1 Corintios 1
1
So' Pablo ỹidénaqtena jaso' lidíise so' 'amaqténataxanaxaicpi 'me néta'ña di' Corinto
1Jaỹim Pablo, josii'chi mai'chi chiỹoqot'ot ñi' Dios da' jaỹim 'en lamaxasec so' Jesucristo. Jaỹim huet'asop ñi' qadaqáỹa Sóstenes. 2Naỹi 'ami sedénaqtenalo jan' ỹidíise, 'ami ỹaqáỹa' 'me 'au'amaqchíñiitac ñi' Dios, 'me 'oñíita'ña na' noic Corinto. 'Ami lalémaxase'te ñi' Dios, qá'a 'auqochíita'uo so' Cristo Jesús. Ñi' Dios ỹiỹaxanalo 'ami da' sétaaque 'en ỹoqovíchiỹi da' 'anchaalataxaquii, nataq'en ỹima jen' na'alo naua' 'ale'u laqáỹa' 'me netaméetapecot so' qadesaliaxanec Jesucristo, so'me nesaliaxanec jen'me qataxa nataq'en qo'mi. 3Sétaaque da' 'auacoñiiỹet da' l'ágaxanataxanaxac qataxa da' n'emáxadic 'me chiỹoqo'ot ñi' qadet'a Dios qataxa so' qadesaliaxanec Jesucristo.
Da' tónaxac 'me chiỹaqaỹi so' Cristo
4Jaỹim na'chi 'eeta't da' saatapecot da' ñitónaxac ñi' Dios, ỹasouaxat da' 'oñíita, qá'a so' Cristo Jesús 'ami neda'alo da' l'ágaxanataxanaxac ñi' Dios. 5Qá'a ỹasouaxat da' 'auqochíita'uo jeso'me, qana'chi ñi'me Dios 'ami ỹanema ỹima na' ỹodapecachi nesaliaxa 'me sa di'ỹoq da' 'ami ỹanema da' 'ad'aqtaxanaxaquii, qataxa da' 'adaatetonaxanaxaquii. 6Chan'eesa da' n'aqtaguec so' Cristo di'ỹoxoma da' ma'le 'ami ñaxachiilo. 7Naqaida 'me 'uo da' 'ami qaỹa 'te ga' 'avíñiitaaque jen'me Dios 'ami ỹanema, naỹi da' maliaxa 'auachíitaaque ga' nolo' qomle naloxon so' qadesaliaxanec Jesucristo. 8Jiñi'me ỹátaqta 'ami n'añaxateque, 'ami ỹividaxat'alo ga' loiquiaqa'éna, qaidi qaỹa 'te 'ami ỹipoleelóo'te ga' 'adasouaxaquii qomle nóvi' so' qadesaliaxanec Jesucristo. 9Ñi' Dios ỹátaqta ỹipaquetelóo'te naua' 'enapegalo, qataxa jiñi'me 'me na'chiñi 'me 'ami ỹiỹaxanalo da' 'aneuáñiỹa'uo da' l'óiỹaxac so' lec'óxot Jesucristo 'me qadesaliaxanec.
Colaxaỹi na' 'amaqténataxanaxaicpi
10'Ami ỹaqáỹa', 'ami sedolóo'te da' lenaxat so' qadesaliaxanec Jesucristo da' 'ami senapegalo da' ỹátaqta 'oonolec ga' 'adosáxaquii. 'Ená'te 'ami colqátaỹilo. Jaldáta da' na'chi 'eeta't da' 'auaqait'a't, 'oonolec ga' 'adeenataxaquii qataxa ga' 'oñíitapeec. 11Senaac dójo', 'ami ỹaqai'ỹolqa, qá'a 'uo na' l'acháqa' lé'ecpi jaga' qadaqáỹa Cloé jaỹim d'aqtaxáatapeguem da' 'uo na' nagaqten da' 'oñíita. 12Chan'eesa ỹátaqta 'ami ỹ'oqot'eque da' ỹodapecachi naua' 'anasaqáidapegueegue. Qá'a 'uo na' 'enaac: “Qamqaa'me jaỹim lauégaqtac so' Pablo;” qataxa 'uo na' 'enaac: “Jaỹim qamqaa'me lauégaqtac so' Apolos;” qataxa 'uo na' 'enaac: “Jaỹim qamqaa'me lauégaqtac so' Pedro;” qataxa 'uo na' 'enaac: “Jaỹim qamqaa'me lauégaqtac so' Cristo.” 13¿Qo'li sa 'te 'oonoleco' so' Cristo? ¿Qo'li jaỹim qoỹip'enaséguem da' seleelóo'te 'ami? ¿Qo'li qodachiláxanataxana da' ỹinaxat ca'li 'uo ga' qonachiláxan da' 'oñíita? 14Jaỹim saatapecot da' ñitónaxac ñi'me Dios da'me jaỹim qaỹa 'te ga' ỹachiláxanatac da' 'oñíita, jalsóta so' Crispo qataxa so' Gayo, 15qaidi qaỹa 'te ga' 'oonolec da' 'oñíita 'enaac da' l'aqtac: “Jaỹim qonachiláxanỹi da' lenaxat so' Pablo.” 16'Eesa nataq'en da' ỹachiláxanatac ga' Estéfanas qataxa ga' laỹi, qaláxasa sa 'te ñitouénec da' 'uootaxa 'uo ga' ỹachiláxanatac laqáỹa. 17Qá'a so' Cristo sa 'te jaỹim ỹamaxalégue da' sachiláxanataxan. Jaldáta da' jaỹim ỹamaxalégue da' s'axáteegue da' nec'alaxa. Qaláxasa sa 'te s'euóxona ga' laỹátenaxanaxac ga' 'chi siỹaxaua, qaidi sa 'te ỹisamaxáỹi da' leleuaxa so' Cristo joca'li qoỹip'enaséguem.
