Luka 1
1
1Naarai apotu luipu kotamakis aiwadik kotenan akiro ŋun nuetodolikinos kamawok, 2#Yok 15:27. kwape kiilimonokiniata kwi lukeraas ikajenak lukeanyunito ameun kageunet, ido ikejaanakinak luka akirot kaŋin, 3#Asw 1:1. ketojok eoŋ da, naarai abu kamoote abeit naka akiro ŋun kere ameun kanusodit, kesuduny da, kewadikak jo Teopilo lokaibuses, 4tetere ijenuni abeit naka akiro nukiisisianakinio.
5 #
1 Siit 24:10. Kapaarasia nuka Kerode ekabaka loka Yudaya, kejai esasedoti ekekiror Sakaria, loka abeanakin naka Abiya: kerai aberuke naka aur naka Aaron, ekekiror Elisabet. 6Keraas kesi kere luedolito kakonyen nuka Edeke, kolosenenete kaicorakineta ka ikisila da kere luka Ejakait komam aitoronio. 7Kemamei kes ikoku, naarai arakakit Elisabet, ido kemojoŋito kesi kere.
8Kosodi kanen, nakiswamaa ŋesi aswam naka esasedoti kakonyen nuka Edeke, kwape kebeikinitor, 9#Any 30:7. kwape kejaar epone loka esasedotene, kobeik ŋes eroet alomar aibois nakalaunan naka Ejakait, aisupuruun lukisupurununo. 10Kilipi ekodet kere loka ituŋa kokiŋa kosawa loka aisupuruun. 11Kitakanikin ŋes emalaika loka Ejakait ebwoi kowai lokoteten loka etem loka aisupuruun. 12Nakeanyunia Sakaria ŋes, kiyaloŋoŋ, kokurianar. 13Konye kotema emalaika ŋes atiar, “Sakaria, sirikikurianar; naarai eirar akoniilip, kiwurikini jo akoniberu Elisabet ikoku yenisapat, imaikini ekekiror Yokana. 14Ilakar ijo, iyalamikin; ido isiyalamikinete luipu akeurunio. 15#Mar 6:3; Tub 13:4,5; 1 Sam 1:11. Naarai eraun lokapolon kakonyen nuka Ejakait, kwabo mam emasi ajon karaida nuitemerete; ilelebun Emoyo Lokalaunan, ameun kakoik naka totoke, 16Ido inyakuni ŋesi luipu kodwe luka Isirael mama ejai Ejakait Ekecedeke. 17#Mal 3:1; 4:5-6; Mat 17:11-13. Iŋareni kakonyeneke komoyo ka apedor naka Eliya, ainyakun itauon luka lukapapa mama ejaas idwe, ka lukepali mama ejai acoa naka ikadolitok; aitemonokin Ejakait ituŋa luesikapikinitai.” 18#Age 18:11. Kotema Sakaria emalaika atiar, “Ajenuni biai ŋun? Naarai amojoŋit eoŋ, akaberu da atuboros ikekar.” 19#Dan 8:16; 9:21; Bur 1:14. Koboŋok emalaika kotema ŋes atiar, “Eoŋ Gaburiel, loabwoi kakonyen nuka Edeke; keyakuunitai einer kajo, ka alimokin jo akiro nu nukajokak. 20#Luk 1:45. Ido koany, ililiŋi ijo komam ipedori einer, aitodol apaaran naedolioto nu, naarai mam iyuunit akakiro, nuitodolikinio kapakikec.” 21Edarito ituŋa Sakaria, koumokis kanu etumoror kaibois nakalaunan. 22Nakelomunia, mam apedori einer kakes: kojenut ebe aanyunit aitapoet kotoma aibois nakalaunan: kiyatak aitetem kakanin, kosal mam epedori einer. 23Kosodi kanen, nakitodolikinotor apaarasia nuka aijaanakinike, koboŋo oreke.
24Akaulo kapaarasia kaŋun kopotuu akeberu Elisabet; koŋop ilapio ikany, kobala ebe, 25#Age 30:23. “Kekonak Ejakait kwanata kapaarasia nukasesenia, tape kawoori ikaleic kakonyen nuka ituŋa.”
