Luka 9
9
1 #
Mat 10:1,7,9-14; Mk 6:7-13. Konyarau lutomon ka luarei nepepe, koinak apedor ka apolou kama ejaas ajokin kere, ka aitaŋaleun adekesia. 2Kiyakia kes alimonokin ajakanut naka Edeke, ka aitaŋaleun da lukadekak, 3#Luk 10:4-11; Asw 13:51. Kotema kes atiar, “Sirikiyaŋaasi ibore kere yenikerot, karaida ebela, karaida ecoe, karaida inyamat, karaida apesan, karaida ajaut kikason iarei. 4#Luk 10:5-7. Kaŋolitogo loilomanarete, kosalenenete nen, aitodol nainyounioto alosit. 5#Luk 10:11. Ŋul lumam kisukunyikinete yes, nainyounioto kotoma ore kaŋol, kilakilakenenete adae nuka akejenekus araut akajenak kamakec.” 6Koloto kesi, kiriamas ireria, elimonokinete Akiro Nukajokak, ka aitaŋaleun da kaŋiniibois.
7 #
Mat 16:14; Mk 8:28; Luk 9:19. Kosodi kiira ekabaka Kerode nukiswamao kere; kiyaloŋoŋ noi, naarai kebalas ituŋa ice ebe, ajaru Yokana kotoma okatwak; 8ka ice da ebe, “Atakanu Eliya”; ka ice da ebe, “Ajaru ediopet kotoma onabin lukolo sek.” 9#Luk 23:8. Kobala Kerode ebe, “Abu kajepa akou naka Yokana; konye iŋai bo lo loapupi eoŋ akiro nuetia nen?” Kokoto aanyun ŋes.
10 #
Mat 14:13-21; Mk 6:30-44; Yok 6:1-13. Kosodi keboŋut ikiyakia kitejenut Yesu akiro kere nuapotu kiswamata, Koyaŋa kes, kogita kiton ore loenyaritai Betesaida. 11Konye nakejenuniata ikodeta kotupasi ŋes; kisukunyik kes kaiyalama kolimok kes nuka ajakanut naka Edeke, kitaŋaleu da lukipudas aitaŋaleunio, 12Kejotaki akoloŋ; kopotu lutomon kaarei mama ejai, kotemasi atiar, “Kotwar ekodet, tetere elosete toma oreria ka amanat da nuidunyatar, kodumutu neeperete ka inyamat da; naarai kijaa ne amodiŋ.” 13Konye kotema kes atiar, “Koinakisi yesi kes lunyaman.” Kotemasi atiar, “Emamei sio ibore yenedeparit imugatin ikany ka agaria aarei; arai mam kilosit agwelakin etuŋat lo kere inyamat.” 14Naarai emwaasi ikiliok bala ilukumin ikany. Kotema ikekesisiak atiar, “Kisiboikis kes katukon bala akaisakany ŋinitukot.” 15Kiswamata kwaŋin, kisiboikis kes kere. 16Kolem imugatin lukany, ka agaria aarei, kosesen akuj, kisirereŋ kes, kobilibil; koinak ikesisiak akoranakin ekodet. 17#2 Ika 4:44. Konyama, kimonikinos kere; kotukonokinai atutubeta nuabilibila nukesalete, iditai itomon ka luarei.