So' Cristo naqaiso so' lañoqtaxanaxac qataxa laỹátenaxanaxac ñi' Dios
18Qá'a da'me n'aqtaguec da' leleuaxa so' Cristo ca'li qoỹip'enaséguem, 'ená'am taa'le 'chi naỹáquiaxac da' demachíỹa jen'me taỹá'a da' daqat. Qaláxasa qo'mi 'me saqát'a da' qo'mi qonec'alaxatréegue, jeda'me n'aqtaxanaxac 'me lañoqtaxanaxac ñi' Dios. 19Qá'a 'enapega't naua' nedétrañi l'aqtaqa ñi' Dios, 'enaac:
Ñoláxachiñi da' laỹátenaxanaxac na' ỹátenaxanaxaicpi,
qataxa qaỹa 'te náaue qasen da' laatetonaxanaxac na' jaatetonaxanaxaicpi.
20Qana'chi naỹi ¿jái'chogamaxa huet'ague ga' ỹátenaxanaxaic, 'uootaxa ga' paxaguenataxanaxaic, 'uootaxa ga' ỹaỹáten da' ỹ'axat jen' huetalquéna? Qá'a da' naỹátenaxanaxac 'me l'achaq'áina, da'me 'chi naỹáquiaxac qa'en ñi'me Dios. 21Qana'chi ñi' Dios 'me ỹaỹáten ga'me ỹí'et, jiñi'me cha'li demachí'ỹa jen'me huetalquéna mai'chi naỹátenaxanaxac 'me sa ỹaateton jiñi'me. Jaldáta da' sétaaque da' nec'alaxatéegue na' ỹ'amaqten jiñi'me, chiỹaqaỹi qa'en jeda'me n'aqtaxanaxac 'me sega'me naỹáquiaxac qa'en na' laỹi.
22Na' judío lé'ecpi nimitét'ai da' ỹauáachiỹi na' n'anec 'me sa qoỹauanápiỹi. Na' sa judío lé'ecpi nimitét'ai na' nemái'i da' naỹátenaxanaxac. 23Qaláxasa qo'mi s'axátaqtac da' n'aqtaguec so' Cristo joca'li qoỹip'enaséguem. Na' judiopi da' demachíỹa dójo' n'aqtaxanaxac, qana'chi ỹátaqta nepecoxolégue. Qataxa na' sa judío lé'ecpi da' demachíỹa, qana'chi 'ená'am qa'en da' 'chi naỹáquiaxac. 24Qaláxasa jen'me Dios ỹiỹáxana judío lé'ecpi 'uootaxa na' sa judío lé'ecpi, jen'me ỹaateton so' Cristo da' naqaiso so' lañoqtaxanaxac qataxa laỹátenaxanaxac ñi' Dios. 25Qá'a na' siỹaxadipi da'me lepétaxac da' 'chi naỹáquiaxac da' naỹátenaxanaxac 'me chiỹoqo'ot ñi' Dios, jeda'me napacalégue da' naỹátenaxanaxac 'me hualquéna. Qataxa jeda'me qoỹíitapega da' qaỹa 'te da' lañoqtaxanaxac 'me chiỹoqo'ot ñi' Dios, jeda'me napacalégue da' lañoqtaxanaxac na' huetalquéna. 26'Ami ỹaqáỹa', 'ami 'aueenachíiỹa da' 'éeta joca'li 'ami ỹiỹaxanalo ñi' Dios, temaqaidi da'me qaỹasa da' 'adaỹátenaxanaxaquii jen'me huetalquéna, qataxa sa 'te lamai' naua' nalóda'uo da' net'a, 'uootaxa na' chiỹaqáaue jen'me sóxote maỹi. 27Jaldáta da' ñi' Dios ỹilotelégue jen'me qoỹimatét'ac da' qaỹa 'te ỹaỹátenaac, qaidi ỹ'aloqtet na' ỹátenaxanaxaicpi. Qataxa ỹilotelégue na' qoỹimatét'ac da' qaỹa 'te ga' l'añaxac, qaidi 'alóxoỹi lauel qa'en na' 'uañaxaicpi. 28Ñi'me Dios ỹilotelégue jen'me qaỹa 'te ga' li'ỹoxodic qataxa n'otánec, 'uootaxa jen'me sa 'te qoỹauápega, qaidi pa'l qa'en na' 'uo da' 'enec, 29qaidi qaỹa 'te taa'le 'uo ga' ni'ỹoxodéetapecot jiñi'me. 30Qana'chi jiñi'me mai'chi nachiỹoxola't da' 'auqochíi'uo qa'en so' Cristo Jesús, qataxa chiỹoqóchiỹi qa'en so'me da' qadaỹátenaxanaxac. Qataxa chiỹoqóchiỹi qa'en so'me da' qo'mi ỹiỹamaxade'n jiñi'me, qataxa da'me qo'mi lalémaxase'te, qataxa da' qo'mi ñic'alaxáiỹi. 31Chan'eesa “ga' sétaaque da' ni'ỹoxoden, n'óota da' ỹi'ỹoxoden so' qadesaliaxanec.” Naqaida 'me 'enapega't naua' nidii's l'aqtaqa ñi'me Dios.
Currently Selected:
1 Corintios 1: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.