā Judas ō, yā madə̄n gə̄ ō. 7Banī Makabe ra dām̄ kə́rēý tə́ ənī kemən mák mák ō, taā kem kadə̄ Kɔ́ɔ̄ɓē a dḭḭ̄n ō. 8Ni əla go̰ kem ngé gə̄ ń i seneé tə́ ní, ədadə́ na kə lōōn̄ ɓōĺ ngé taā kem aĺ gə̄ ń a ənīn̄də́ rɔ̄ɔ̄ ní. Ba kə əga kemdə́ dɔ dḭḭ̄ ń Kɔ́ɔ̄ɓē dḭḭ̄də́ kété ní tə́ ō, kə́ ngɔr ń toō tə́ ɓáa, kə taān̄ kem mák mák na Kɔ́ɔ̄ɓē kə́ tɔ́gən i ngá̰ý a tetə rɔ̄ɔ̄ yā kadə̄də́ ɓáý tṵ ō. 9Ni əla go̰ kemdə́ tə́ kə ta kūl̄ ndū najá ō, kə najə̄ kɔr̄ ngé koō taa gēé ō, ter̄ kemdə́ dɔ rɔ̄ɔ̄ gə̄ ń tetən̄ kété tə́ ní ō. I beé n ni mbūsəń gír kəhɔ rɔ̄ tɔ́gə yādə́ ní. 10Ni adə̄də́ kem tə́ngā i tītə̄ ń nuū ō, tɔ̄l̄ ta kəla go̰ kemdə́ tə́ i kə kɔjədə́ háĺ kə́ gōtə́ aĺ yā ngé taā kem Nə́ɓā aĺ gə̄ ń mānə̄n̄ dɔ ndūdə́ kə́ ənīn̄ tə́ ní ō. 11Judas əla yá̰a̰ rɔ̄ɔ̄ jī de gə̄ yān gə̄ tə́ i tītə̄ ń nuū. I najə̄ yā der ō nənga ō kə́ jīdə́ tə́ ń ni ɔr̄ sedə́ ní alé, banī ɔr̄ i najə̄ kə́ rɔ̄kum gə̄ n əlań go̰ kemdə́ tə́ ní. Ni ɔjədə́ kum nīī kógə̄ḿ kə́ to taā kem, adə̄ i yá̰á̰ kə́ to tītə̄ yá̰á̰ kógə̄ḿ kə́ deē a̰ā̰ beé, nīī ní adə̄də́ rɔ̄nel̄ malang. 12Yá̰á̰ ń ni a̰ā̰ ní n toó: i Oniyas ń kété i nge tun̄ yá̰á̰ kə́ bo ní. Ni i de kə́ majə ō, najə̄n gətóo ō, sɔl̄ lɔ́ḿ lɔ́ḿ ō, najə̄ kɔrə̄n to ngá ō, əla gír rāā yá̰á̰ kə́ majə gə̄ i kə ngōn̄ dūúneé ō. Ni ɔy jīn kə̄ dɔɔ́ ba ndɔ̄ȳ tām̄ yā Jipə gə̄ tə́ malang. 13Gō tə́ anī, de kógə̄ḿ teē hɔy kə̄ rɔ̄ Judas tə́ tītə̄ kə́ kété ɓáý, i de kə́ dɔn ndaa ō, i de kə́ ngáā ngá̰ý ō, to ndíl ka̰ā̰ ō, de gə̄ ɓōlə́n̄ gidən ō. 14Oniyas un najə̄ ɔr̄ əda na: Dəngam ń toō i madə̄ ngákṵ́ṵn gə̄. Ni ndɔ̄ȳ ngá̰ý tām̄ yā gír deē yān gə̄ tə́ ō, tām̄ yā ɓē kə́ táĺ tə́ ō. Deē ní i Jeremi, nge koō taa yā Nə́ɓā. 15Jeremi əla kaskar kə́ rāā kə lɔ́rɔ́ adə̄ Judas kə jīn kə́ kṵṵ́, ba ədan najə̄ gə̄ ń toō: 16Ī-taā kaskar kə́ kɔr̄ kam̄ tayā ń toō, i kadə̄ karī yā Nə́ɓā, a ī-tetəń madə̄ ba̰ā̰ gə̄ rɔ̄ɔ̄.
