1 Tesalonicenses 1
1
So' Pablo qataxa saua' lecochaxa'u ỹidénaqteeta jaso' lidíise' so' 'amaqténataxanaxaicpi Tesalónica lé'ecpi
1Jaỹim Pablo, qataxa ñi' Silvano, qataxa ñi' Timoteo. Naỹi 'ami sedénaqtenalo jan' ỹidíise, 'ami ỹaỹi 'me 'au'amaqténataxañii 'me 'ad'acháqadii na' noic Tesalónica. 'Ami 'me 'auqochíita'uo ñi' qadet'a Dios qataxa so' qadesaliaxanec Jesucristo. Sétaaque da' 'auacoñiiỹet da' niỹálaqtaxanaxac qataxa da' n'emáxac 'me chiỹoqo'ot ñi' qadet'a Dios qataxa so' qadesaliaxanec Jesucristo.
Naloqtenaxanaxat da' lip'iỹáxac so' Tesalónica lé'ecpi
2Na'chi 'eeta't da' sanemáxam da' qantónaxac ñi' Dios, qá'a ỹima da' ñitónaqtapeeque 'ami. Qataxa da' ñitamnaq, qana'chi ỹitaxa 'ami seenataqat'alo. 3Ñi'me qadet'a Dios 'me souqat'ot, ñi'me 'me ỹaỹáten da' qadeenataxac naale seenataxa da' l'onataxanaxac da' 'adip'iỹáxaquii, qataxa da' 'adesóxodiquii da' 'aneuálaxaiñi'ỹi' na' qadaỹi, qataxa 'oquiit'ot da' 'anaquitaxaquii ñi' qadesaliaxanec Jesucristo. 4'Ami qadaqáỹa', ñi'me Dios ỹátaqta 'ami noqopitalo, qataxa saỹátenaqta ñi'me 'ami liquiỹáqa. 5Qá'a ca'li qo'mi 'ami s'axataxama da' n'aqtac 'me nec'alaxaqui, qaa'le sa 'te nedóxoiqa naua' qadetaxaỹaxaco. Qá'a qo'mi huetaavlo da' lañoqtaxanaxac so' Espíritu Santo, qataxa saỹátenaqta da' ỹátaqta 'eesa da'me s'axátaqtac. Qataxa 'ami ỹátaqta 'auaỹáchiñiita da' n'óota qadasoxoc ca'li 'ami souqátaavlo. Da'me náaue da' mai'chi 'adaỹamaqai.
6'Ami da' mai'chi 'auadénaxachii ca'li da' 'ónaxaic qadasoxoc qataxa da' 'ónaxaic ladíquiaxac so' qadesaliaxanec Jesús. Qana'chi ca'li 'auacoñiiỹet da' n'aqtac, qana'chi so' Espíritu Santo 'ami ỹanema da' 'adamáiqui. Chan'eesa temaqaidi da' jalcote da' 'an'queténaxaquii. 7Chan'eesa naq'áita da'me 'uo da' 'ami ỹilolóo'te qataxa 'ami ỹadénaxat ỹima jen'me 'amaqténataxanaxaicpi 'me net'alo diaa'me 'ale'u Macedonia qataxa di' Acaya. 8Qá'a 'ami chiỹoqótoovlo da' 'uo da' qaỹa'ague da' qoỹ'axátetac so' qadesaliaxanec Jesús. Sa na'chidíta da' ỹivíd'a di' Macedonia qataxa di' Acaya. Nalá'a na' siỹaxadipi 'me na'alo naua' qaỹa'alo 'ale'u, jen'me ỹaỹáten da' 'aup'íi'ỹa ñi' Dios. Chan'eesa qo'mi sa ỹáloxosa da' s'axátaqtac dójo'. 9Qá'a jen'me mai'chi n'aqtaxáatapiỹi da' 'éeta da' 'adasoxoqui ca'li 'ami souqátaavlo. Qataxa n'axátetapiỹi da' sa l'áxaic 'me 'oñíit'eque ca'li qo'mi 'auacoñíiỹeta, qataxa da' 'éeta ca'li 'oquí'ỹai na' 'chi noqolac 'me niquí'i da' qaidi 'oquíỹigue da' 'au'onataxañiỹot ñi' Dios 'me nec'alétaiỹi qataxa ỹataqtelégue 'eesa. 10Nataq'en jen'me n'axátetapiỹi da' 'ami 'auasóitaaque da' n'iỹílaq so' Jesús so'me lec'óxot ñi' Dios 'me n'iỹílaxaseguem chiỹaqáaue ga' napa'lpi. So'me 'me naqaiso so' qo'mi nec'alaxatee'guesopa qomle da' lichiquiaxac ga' ne'uaxánaguec na' siỹaxadipi 'me naỹa'quéna.
Currently Selected:
1 Tesalonicenses 1: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.