2 YÁ̰A̰ GƏ̄ 1
1
Gotə najə̄ yā Salomo̰, mban̄g kə́ Israel tə́
(1—9)
1Salomo̰ ngōn̄ Dabid ndi ngan̄g dɔ kɔr kāgə̄ mbang yān tə́ Kɔ́ɔ̄ɓē Nə́ɓā yān i naā tə́ seneé ō, ɔsən kə̄ dɔɔ́ ngá̰ý ō.
Salomo̰ dəje Nə́ɓā kum kedə̄ yā ko̰o̰ń ɓē
(Á̰a̰ī 1 Mba 3.4-15)
2Salomo̰ ɓāŕ Israel gə̄ malang, adə̄ i ngol áskar kə́ dūbú gə̄ ō, kə́ ɓú gə̄ ō, ngé sarya gə̄ ō, ngār gə̄ kə́ dɔ gír kojə gə̄ tə́ malang ō ń nin̄ i de kə́ bo gə̄ kə́ Israel tə́ ní ō. 3Salomo̰ nin̄ kə ngé kán̄ naā gə̄ malang aw̄n̄ loo kə́ kḭḭ kə́ dɔɔ́ kə́ Gabaon tə́. Tɔdɔ̄ kújə kənge naā kə Nə́ɓāá ń Moijə kə́ nge kəla yā Kɔ́ɔ̄ɓē rāā kem dəla loo tə́ ní udən̄ i loo ń noō tə́. 4Dabid un sandúkə́ yā Nə́ɓā kem ɓē kə́ Kiryat Yearim tə́ reēń Jerusalem ba əndā loo ń rāā kə rīí tə́ ní, gíŕ kújə tandā kógə̄ḿ tə́. 5Loo kə́ yā tun̄ dɔ tə́ kə́ rāā kə gində̄ nə̄ngá kasaá ń Besalel ngōn̄ Uri, kə́ ngōn̄ Hur rāā ní i ta kújə yā Kɔ́ɔ̄ɓē tə́ Gabaon. I Kɔ́ɔ̄ɓē n Salomo̰ nin̄ kə ngé kán̄ naā gēé sāānən̄ ní. 6Salomo̰ aw̄ ta yá̰á̰ kə́ yā tun̄ yá̰a̰ dɔ tə́ kə́ rāā kə gində̄ nə̄ngá kasaá tə́, ta kum Kɔ́ɔ̄ɓē tə́ kadə kújə kənge naā tə́, ba ndējə̄ Kɔ́ɔ̄ɓē yá̰a̰ tun̄ kə́ róō horoó gə̄ dūbú kógə̄ḿ.
7Nə́ɓā ndɔ̄bə̄ Salomo̰ ndɔ̄ ń noō tə́ ndɔ̄ɔ́ ba ədan na: Yá̰á̰ ń kemií gḛy ní i rí anī ī-dəjem̄ ādə̄ m-ādī! 8Salomo̰ tél əda Nə́ɓā na:
I ḭ̄ n ī-rāā kem majə kə bɔbə́ḿ Dabid ngá̰ý ō, ə̄ndām̄ kadə̄ m-ó̰o̰ ɓē gotən tə́ ō ní. 9Ngɔlaā ní Kɔ́ɔ̄ɓē Nə́ɓā, ī-rāā yá̰á̰ ń ə̄nī ndūí yā rāā kadə̄ bɔbə́ḿ ní. Tɔdɔ̄ i ḭ̄ n ə̄ndām̄ kadə̄ m-ó̰o̰ ɓē dɔ gír de gə̄ kə́ kutədə́ i ngá̰ý tītə̄ nán̄g ngárə̄ḿnjēý kə́ dɔ nang tə́ ní. 10I beé ní ādə̄m̄ kum kedə̄ ō, ger̄ kəndā ma̰ȳ yá̰a̰ ō, kadə̄ m̄-gerə̄ń loo njə̄rā kété no gír de gə̄ ń toō tə́. Tɔdɔ̄ kanjə̄ nge ń noō anī de kə́ asə ko̰o̰ ɓē dɔ gír deē yāí gə̄ tə́ gətóo, tām̄ nin̄ i ngá̰ý.