Rɔ̄ɔ̄ rāā Nikanor ō, oy ō
17Najə̄ kə́ majə ngá̰ý gə̄ ń Judas ɔr̄ kə áskar gēé ní, rāā adə̄ kemdə́ tetə kə̄ nang tə́. Tɔdɔ̄ najə̄ gə̄ ní i najə̄ gə̄ kə́ asən̄ kəla go̰ kemdə́ tə́ ō, asən̄ rāā kadə̄ balsáá gə̄ rɔ̄ɔ̄n̄ kə́ de kə́ dəngam gə̄ tə́ ō. Jipə gə̄ ndigən̄ tél kaw̄ gogə́ géŕ gereé tṵ alé, ba i kaw̄ kənī nganjədə́ tū yā madə̄ ba̰ā̰ gə̄ tə́ ba rɔ̄ɔ̄ kə́ de kə́ dəngam gə̄ tə́ najə̄ yā ɓē tə́ ō, kəla yā Nə́ɓā tə́ ō, lo kə́ táĺ tə́ ō ń de gə̄ a sāān̄ nujəń ní tə́. 18Tɔdɔ̄ sōl̄ kə́ tām̄ yā dəyá̰ gə̄ tə́ ō, ngán gə̄ tə́ ō, ngákṵ́ṵ naā gə̄ tə́ ō, ngée naā kə́ ngɔr gə̄ tə́ ō ní, usədə́ dɔ tə́ ngá̰ý alé. Banī sōl̄ yādə́ kə́ ngá̰ý kə́ ta kəga dɔ ní, i tām̄ yā kújə́ kə́ kɔr̄ kam̄ tām̄ yā Kɔ́ɔ̄ɓē tə́ tə́. 19Ngé gə̄ ń nin̄ i kem ɓēé ní, sōl̄ yādə́ i sōl̄ kə́ sḛ́ý beē tə́ aĺ ō. Nin̄ ɓōlə́n̄ najə̄ yā rɔ̄ɔ̄ ń a rāā yā to bembeé ní. 20De gə̄ malang ndi a ngóōn̄ i kum mbang ń yá̰a̰ a rāań yá̰a̰ yā tɔ̄ləń ta yá̰a̰ malang ní. Ba kum mbang ní dɔ i ngɔr. Dan ngeé ń nuú tə́ ní, madə̄ ba̰ā̰ gə̄ ɔsən̄ dɔdə́ naā tə́ ō, a tə́ndān̄ i ngé rɔ̄ɔ̄ yādə́ gə̄ kə jī lo rɔ̄ɔ́ ō. Tə́ndān̄ kedə̄ rɔ̄ɔ̄ gə̄ i lo kə́ majə tə́ ō, ngé rɔ̄ɔ̄ kə sə́ndá gə̄ i dɔ jī kedə̄ gə̄ tə́ dām̄ jōó ō. 21Makabe əndā maȳ ɓūtə̄ áskar kə́ ngá̰ý gə̄ ń toō ō, yá̰a̰ rɔ̄ɔ̄ yādə́ kə́ tayā tayā gə̄ ō, kedə̄ gə̄ ń a rāān̄ i hál dā̰ gə̄ ní ō. Ni ɔy jīn kə̄ dɔɔ́ ba ndɔ̄ȳ Kɔ́ɔ̄ɓē nge rāā yá̰á̰ kə́ to kɔr kum kə́ majə ngá̰ý gə̄. Tɔdɔ̄ ger̄ kadə̄ i ta kūl̄ yá̰a̰ rɔ̄ɔ̄ gə̄ alé, ba i kə ta kūl̄ kem ndigə yān n adə̄ń ngé gə̄ ń asən̄ ní kadə̄ tetən̄ rɔ̄ɔ̄ ní. 22Najə̄ ń ni ɔr̄ kem ndɔ̄ȳ yān tə́ ní n toó: Kɔ́ɔ̄ɓē, dan ń Ejekiyas i mban̄g kə Juda ní, i ḭ̄ n ə́la deē yāí kə́ dɔ rā̰ tə́ adə̄ tɔ̄l̄ ngé rɔ̄ɔ̄ gə̄ yā Senakerib kə́ asən̄ deē dūbú ɓú kə kutə sɔ́sɔ́ kə kalən kə́ mí ní. 23Kɔ́ɔ̄ɓē, ḭ̄ ń ī-ndi dɔ rā̰ tə́ ní, ə́la kə de kə́ dɔ rā̰ tə́ kógə̄ḿ kə́ majə ɓōólaā ɓáý tṵ nojí tə́ ādə̄ əla ɓōĺ kə́ ngá̰ý kem madə̄ ba̰ā̰ gə̄ tə́. 