Colosenses 1
1
So' Pablo ỹidénaqtena jaso' lidíise so' 'amaqténataxanaxaicpi 'me l'acháqa' di' Colosas
1Jaỹim Pablo, da' ñamaxaságuec chiỹoqot'ot ñi' Dios da' 'en jaỹim lamaxasec so' Jesucristo. Jaỹim ñauéctapegue' ñi' Timoteo. 2Sidíñi dójo' ỹ'aqtac 'ami ỹaqáỹa' 'me 'ad'acháqadii na' Colosas, 'ami 'me 'aup'íi'ỹa so' Cristo qataxa 'ami lalémaxase'te ñi' Dios. N'óota qomle da' 'auacoñiiỹet da'me liỹálaqtaxanaxac qataxa da' l'emáxac ñi' qadet'a Dios.
So' Pablo netameetapeelégue na' 'amaqténataxanaxaicpi
3Qo'mi naale ỹivíta da' 'ami ñachoxodenaxalóo'te, qana'chi sanaqtapecot da' qantónaxac ñi' Dios 'me let'a so' qadesaliaxanec Jesucristo. 4Qá'a ca'li sanómaq'a da'me 'uo da' 'adip'iỹáxaquii so' Cristo Jesús qataxa da' 'adoqopi'chii ỹima jen'me lalémaxasetpi ñi' Dios, 5ỹasouaxat da' 'anaquichíit'a ga'me jalchi'ena qoỹiỹamaxatétac da' 'ami ỹanema ñi' Dios qomle 'ovi'ỹague da' piỹem. 'Ami 'auacoñiiỹet da'me quitaxac ca'li 'anaquiáxañiiỹa da'me n'aqtac 'me 'eesa, da'me 'ónaxaic qadipí'ic 'me nec'alaxaqui. 6Dójo' n'aqtac 'me 'ami qoỹ'axatema joca'li, da'me ỹátaqta noqochíctaseguem qataxa 'uo da' jaláỹaxac ỹiméda naua' 'ale'u, 'ená'am da' 'oñíita ca'li ỹímta 'auanómi'ỹa da' liỹálaqtaxanaxac ñi' Dios, huá'a, qana'chi 'auaỹáchiñii da' ỹátaqta 'eesa da'me niỹálaqtaxanaxac. 7Qana'chi jeda'me 'ami ỹapaxaguenque so' qanauotaxaua qadaqáỹa Epafras. So'me mai'chi qad'onataxanaxaua, d'onataxaatapecot so' Cristo, ỹátaqchiiñi 'ami lecochiỹalo. 8Jeso'me qo'mi ỹ'axatema da' 'oñíita qataxa da'me 'adesóxodiquii 'me 'ami ỹanema so' Espíritu.
9Chan'eesa qo'mi jeso'me nolo' canale 'ami saỹátena', qana'chi qolqat'ot da' 'ami ñitamnaqátapeelóo'te, siỹaxanaqtapecot ñi' Dios da' maliaxa 'ami ỹaatetonaxanaxanque ga'me 'éetapeec ñi'me, qataxa da' 'ami ỹanema jen' ỹodapecachi naỹátenaxanaxac qataxa da' naatetonaxanaxac 'me chiỹoqo'ot so' Espíritu Santo. 10Qaidi nó'in da' 'adasoxoquii, 'ená'am da' lasoxoc na' quétapegue' so' qadesaliaxanec, qataxa qaidi 'av'íchiitac ga'me ỹiỹamaxaden so'me. Huá'a, qana'chi 'uo da' jaláỹaxac ỹima jen'me ỹiỹamqáchiiñipi 'me 'av'íchii, qataxa 'ami lateteque da'me 'auaatetoñíita ñi'me Dios. 11Qataxa siỹaxanaqtapecot ñi'me, da' qaidi 'ami ỹ'añaqtenque da' l'añaxac 'me qaỹa 'te 'ená'am da' li'ỹoxodic da' 'ami 'uañaxaiqa qa'e'n, qaidi 'uo da' 'anapogáxadenaxaquii qataxa da' 'antónaxaquii da' 'an'añaxachiiỹet ỹima na' chaqáina, 12qataxa da' 'auañiitapecot da' 'antónaxaquii ñi' qadet'a Dios, qá'a jiñi'me ỹaqátaxatapiỹe't ga'me qo'mi ỹanema 'me ỹ'axátet'am da' ỹanem ỹima jen'me lalémaxasetpi, qomle ỹivíta da' senoxonaxáaue ga'me l'edáxa ñi'me. 13Qá'a ñi'me qo'mi nec'alaxatee'guesopa joca'li da' lamaxasóxonaxac na' n'álaxa, huá'a, qana'chi qo'mi qolacháxaneeta da' lamaxasóxonaxac so' lauotaxat lec'óxot. 14Qo'mi nec'alaxatréegue da'me leleuaxa so'me, qataxa ỹapalaxa't ỹiméda naua' qadoico.