26Kolap lokikanyetekape aponi kijukunai emalaika Gaburiel kama ejai Edeke alosit Galilaya ore Nasaret, 27#Mat 1:16,18; Luk 2:5. mama ejai abekot nakisinerit ekiliokit ekekiror Yosep, lokokek loka Daudi; ekiror loka abekot ŋes Mariam. 28#Tub 5:24. Koloma emalaika mama ejai, kotema atiar, “Yoga, naisirereŋitoi noi, ejai Ejakait kajo!” 29Konye kiyaloŋoŋ ŋesi noi kanuka akiroke, koomoom kotauke ebe ikoni bo ai ayogan na, 30Kotema emalaika ŋes atiar, “Sirikiyoŋ, Mariam, naarai idum asianut kama ejai Edeke. 31#Mat 1:21-23; Tub 13:3; Isa 7:14. Ido koany, ipotuuni, idouni ikoku yenitelepat, imaikini ekekiror Yesu. 32#2 Sam 7:12,13,16; Isa 9:7. Eraun ŋol lokapolon, enyarao Okoku loka je Ioejai kuju kakuj; Ejakait Edeke einakini ŋes eicoloŋ loka Daudi papaake, 33#Mik 4:7; Dan 7:14. irumi ekek loka Yakob ikar kere; akejakanut da mam enaŋi.” 34Kotema Mariam emalaika atiar, “Ikwaikinete bo ai ŋun, naarai mam ajeni ekiliokit?” 35#Any 13:12; Mat 1:18,20. Koboŋok emalaika ŋes ebe, “Kidoikini jo Emoyo Lokalaunan, kirapiari agogoŋ naka Je loejai kuju kakuj; kanuka ŋun yeneuruunio enyarao yenikalaunan, Okoku loka Edeke. 36Ido koany, Elisabet kinacikon, ŋes da epotiei ikoku yenitelepat kotoma amojoŋuke; elap lo da ŋes lokikanyetekape loka ŋin nakenyaritai arakan. 37#Age 18:14. Naarai emamei akirot naikaruni Edeke.” 38Kobala Mariam ebe, “Koany, arai eoŋ abulesit naka Ejakait; kojaut mamakaŋ kwape kakonikiro.” Kosodi konyou emalaika kamakeŋ.
39Kapaarasia kaŋun konyou Mariam, kisunya alosit akwap nakiukon, kiton ore ediopet loko Yuda; 40koloma togo loka Sakaria kiyoga Elisabet. 41#Luk 1:15; Age 25:22. Kosodi kanen, nakiiraria Elisabet ayogan naka Mariam, kicuru ikoku kakoikike; kilelebai Elisabet Emoyo Lokalaunan; 42#Ikis 28:9; Tub 5:24. kodelo jokan, kotema atiar, “Isirereŋitoi jo kotoma aŋor, isirereŋitoi da araito nuka aliligetekon. 43Kepote bo nu kai, toto naka Ekajakait abunore mamakaŋ? 44Naarai koany, napadolunio ayoganikon akiika, kicuru ikoku kakoikika kanuka aiyalama, 45#Luk 1:20; 11:28. Isirereŋitoi da ŋin naiyuunit; naarai itodolikinio nualimokinitai ŋes kama ka Ejakait.”
46 #
1 Sam 2:1-10. Kotema Mariam atiar,
“Itopoloori ekatau Ejakait,
47Elelakinit da ekamoyo Edeke Ekaketaiaran.
48 #
1 Sam 1:11; Luk 1:25; Sab 113:5,6; Luk 11:27. Naarai aanyu ican luka akebulesit.
Naarai koany, amear lolo kanyaritos eoŋ aturio kere naitusulianyitai.
49 #
Sab 111:9. Naarai keswamaki Lokapedor nuepolok:
Lokalaunan ekekiror.
50 #
Sab 103:13,17. Akeitim ejai kaŋul lueyoŋito ŋes, Anatar aturio kere.
51 #
Sab 89:10; 2 Sam 22:28. Etodia agogoŋ kakekan,
Esiarisiar ikewoŋok kaomisio nuka itauonokec.
52 #
Yob 5:11; 12:19; Sab 147:6; 1 Sam 2:7. Ereŋea lukapolok koicoloŋokec,
Etopolo luitasonos,
53 #
1 Sam 2:5; Sab 34:10; 107:9. Esimoniki Iuketeŋei iboro luejok,
Epapel ikabarak.