11Anī Nə́ɓā əda Salomo̰ na: I yá̰a̰ kənge kə́ ngá̰ý n ī-dəje aĺ ō, i kadə̄ ɔsən̄ gɔnií aĺ ō, i kadə̄ madə̄ ba̰ā̰í gə̄ oyn̄ aĺ ō, i kadə̄ ī-ndi kə kumií ndɔ̄ ngá̰ý aĺ ō, ba i kum kedə̄ ō, ger̄ yá̰á̰ kə́ majə ō, kə́ majaĺ ō, kadə̄ ó̰o̰ń ɓē dɔ gír deē yāḿ gə̄ ń m-ādə̄ ó̰o̰ ɓē dɔdə́ tə́ ní ní, 12beé ɓáa m-ādī kum kedə̄ ō, ger̄ yá̰á̰ kə́ majə ō, kə́ majaĺ ō. Tá m-ā m-ādī yá̰a̰ kənge kə́ ngá̰ý ō, kɔsə gɔn ō, dɔ tə́ ɓáý to̰. Mban̄g gə̄ ń o̰o̰n̄ ɓē kété noí tə́ ní, nge kə́ ənge asə seí gətóo ō, mban̄g gə̄ ń a o̰o̰n̄ ɓē gotií tə́ ní, nge kə́ a ənge asə seí a gətóo ō.
13Loo ń noō tə́ Salomo̰ ḭḭ loo kə́ kḭḭ kə̄ dɔɔ́ kə́ Gabaon tə́, loo ń kújə kənge naā kə Nə́ɓā i tū tə́ ní tə́, ba tél dɔ tə́ reē gogə́ Jerusalem. Ni-o̰o̰ ɓē dɔ Israel gə̄ tə́.
Tɔ́gə Salomo̰ ō, yá̰a̰ kənge yān kə́ ngá̰ý ō
(Á̰a̰ī 1 Mba 10.26-29; 2 Yá̰a̰ 9.25-28)
14Salomo̰ kán̄ púsə rɔ̄ɔ̄ gə̄ ō, sə́nda gə̄ ō, kə̄ dɔ naā tə́. Ni-ənge púsə rɔ̄ɔ̄ gə̄ dūbú kə ɓú sɔ́ ō, sə́nda gə̄ dūbú kutə gidə i jōó ō. Ni ngɔ̄m̄ kə́rēý gə̄ rɔ̄n tə́ Jerusalem, ba kēgə̄ gotə gə̄ əlań kə̄ kem ɓē gə̄ tə́, loo gə̄ kə́ rāān̄ tām̄ yādə́ tə́. 15Mban̄g rāā adə̄ gində̄ arjā̰a̰ ō, lɔ́r ō, kə́ Jerusalem i ngá̰ý tītə̄ kɔkərɔ gə̄ ō, kāgə̄ sédər gə̄ i ngá̰ý tītə̄ kāgə̄ sikomor gə̄ kə́ dɔ nang kə́ mbal̄ bo gə̄ gətóon̄ tū tə́ tə́ beé ō, 16Sə́nda gə̄ yā Salomo̰ i sə́nda gə̄ kə́ ḭḭn̄ sedə́ i dɔ nang kə́ Ejiptə tə́ ō, dɔ nang kə́ Silisi tə́ ō. Ngé rāā gātə̄ gə̄ yā mban̄g a aw̄ a mangən̄də́ i loo gə̄ ń noō tə́ tām̄ yā mban̄g tə́. 17Ngé rāā gātə̄ gə̄ ni a mangən̄ púsə rɔ̄ɔ̄ kə́ Ejiptə kógə̄ḿ i kə njáŕ sə́lē arjā̰a̰ ɓú mehḛ́ ō, sə́ndá kógə̄ḿ i kə njáŕ sə́lē ɓú kə kutə mí ō. Nin̄ a reēnneé tām̄ yā mban̄g gə̄ yā Het gə̄ tə́ ō, mban̄g gə̄ yā Aram gə̄ tə́ ō.
Salomo̰ əndā dɔ yá̰a̰ gə̄ danaá yā rāań kújə yā Kɔ́ɔ̄ɓē ō, kújə mban̄g kə́ tām̄ yān nəkɔ́ tə́ ō.
(Á̰a̰ī 1 Mba 5.15-32; 7.13-14)
18Salomo̰ əda kadə̄ rāān̄ kújə yā Kɔ́ɔ̄ɓē ō, kújə mban̄g kə́ tām̄ yān nəkɔ́ tə́ ō.
Currently Selected:
2 YÁ̰A̰ GƏ̄ 1: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.