1 PIYER 1
1
Piyer rāā de gə̄ lápə́ya
1I mā Piyer kə́ ngōmbang kəla yā Jeju Kərist n m̄-ndang makətūbə̄ ń toō ní. m̄-ndang m-ādə̄ i ngé gə̄ ń Nə́ɓā gə̄rādə́ á tḭ̄ḭ̄n̄ naā kə̄ loo gə̄ tə́ gō nang kə́ Po̰o̰ tə́ ō, Galasi tə́ ō, Kapados tə́ ō, Aji tə́ ō, Bitini tə́ ō ní.
2Bɔbə̄jí Nə́ɓā gə̄rāsí i kə gō ń ni-núməń kété ní, adə̄ sḭḭ̄ i deē yān gə̄ kə ta kūl̄ Ndílən, yā kadə̄ ōōī ta Jeju Kərist ō, kadə̄ mósən tə́go majaĺ yāsí gə̄ kadə̄ kemsí ndaa táĺ táĺ ō.
Ādə̄ Nə́ɓā rajəsí ngá̰ý ō, sɔl̄ kemsí ngá̰ý ō!
Kəndā kem dɔ ndi kə kumuú kə́ majə ngá̰ý kə́ ndɔ̄ń tə́ tə́
3Jə-tɔ̄yī Bɔbə̄ Kɔ́ɔ̄ɓē yājí Jeju Kərist, tām̄ ni-rāā kem majə sejí ngá̰ý! Ni-rāā adə̄ tél ojən̄jí gogə́ rang kə ta kūl̄ Jeju Kərist ń oy á ni ndólə̄n dan de kə́ koy gə̄ tə́ ní. I beé n jḭḭ̄ j-awīneé kə kəndā kem dɔ tə́ kə́ ndi kə kumneé ō, 4j-asiīneé rāā rɔ̄nel̄ yá̰á̰ kə́ majə gə̄ ń Nə́ɓā ngɔ̄m̄ tām̄ yā deē yān gə̄ tə́ ō ní. Yá̰a̰ gə̄ ngeé ń toō ní a ndumən̄ aĺ ō, yá̰á̰ kə́ majaĺ a tákə̄də́ aĺ ō, gíŕ ndə́lē yādə́ a gān̄g aĺ ō. Nə́ɓā ngɔ̄m̄ yá̰a̰ gə̄ ní dɔ rā̰ tə́ tām̄ yāsí tə́. 5Ba sḭḭ̄ kɔ́ gə̄, ré ī-taāī kem anī, Nə́ɓā kə́ tɔ́gən i ngá̰ý a ngɔ̄m̄sí yā kajəsí. Kajə ngeé ń toō ní, a gerə̄n̄ i ta ngóy ndɔ̄ gə̄ tə́.
6Ká ré yá̰á̰ kə́ tōr̄ gə̄ a reēn̄ dɔsí tə́ yā nāāsí yā kadə̄ rɔ̄sí nel̄sí aĺ gə̄gē anī, ī-rāāī rɔ̄nel̄ najə̄n tə́. 7I yá̰á̰ kə́ tōr̄ gə̄ ngeé ń noō n a nāān̄neé taā kem yāsí ní. Lɔ́r i yá̰á̰ kə́ to yā nujə kɔ̄ɔ́ ɓá tā, banī nōōnən̄ horoó. Adə̄ nāān̄ taā kem yāsí ń gātə̄n tɔȳ gātə̄ lɔ́ŕ ní, yā ka̰a̰ń tɔ́gən i tītə̄ ń noō ō. I beé n sḭḭ̄ ā ásiīneé kadə̄ tɔ̄ȳn̄sí ō, ɔsən̄ gɔnsí ō, rɔȳn̄sí ō, ndɔ̄ ń Jeju Kərist a teēń hɔy tə́ ní. 8Jeju ngeé ń toō ní kumsí a̰a̰n alé, banī sḭḭ̄ ī-tárniī. Ngɔlaā ní kumsí a̰a̰n alé ɓá tā, banī sḭḭ̄ ī-taāī kemən. I tām̄ najə̄ ń toō tə́ n rɔ̄sí nel̄sí ngá̰ý ní, ba rɔ̄nel̄ ní i ngá̰ý al̄ naā, adə̄ i kə́ dum̄ kəda. 9Rɔ̄nel̄ ngeé ń toō ní sḭḭ̄ āwīneé i tām̄ kajə kə́ ajən̄sí kɔ̄ɔ́. Yá̰á̰ ń ə́ngeī gír taā kem Jeju tə́ ní n noó.