18 #
Mat 16:13-28; Mk 8:27–9:1. Kosodi kanen, napilipi ŋesi kogitara, kojaas ikekesisiak nenipe kaŋes: kiŋit kes ebe, “Ebalas ikodeta ebe arai eoŋ iŋai?” 19#Mat 14:1-2; Mk 6:14-15; Luk 9:7-8. Koboŋokis ebe, “Yokana Lokebatisan; konye ice Eliya; ice da ebe ajaru ediopet konabin lukolo sek.” 20#Yok 6:68-69. Kotema kes atiar, “Ido bo yes kibalas ebe arai eoŋ iŋai?” Koboŋok Petero ebe, “Ijoŋ Kristo loka Edeke.” 21Konye kicor kes, kisimik alimokin idiotuŋanan akirot ŋin. 22#Luk 9:44; 18:32,33. Kobala ebe, “Ibusakinit Okoku loka etuŋanan aiticanio nuipu, egirete da imakio ka isasedotin lupeti ka ikewadikak, ka aiar, kapaaran da nakiwuniet ejaruni.” 23#Mat 10:38; Luk 14:27. Kolimok kes kere ebe, “Arai ekoto ituŋanan aitup eoŋ, koŋerokin ilopet, korioŋ ekemusalaba ŋinipaaran, katup eoŋ. 24#Mat 10:39; Luk 17:33; Yok 12:25. Naarai ŋin yenekoto aitaiar akeijar etwaniari; konye ŋin yenetwaniari akeijar kanukaŋ, itajari ŋes, 25Naarai ajokis anyoin arai kedumu ituŋanan akwapin kere, kitoolio arai kotwania akeijar? 26#Mat 10:33. Naarai yenirumete ileic kanukaŋ, kanuka akakiro da, irumete ileic Okoku loka etuŋanan da kanukeŋ, naebunio kaibusesuke, ka naka Papa, ka naka imalaikan da lukalaunak. 27Konye abeit katemari yes atiar, Ejaas ice kaluebwoete kane lumam iirete cut atwanare aitodol neaanyuniata ajakanut naka Edeke.”
28 #
2 Pet 1:17-18; Mat 17:1-9; Mk 9:2-9. Kosodi kanen akaulo kakiro kaŋun bala apaarasia akanykauni, koyaŋa Petero ka Yokana ka Yakobo, kodoka oroŋat ailip. 29Napilipi, kogelakin epone loke ereeteke, kiliacanata ikenapen komwekimwekete, 30Ido koany, kineras ituŋa iarei kaŋes, lukeraas Musa ka Eliya; 31#Luk 9:22. luketakanete kaibuses, kineras akiro nuka atwanareke naelosi ŋesi aitodolikin koYerusalem. 32#2 Pet 1:16-18; Yok 1:14. Kilurunito Petero ka lukejaas kaŋes ajo; konye nakekwenyuniata koanyutu aibusesuke, ka kwi da iarei lukebwoete kaŋes, 33Kosodi kanen, napetiakas kaŋes, kotema Petero Yesu atiar, “Ekapolon, ejok oni ajaut ne; aso keswamata iswamin iuni; ediopet lokon, ediopet loka Musa, ka ediopet da loka Eliya.” Komam ejeŋi nukinera. 34Napinera ŋesi ŋun, kobu edou, kiteribo kes; kokuriakaros nakelomariata odou. 35#Isa 42:1; Mat 3:17; 12:18; Mk 1:11; Luk 3:22. Kolom eporoto kotoma odou, kobala ebe, “Lo ŋes Okokuka, loseunaka; kiirasi ŋes.” 36Napinera eporoto ŋol, kotakan Yesu bon. Kililiŋata kesi, komam elimokinete idiotuŋanan kapaarasia kaŋun adiokirot kanuaanyut.
37 #
Mat 17:14-23; Mk 9:14-32. Kosodi kanen apaaran naatupakini nakedokuniata koroŋat, kiriamunos kekodet loepol. 38Ido koany, kiworo etuŋanan kotoma okodet ebe, “Ekesisianakinan, keŋaiŋait, koany ikakoku; naarai erai ikateluna; 39Ido koany, ikamununei ajokit ŋes, atipet isilalai; bobo da kisiilio, kokui ekuetete, mam inyeini dimarai kationis, idecideci ŋes, 40eŋaiŋa ikonikesisiak aireŋear ŋes, konye mam epedoro.” 41Koboŋok Yesu kotema atiar, “Wu okwe yes atur namam iyuunit, naepaarit, etodoli eoŋ ai ajaut kayes, ka atitiŋikinit da yes? Koyau ma ikonikoku ne.” 42#Luk 7:15. Napebuni kibirok ajokit kwap, kisiilio. Kiretak Yesu ajokit naerono, kitaŋaleu isapat kinyakak papake. 43Koumokis kere apolou naka Edeke.
