1 TIMOTE 1
1
Pol rāā Timote lápə́ya
1I mā Pol ń i ngōmbang kəla yā Kərist Jeju kə gō kem ndigə yā Nə́ɓā kə́ nge kajəjí ō, kə gō kem ndigə yā Kərist Jeju ń j-əndāī kemjí dɔn tə́ ō ní, 2n m-ə́la kə makətūbə̄ ń toō m-ādī ḭ̄ Timote ní. Ḭ̄ i ngōnə̄ḿ kə́ rɔ̄kum, tɔdɔ̄ i mā n m̄-rāā adə̄ ī-taā kem ní.
Ādə̄ Bɔbə̄jí Nə́ɓā nin̄ kə Kɔ́ɔ̄ɓē yājí Kərist Jeju rāān̄ kem majə seí ō, a̰a̰n̄ kum tō ndoō yāí ō, sɔlə̄n̄ kemií ō.
Tāā kə́ dɔ yá̰á̰ ndóō gə̄ kə́ rɔ̄kum aĺ tə́
3Tītə̄ ń m-ə́daīneé kété pá tá kadə̄ m-ɔ́tə m-āw̄ Masedəwan tə́ ní, ī-ndi Epejə kadə̄ ə́da de kə́rēý gə̄ kadə̄ ndóōn̄ de gə̄ yá̰á̰ kə́ rang gə̄ aĺ ō, 4kadə̄ ə́da de gə̄ kadə̄ əhɔn̄ gō súū kə́ kɔr̄ gə̄ aĺ ō, gō kɔr̄ gír kaa gə̄ kə́ ta ngóýdə́ gətóo gə̄ aĺ ō. Tɔdɔ̄ nge ń noō a teē ta róbə a adə̄ i nējə̄ naā najə̄ gə̄, ba a rāā kəla tām̄ yā yá̰á̰ ń Nə́ɓā núm̄ á ra i dɔ taā kem tə́ ní alé. 5Ə́dá yá̰a̰ gə̄ ń toō i yā kadə̄ de gə̄ tárən̄ naā kə kemdə́ kə́ unjə̄ njáý njáý ō, kə kemdə́ kə́ ɔjədə́ yá̰á̰ kə́ majaĺ aĺ ō, kə taā kem kə́ rɔ̄kum ō. 6De kə́rēý gə̄ əya̰n̄ háĺ ń noō kɔ̄ɔ́, loo ń noō tə́ nin̄-ndúmə̄n̄, adə̄ a ɔrə̄n̄ i najə̄ kə́ kanjə̄ kumən gə̄. 7Gḛyn̄ kadə̄ nin̄ i ngé ndóō de gə̄ ndū najə̄ gə̄, ba gerə̄n̄ yá̰á̰ ń nin̄-ədan̄ ní aĺ ō, yá̰a̰ gə̄ ń nin̄-ɔrə̄n̄ najə̄ kə́ dɔ tə́ kə ngangāá ní aĺ ō.
8Tɔdɔ̄ jə-gerī kadə̄ ndū najə̄ i yá̰á̰ kə́ majə, banī ré jə-rāāī i yá̰á̰ ń adə̄n̄ ndū najə̄ tāmən tə́ ní tá.
9Yá̰á̰ ń kadə̄ jə-gerī majə ní n toó: Ngé gə̄ ń əndān̄ ndū najə̄ tām̄ yādə́ tə́ ní, i de kə́ súmūú gə̄ alé, ba i de kə́ ngé rāā yá̰á̰ kə́ gō tə́ aĺ gə̄ ō, ngé dum̄ naā gə̄ ō, ngé mbātə́ rāā yá̰a̰ kə gō yā Nə́ɓāá ō, ngé rāā majaĺ gə̄ ō, ngé nujə yá̰á̰ kə́ kɔr̄ kam̄ gə̄, aláa rāā yá̰á̰ kə́ kɔr̄ kam̄ gə̄ yá̰á̰ kə́ karī tə́ ō, ngé tɔ̄l̄ bɔbə̄də́ kə kó̰ó̰də́ gə̄ ō, ngé tɔ̄l̄ de gə̄ ō, 10ngé sāā naā loo kaya tə́ gə̄ ō, ngé sāā dəngam madə̄də́ gə̄ ō, ngé kigə de gə̄ ō, ngé sor̄ gə̄ ō, ngé túbə̄ dɔ sor̄ tə́ gə̄ ō, aláa ngé rāā yá̰á̰ kə́ rang gə̄ malang kə́ mbātə́ yá̰á̰ ndóō kə́ rɔ̄kum ō. 11Yá̰á̰ ndóō ń toō to tū Najə̄ kə́ Majə tə́. Ba i Najə̄ kə́ Majə n i nge rāā kadə̄ jə-gerī yá̰á̰ ń i kɔsə gɔn yā Nə́ɓā ní. Nə́ɓā ń i nge rāā kadə̄ kemjí nel̄jí ní, adə̄m̄ kəla kɔjə de gə̄ Najə̄ kə́ Majə ngeé ń toō.