Da' leleuaxa so' Cristo ỹ'eteguet da' qonemá'ne' ñi' Dios
15Ñi'me Dios 'me sa di'ỹoq, jiñi'me naloxoola't qa'en da' lasoxoc so' lec'óxot, jeso'me 'uáichiiñi da' 'uo joca'li maliaxa qaỹa jen' chaqáina. 16Qá'a ỹachíỹoxotaỹi jeso'me joca'li ỹí'et ỹima jen'me huetalégue di' piỹem qataxa jen'me huetalégue jen' 'aléua, qataxa ỹima jen'me sa di'ỹoq, qataxa jen'me di'ỹoqóta. Nataq'en jen' net'alpi, damaxasóxonaac, nasoxola'pi qataxa jen' n'añaxacpi 'me sa di'ỹoq, ỹima chiỹoqóchiỹi jeso'me. Ỹima mai'chi lalémaxasetpi. 17So' Cristo jalchi'ena da' 'uo ca'li maliaxa qaỹa jen' chaqáina. Jeso'me naqaiso 'me n'eláxatetañi ỹima jen'me. 18Qataxa so' Cristo naqaiso so' laqaic da' nó'oquiaxac 'me naqáina jen' 'amaqténataxanaxaicpi. Jeso'me naqaiso 'me chiỹaqaỹi da' lec'alaxa da'me nó'oquiaxac. Jeso'me 'uáichiiñi da' nec'aliséguem da' chiỹaqáaue ga' napa'lpi, qaidi jeso'me na'chisóta 'oonolec nasoxola'. 19Qá'a ñi'me Dios sétaaque jeso'me Cristo da' ỹátaqta ỹimatá'ac ỹima da' lasoxoc ñi'me. 20Qataxa sétaaque nataq'en da' ỹachíỹoxotaỹi so' Cristo da' nemá'ne' ñi'me ỹima jen'me huetalégue jen' 'aléua, qataxa jen'me huetalégue di' piỹem. Qana'chi ỹí'et da'me n'emáxac, ỹachiỹoxochíchiỹi qa'en da' leleuaxa so' Cristo joca'li qoỹip'enaỹi jaso' nesodooso.
21'Ami joca'li 'ená'am da' ỹaqá'a 'auachiỹoqoi'ỹague qataxa 'aviñii nep'agué'ne' ñi' Dios jan' 'adiquidiaqchii, qá'a ỹasouaxat jen' 'av'íchiitac sa nó'inpi. Qaláxasa naỹi ñi'me Dios 'ami nemaa'to, 22ỹachiỹoxochíchiỹi qa'en da' leleuaxa so' Cristo ca'li 'uo da' ne'queténaxac da' ló'oquiaxac. Da'me ỹí'et ñi'me, qá'a sétaaque da' 'ami nichaalataxana'ualo ga'me huét'a, qataxa da' 'ami huesóte', qaỹa 'te ga' sega'me 'adesepaxanqai, qataxa ga' 'adesamaxataxaquii. 23Qaláxasa da'me ỹiuen qomle 'oquiỹiỹi da' 'adip'iỹáxaquii. 'Oñíit'em jaga' 'epaq 'me ỹátaqta qaỹa'ñiilo naua' lepatadi. Qataxa 'ená'te 'axañíiñi da' 'anaquitaxaquii 'me chiỹaqaỹi da' n'aqtac 'me nec'alaxaqui 'me 'anaquiáxañiiỹa. Jeda'me n'aqtac naqaida 'me qoỹ'axátetac ỹiméda naua' 'ale'u. Qataxa jaỹim Pablo naqaida da' s'axátetac.
So' Pablo qoỹin d'onataxaalégue so' 'amaqténataxanaxaicpi
24Naỹi ỹátaqta jaỹim mátac, qá'a 'uo da' ñi'queténaxac ỹasouaxat da' 'oñíita. Qá'a da'me ne'queténaxac jen' ỹalémaxaset ỹó'oquiaxac, da'me náaue da' qaidi semat jen' ne'queténaxac so' Cristo ỹasouaxat jen' 'amaqténataxanaxaicpi 'me naqáina 'me 'ená'am naua' leuoxose'te so'me. 25Ñi' Dios 'me chiỹoqot'ot da' ỹ'onataxanaxac 'me jaỹim ỹanem, qaidi 'ami s'onataxaalóo'te, 'ami 'amaqténataxanaxaicpi, qataxa da' s'axátetac ỹima da' l'aqtac jiñi'me, 26da'me l'aqtac 'me qaỹa 'te joca'li ga' ỹanómaxanaxanec so'me huá'au siỹaxadipi saua' 'ua'u 'uóidi. Qaláxasa naỹi jiñi'me ỹanómaxanaxanec jen'me lalémaxasetpi. 27Ñi'me sétaaque da' ỹanómaxanaxanec jen'me da'me nesaliaxa 'me 'uo da' l'ónaxac da' sétaaque da' ỹanem jen' sa judiopi. Da'me n'aqtaxanaxac 'eet'oi: So' Cristo 'ami huetaavlo, qataxa so'me naqaiso 'me ỹ'íchiñi da' 'anaquitaxaquii, qaidi 'ami taỹoto qom'chi ga' ni'ỹoxodic.
28Chan'eesa qo'mi s'axátaqtac so' Cristo. Saqátaqtapega ỹima na' siỹaxadipi, qataxa sapaxaguenqáta ỹima, qaidi ỹaỹáteeta ga' lasoxoc, qataxa qaidi ñi' 'oonolec ỹátaqta nichíctaseguem, qá'a ỹoqotéta'uo so' Cristo. 29Na'chida 'me 'uo da' jaỹim ỹátaqta semaac da' ñ'añaxataxac 'me jaỹim ỹanem so' Cristo da' s'onataxáatac.
Currently Selected:
Colosenses 1: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.