10Ngé koō ta gə̄ sāān̄ gír najə̄ kə́ dɔ kajə ngeé ń toō tə́ ō, əndān̄ ma̰y ō. Adə̄ yá̰á̰ ń Nə́ɓā a rāā yā kadə̄sí karī ní, ni-əndā najə̄n tadə́ tə́ adə̄ ədan̄ kété. 11Nin̄-əhɔn̄ rɔ̄də́ tɔgə sāān̄ ger̄ ɓāl̄ ń yá̰á̰ ń Ndíl Kərist əda najə̄n ní a rāā yā rāań yá̰á̰ ní ō, nin̄-sāān̄ ger̄ yá̰á̰ gə̄ ń a rāān̄ yá̰a̰ ndɔ̄ ngeé ń noō tə́ ní ō. Tɔdɔ̄ Ndíĺ Kərist ngeé ń toō ń ndi kemdə́ tə́ ní, ədadə́ najə̄ yā yá̰á̰ kə́ tōr̄ ń a rāā yā rāā Kərist ní kété ō, ədadə́ najə̄ yā kɔsə gɔn ń a dān̄ gō yá̰á̰ kə́ tōr̄ ngeé ń toō ní ō. 12Najə̄ ń Nə́ɓā əndā ta ngé koō ta gə̄ tə́ adə̄ ədan̄ ní, ni teē kumdə́ dɔ tə́ adə̄ gerə̄n̄ kadə̄ najə̄ ní i tām̄ yādə́ nin̄ tə́ alé, banī i tām̄ yāsí sḭḭ̄ tə́. Ngé kɔjə Najə̄ kə́ Majə gə̄ ədan̄sí najə̄ ní ngɔlaā i kə tɔ́gə yā Ndíĺ kə́ Táĺ. Ndíĺ kə́ Táĺ ngeé ń toō ní, i Nə́ɓā ń ndi dɔ rā̰ tə́ ní n əla seneé ní. De kə́ dɔ rā̰ tə́ gə̄ gə̄gē nin̄ kɔ́ gə̄ kə dɔdə́ sāān̄ ger̄ najə̄ ní ō.
Ɓārə́n̄ ngé taā kem gə̄ kadə̄ unən̄ háĺ Nə́ɓā
13I tām̄ najə̄ ń noō tə́ n majə kadə̄ á̰a̰ī já̰já̰ dɔ rɔ̄sí tə́ ní. Ī-ndiī dɔ rɔ̄sí tə́ ō, yá̰á̰ ń Jeju Kərist a teē hɔy anī a adə̄n̄sí karī ní, ə̄ndāī kemsí dɔ tə́ mámák ō. 14Ōōī ta Nə́ɓā ba ī-lōōī rāā yá̰á̰ ń kété ngurən a rāāsí dan ń sḭḭ̄ ī-gerīneé yá̰a̰ aĺ ɓáý tə́ ní. 15Ba tītə̄ ń Nə́ɓā ń ɓāŕsí ní i de kə́ táĺ ní, ādī ɔ̄rī kam̄sí tām̄ yā Nə́ɓā tə́ tū yá̰a̰ rāāsí gə̄ tə́ malang ō. 16Tɔdɔ̄ makətūbə̄ yā Nə́ɓā əda na:
Ādə̄ ɔ̄rī kamsí tām̄ yā Nə́ɓā tə́, tɔdɔ̄ mā i de kə́ táĺ#1.16 K. 16: Á̰a̰ī Leb 11.44; 19.2.