54 #
Isa 41:8; Sab 98:3. Eitu akeitim,
Eŋaraki Isirael ekebulesit.
55 #
Age 17:7; 18:18; 22:17; Mik 7:20. Kwape kisumunio lukapapaawok,
Aburaam ka aurike apaarasia kere.”
56Kosalak Mariam kaŋes bala ilapio iuni, kosodi koboŋo orekec, 57Kosodi kanen kodol apak naka Elisabet aidoun, kidou ikoku yenitelepat. 58Kiirasi ikeidunyeta ka ikepajen ebe etopoloo Ejakait akeitim mamakeŋ, kiyalamikinos nenipe kaŋes. 59#Leb 12:3; Age 17:12. Kosodi kapaaran nakikanyetekauni kopotu aikep ikoku; kokotosi amaikin ekiror loka papake Sakaria. 60#Luk 1:13. Koboŋok totoke kotema atiar, “Mam, konye emaikinio Yokana.” 61Kotemasi ŋes atiar, “Emamei yenikajenakon yenemaikinitai ekiror ŋol.” 62Kokwetut papake ajenun ebe ekoto amaikin iŋai. 63Kilip ibore yenikiwadika, kiwadik ebe, “Ekekiror erai Yokana.” Koumokis kere. 64Atipet kopukoroi akeituk, kolacarai da akeŋalep, kiner, iturit Edeke, 65Kokuriakaros ikeceidunyeta kere, Kitisiarakinai akiro ŋun anatar akwap kere nakiukon naka Yudaya; 66kere lukiirarete koricata kotauonokec, kobalas ebe, “Aso eraun ikoku yen yenikepone enyoin?” Naarai akan naka Ejakait ajai kaŋes,
67Kilelebun papake Sakaria Emoyo Lokalaunan, kodwar kobala ebe,
68 #
Luk 7:16; Sab 41:13; 72:18. “Kituritete Ejakait Edeke loka Isirael, Naarai aanyana iketuŋa alaku da,
69 #
1 Sam 2:10; Sab 18:2; 132:17. Etonyoiki oni amumwarat naka aitajar Kokek loka Daudi eketelepat.
70Kwape enerar kolo kageunet
Kaituke nuka inabinoke lukalaunak;
71 #
Sab 106:10. Ebe kitaiari oni kama kalukasurupowok, Kakan da naka ŋul kere lukireito;
72 #
Sab 105:8; 106:45; Age 17:7; Leb 26:42. Itodoli aitim naesumunit lukapapaawok, Ka aiitun akeitutuket nakalaunan,
73 #
Age 22:16,17; Mik 7:20. Aitodolikin aiyaposit naeyapoikinit Aburaam papaawok,
74 #
Tit 2:12,14. Ainakin oni ketajarunos kakan naka lukasurupowok,
Kejaanakis ŋes komam kikuriaka;
75Kotoma alaunit ka adolit kakonyeneke Apaarasia kere nuka aiiarawok,
76 #
Mal 3:1; Mat 3:3. Ŋo da ikoku, kinyarao enabi loka Je loejai kuju kakuj;
Naarai iŋareni kakonyen nuka Ejakait aitemokin ikerotin,
77 #
Yer 31:34. Kitejen iketuŋa aitajario kotoma aisionio akecediakanareta,
78 #
Mar 24:17; Isa 60:1,2; Mal 4:2. Kanuka aitim nakotau loka Edekewok,
Kipejok oni Acilakide naabuni kokuju,
79 #
Isa 9:2; 58:8; Mat 4:16. Acaikin ŋul luiboete kotoma amuton,
Kotoribe da lokatwanare,
Aiteten awokokeie korot loka ainapakin.”
80 #
Mat 3:1. Kopoloor ikoku, kiyatanakin agogoŋor komoyo; kojai kamodiŋo aitodol apaaran nakitakanikinor Isirael.
Currently Selected:
Luka 1: AOV1961
Highlight
Share
Copy
Want to have your highlights saved across all your devices? Sign up or sign in
Ateso Old Version Bible © United Bible Societies, 1961.