Pol ndadə̄ Nə́ɓā tām̄ kem majə yān tə́
12m̄-ndadə̄ Kɔ́ɔ̄ɓē Kərist Jeju nge kadə̄m̄ tɔ́gə, tām̄ ni-a̰a̰ kadə̄ m-ásə kadə̄ ni-ənī kemən adə̄m̄, adə̄ unəm̄ kəla yān tə́. 13Mā ń kété m̄-ndájə̄ najə̄ dɔn tə́ ō, m̄-rāā kumən ndoō tə́ ō, m̄-rāān majaĺ ngá̰ý ō ní. Banī Nə́ɓā a̰a̰ kum tō ndoō yāḿ, tām̄ dan ń noō tə́ ní, m̄-taā kem Kərist alé. Tɔdɔ̄ m̄-rāā yá̰a̰ i kə́ de kə́ ger̄ yá̰a̰ aĺ tə́. 14Banī Kɔ́ɔ̄ɓē rāā kem majə seḿ ngá̰ý. Ni-rāā adə̄ m̄-taā kem ō, m̄-tár ō, kə ta kūl̄ kem kógə̄ḿ kə́ m̄-rāā kə Kərist Jeju. 15Najə̄ ń toō i najə̄ kə́ rɔ̄kum kə́ to kadə̄ deē taā kem ō, i najə̄ kə́ asə kadə̄ de gə̄ malang ndigən̄ kə taá ō: Kərist Jeju reē dɔ nang tə́ i kajə ngé rāā majaĺ gə̄ tə́, ba majaĺ yāḿ mā tɔȳ majaĺ yā ngé rāā majaĺ gə̄ malang. 16Ba mā kə́ majaĺ ngá̰ý ń a̰a̰n̄ kum tō ndoō yāḿ ní, i yā kadə̄ Kərist Jeju ɔjəń tə́gā ta yān kə́ ngá̰ý kə̄ ndágá kə de gə̄ ń ndɔ̄ń tə́ a taān̄ kemən tām̄ yā ndi kə kumuú kə́ ngándáńg tə́ ní. 17Mban̄g kə́ nge ndi kə dɔ ɓāl̄ gə̄ ɓāl̄ gə̄ ń i Nə́ɓā kə́ a oy aĺ ō, kum deē a̰a̰n aĺ ō, ni i kal kógə̄ḿ beē ō ní, ādə̄ de gə̄ rɔȳnən̄ ō, ɔsən̄ gɔnən ō, kə dɔ ɓāl̄ gə̄ ɓāl̄ gə̄. Adə̄ i tītə̄ ń noō!
18Ngōnə̄ḿ Timote, yá̰a̰ gə̄ ń m-ə́daī kadə̄ ī-rāā ní, i kə gō najə̄ gə̄ ń Nə́ɓā əndā ta ngé koō ta yān gə̄ tə́ adə̄ ədan̄ dɔí tə́ kété ní. Ādə̄ najə̄ gə̄ ngeé ń toō adīn̄ tɔ́gə kadə̄ ī-rɔ̄ɔń rɔ̄ɔ̄ kə́ majə ń ā ī-rāā yā ra ta tə́ ní. 19Ī-ngɔ̄m̄ taā kem ō, ādə̄ kemií ɔjiī yá̰á̰ kógə̄ḿ kə́ majaĺ aĺ ō. De kə́rēý gə̄ mbātə́n̄ koō najə̄ yā kemdə́ kə́ ɔjədə́ yá̰á̰ kógə̄ḿ kə́ majaĺ aĺ ngeé ń toō. I tītə̄ ń noō n nin̄-rāān̄neé adə̄ taā kem yādə́ əsōń kɔ̄ɔ́ ní. 20Himene ō, Alekjandər ō, i dan de gə̄ ngeé ń noō tə́. M-ādə̄də́ kə Sətan kadə̄ ndóōn̄ loo ndájə̄ najə̄ dɔ Nə́ɓā tə́ alé.
Currently Selected:
1 TIMOTE 1: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.