Konye napeumokinitos kere akiro kere nueswamai, kotema ŋesi ikekesisiak atiar, 44#Luk 9:22.“Kitolomasi akiro nu akiikus; naarai einakinio Okoku loka etuŋanan akanin nuka ituŋa.” 45#Luk 18:34; Mk 9:32. Konye mam kes apotu kojenut akirot ŋin, kimunonitai kamakec, kinyeis amisiikin; koyoŋata aiŋit apolou naka akirot kaŋin.
46 #
Luk 22:24. Kogeut epeget kotomakec ebe iŋai bo kakesi eraun lokapolon. #Mat 18:1-5; Mk 9:33-40. 47Konye kejen Yesu epeget loka itauonokec, koyau ikoku yenididi, kisibwo kodieke, 48#Mat 10:40; Luk 10:16; Yok 13:20. kotema kes atiar, “Ŋin yenisukunyikini ikoku yen kokirorika kesukunyikinit eoŋ, ŋin da yenikesukunyikini eoŋ, isukunyikinit ŋol lokejukuni; naarai loerai loedit kokidiŋikus kere, ŋol ŋes erai lokapolon.”
49Koboŋok Yokana kotema atiar, “Ekapolon, kipou kaanyutu etuŋanan ireŋeari ajokin kokirorikon, kesimika ŋes, naarai mam kiupa kaoni.” 50#Luk 11:23; Pil 1:18. Konye Yesu kotema ŋes atiar, “Sirikisimika; naarai ŋol lomam erai lokasurupikus, erai lokowaikus.”
51 #
Mk 10:32; Yok 7:1. Kosodi kanen, keapuut apaarasiake nuka aitodokario, kitogogoŋ akonyeneke alosit Yerusalem. 52#Yok 4:4. Kijuka ikiyakia aliŋakin ŋes, koloto kolomasi ore loka Isamarian tetere itemokinete kanukeŋ; 53#Yok 4:9. konye mam kes apotu kisukunyikis, naarai atereit akekonyen aibe Yerusalem. 54#2 Ika 1:9-16. Keanyut ikekesisiak Yakob ka Yokana ŋun, kobalas ebe, “Ejakait, ikoto kecorakis akim kodoku kokuju komudia kes [kwape kolo eswamaa Eliya]?” 55Konye kibelokin, kitoron kes, [kotema atiar, “Mam ijenete epone loka emoyo loejai kayes. Naarai mam abunit Okoku loka etuŋanan amudiar aijar naka ituŋa, dimarai aitaiar.”] 56Koloto ore ece.
57 #
Mat 8:19-22. Napelosete kesi korot, kotema etuŋanan atiar, “Katupenenei jo kama ilosi kere.” 58Kotema Yesu ŋes atiar, “Ejaas ikuwei apanya, akweny da nuka apak ejaas akaisikec; konye Okoku loka etuŋanan emamei nama iperikini akekou.” 59Kotema ŋesi ece atiar, “Kotupunai.” Konye kobala ebe, “Ejakait, kisiikinai ber kalot keda papaka.” 60Konye kotema ŋes atiar, “Kinye lukatwak kidaata lukarwakakec; konye jo, kolot kolimono ajakanut naka Edeke.” 61#1 Ika 19:20. Kobala ece da ebe, “Ejakait, katupenenei jo; konye kisiikinai ber katwar ituŋa lukokaleka.” 62Konye Yesu kotema ŋes atiar, “Emamei yenetiŋit emeleku lokimoŋin, kosesen kau, yenibusakinit ajakanut naka Edeke.”
Currently Selected:
Luka 9: AOV1961
Highlight
Share
Copy
Want to have your highlights saved across all your devices? Sign up or sign in
Ateso Old Version Bible © United Bible Societies, 1961.