24Ngé gə̄ ń ngonjə̄n̄ dɔí tə́ ō, reē ənīn̄ gír deē yāí kə́ táĺ gə̄ rɔ̄ɔ̄ ō ní, ə́ndádə́ kə tɔ́gí! Ni tɔ̄l̄ ta ndɔ̄ȳ yān i kə najə̄ ń nuú.
25Ɓūtə̄ áskar gə̄ yā Nikanor a njə̄rān̄ kə̄ kété i kə gō ndū burúnjə gə̄ ō, pā rɔ̄ɔ̄ gə̄ ō. 26Dām̄ yā Judas gē tə́ ɓáa, nin̄ kə de kə́ dəngam yān gēé udən̄ dɔ madə̄ ba̰ā̰ gə̄ tə́ i kə rāā Nə́ɓā ɓɔ́ kadə̄ dḭḭ̄də́ tə́. 27Nin̄ rɔ̄ɔ̄n̄ kə jīdə́ ō, ndɔ̄ȳn̄ Nə́ɓā kə dan wurdə́ ō, anī tɔ̄lə̄n̄ de kə́ dəngam gə̄ kə́ asən̄ deē dūbú kutə mətá gidə i mí ń nuū. Tɔ́gə yā Nə́ɓā ń ɔjə rɔ̄n kə̄ ndágá ní adə̄də́ rɔ̄nel̄ ngá̰ý. 28Dan ń gír rɔ̄ɔ̄ gān̄g anī, Jipə gə̄ télən̄ dɔ tə́ kə rɔ̄nelé. Nin̄ teēn̄ dɔ nīń Nikanor tə́, to i kə yá̰a̰ rɔ̄ɔ̄ yān gēé malang rɔ̄n tə́. 29Anī əgan̄ kɔŕ ngá̰ý ō, najə̄ ɓār̄ sow ō. Nin̄ malang rāān̄ Kɔ́ɔ̄ɓē kə́ra kə taa yā kaadə́ gēé ō. 30Judas ń i nge rɔ̄ɔ̄ kété no madə̄n gə̄ tə́ kə rɔ̄n gēé malang ō, kə ndílneé malang ō, tām̄ yā ngáń ngé ɓē madə̄n gə̄ tə́ ní, ni ń əla gíŕ táŕ deē yān gə̄ i dan ń ni i balsáá ɓáý ní, adə̄ ndūn kadə̄ gāngə̄n̄ dɔ Nikanor ō, gāngə̄n̄ jī kṵṵn ta kār̄ bɔ̄gən tə́ ō, kə aw̄nəń Jerusalem. 31Nəkɔ́ aw̄ Jerusalem ba ɓāŕ ngáń ngé ɓē madə̄n gə̄ ō, tə́ndā ngé tun̄ yá̰a̰ gə̄ ta dabə tun̄ yá̰á̰ tə́ ō, əla gō de gə̄ ń ndin̄ kem ɓē kə́ rang gə̄ tə́ ní adə̄ reēn̄ ō. 32Ba ɔjədə́ dɔ Nikanor ń i de kə́ majə aĺ ngá̰ý ní ō, ɔjədə́ jī nge tɔ̄l̄ de gə̄ ngeé ń toō ń əla kə kɔjə rɔ̄ɔ́ kə̄ dɔ kújə́ kə́ táĺ yā Nə́ɓā kə́ tɔ́gən i ngá̰ý tə́ ní ō. 33Kutə̄ gō