17Nə́ɓā ń i nge gān̄g sarya dɔ de gə̄ tə́ malang, kə gō yá̰a̰ rāādə́ gēé kógə̄ḿ kógə̄ḿ ba i tām̄ ta kumdə́ tə́ aĺ ní, ré sḭḭ̄ ī-ɓār̄niī na i Bɔbə̄sí anī, ɔ́jiī kə̄ ndágá tū kəla rāāsí gə̄ tə́ kadə̄ ī-ɓōlíī ndílən, kə dɔ ndɔ̄ gə̄ malang ń ī-ndiīneé kə kumsí dɔ nang tə́ ní. 18Tɔdɔ̄ sḭḭ̄ kɔ́ gə̄ ī-gerī yá̰á̰ ń rāā yá̰á̰ á gāngə̄n̄neé dɔsí kɔ̄ɔ́ tū yá̰a̰ rāā kə́ kanjə̄ kumən gə̄ tə́ ń kaasí gə̄ ndóōn̄sí kə̄ kété ní. I yá̰a̰ gə̄ kə́ a nujən̄ kɔ̄ɔ́ tītə̄ gində̄ arjā̰a̰ aláa lɔ́r n gāngə̄n̄neé dɔsí ní alé. 19I kə yá̰a̰ gə̄ ń noō alé, ba i kə mósə Kərist kə́ gātə̄n i ngá̰ý. Ni-to i tītə̄ ngōn̄ batə̄ kə́ loon kógə̄ḿ nujə aĺ ō, kə́ yá̰á̰ kə́ majaĺ tákə̄n aĺ ō, kə́ tɔ̄lə̄n̄ ba tun̄ adə̄n̄ Nə́ɓā beé.
20Nə́ɓā gə̄rā Kərist i kété ta kəla gír kəndā dɔ rā̰ ō, dɔ nang ō tə́. Ba ɔjən̄ Kərist kə̄ ndágá ta ngóy ndɔ̄ gə̄ tə́ i tām̄ yāsí tə́. 21I kə ta kūlən n sḭḭ̄ ī-taāīneé kem Nə́ɓā ń ndólə̄n dan de kə́ koy gə̄ tə́ ō, ɔsə gɔnən ō ní. Adə̄ deē ń sḭḭ̄ ī-taāī kemən ō, əndāī tɔ́gə́sí dɔn tə́ ō ní i Nə́ɓā.
22Sḭḭ̄ ə́laī dɔsí gír najə̄ kə́ rɔ̄kum tə́ ī-tə́goīneé ngarān̄g kemsí adə̄ unjə̄ njáý njáý, i yā tárəń ngákó̰ó̰sí kə́ ngé taā kem gə̄ kə táŕ kə́ kanjə̄ gól̄ looó. I beé ní, ī-táriī naā kə kem kə́ ndaa tá táĺ, kanjə̄ kɔr ta tə́.
23Tɔdɔ̄ tél ojən̄sí gogə́ rang i kə kum kōō kə́ a ndum alé, banī i kə kum kōō kə́ dum̄ ndum, adə̄ i kə ta kūl̄ najə̄ yā Nə́ɓā ń i najə̄ kə́ ndi kə kumneé ō, a to kum gotən ō ní. 24Tītə̄ ń makətūbə̄ yā Nə́ɓā ədań ní:
Deē ndul to i tītə̄ mu beé ō,
Kɔsə gɔn yān malang to i tītə̄ hútə̄ mu kə́ bembeé beé ō.
Mu tutə anī hútə̄n ur̄ kɔ̄ɔ́.
25Banī najə̄ yā Nə́ɓā to gotoó ngándáńg#1.24-25 K. 24-25: Á̰a̰ī Ij 40.6-8
Tá najə̄ ní i Najə̄ kə́ Majə ń ɔjən̄sí ní.
Currently Selected:
1 PIYER 1: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.