anī əda kadə̄ gāngə̄n̄ ndo̰ nge tɔ̄l̄ de gə̄ ngeé ń toō, ba kə gángə̄n̄ naā tə́ bétə́ bétə́ kə adə̄n̄ yel̄ gə̄ ō, kə naān̄ jīn dɔɔ́ ta kújə yā Kɔ́ɔ̄ɓē tə́ yā kɔjəń yá̰á̰ ń ənge gíŕ mbóo yān tə́ ní ō. 34Lo ń nuū tə́ de gə̄ malang a̰a̰n̄ lo kə̄ dɔ rā̰ tə́ ō, ɓōkə́n̄ Kɔ́ɔ̄ɓē kə́ to kɔsə go̰n tɔ̄ȳ ō, ədan̄ na: Tɔ̄ȳ i kə̄ dɔ nge ń ngɔ̄m̄ kújə yān adə̄ yá̰á̰ kə́ yḛr ɔdə rɔ̄ aĺ ní tə́!
35Judas adə̄ dṵṵ̄n̄ dɔ Nikanor dɔɔ́ kadə ndogə̄ mbal̄ kə́ əgan̄ dɔ ɓē kə́ ngan̄g tə́. Nge ń nuū i yá̰á̰ kə́ ɔjə kadə̄ Kɔ́ɔ̄ɓē dḭḭ̄ gír deē yān gə̄, adə̄ de gə̄ malang a̰a̰n̄ ō gerə̄n̄ ō. 36De gə̄ malang unən̄ ndūdə́ ədan̄ na: kadə̄ deē əya̰ ndɔ̄ ń nuū adə̄ mān̄ karī alé, ba kə rāān̄ rɔ̄nel̄ ndɔ̄ kə́ nge kṵ kutə gidə i mətá yā nāā kə́ nge kṵ kutə gidə i jōó ń a ɓārə́n̄ kə ta Aram na i Adar ní. Adə̄ i ndɔ̄ ń teē bírí anī i ndɔ̄ yā Mardose ní.
Yá̰a̰ gə̄ ń nge ndang makətūbə̄ əndā maȳ ta tɔ̄l̄ ta tə́ ní
37Yá̰a̰ gə̄ ń rāān̄ yá̰a̰ ɔjəń dɔ Nikanor ní n nuú. Əla gír ɓāl̄ ngeé ń nuū tə́ ní, ɓē kə́ Jerusalem i gíŕ tɔ́gə yā Jipə gə̄ tə́. I tām̄ najə̄ ń nuū tə́ n m-ā m̄-dəba ta kɔjə gotə najə̄ yāḿ lo ń toō tə́ ní. 38Ré m-ə̄nī gotə najə̄ ní i kə gōó ō, majə ō anī, yá̰á̰ ń m̄-sāā ní n nuú. Ré yá̰á̰ kə́ gōtə́ aĺ gə̄ i tū tə́ ō, gotə najə̄ ní to ngáā aĺ ō anī, m̄-rāā i yá̰á̰ ń tɔ́gə́ḿ asə ní. 39Ka̰ȳ kasə nduú dɔ rɔ̄n, aláa ka̰ȳ man̄ dɔ rɔ̄n, i yá̰á̰ kə́ a rāā majə aĺ kə deé. Ba kasə nduú kə́ ɓōkə́ kum man̄ tə́ i yá̰á̰ kə́ rāā adə̄ man̄ nel̄ ka̰ȳ. I beé ō, i ger̄ lo kɔjə gotə yá̰á̰ kə́ rāā yá̰a̰ kə gōó majə n a nel̄ ta ngé tə́da makətūbə̄ gə̄ ní. Adə̄ m̄-dəba i lo ń toō tə́ laā.
Currently Selected:
2 MAKABE GƏ̄ 15: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.