Sofonías 1
1
Dawan ai kupia sauhkbia ba yua
1Dawan naha bîla nani ba Sofonías ra aisin, Amón luhpia waitna Josías#2 Ki 22.1-30; 2 Kr 34.1—35.27. Juda kingka aimaki kan ba piua ra. Sofonías ba Cusí luhpia waitna, naha ba Guedalías luhpia, witinka lika Amarías luhpia, naha sin Ezequías luhpia.
2Dawan naha kasak aisisa:
“Tasba ra diara nani bâra ba sut
âpu pali daukaisna.
3Upla, daiwan, piawira,
bara inska nani sut sauhki tikamni,
watawikira nani ba mina prukaika mangkamni bara
tasba wina upla sut âpu daukamni.”
Dawan naha kasak aisisa:
4“Juda uplika nani mapara yang mihti sakbamni,
Jerusalem ra iwi nani ba mapara sin.
Baal gâdka kuninkira ba naha tasbaya wina diki sakamni,
bara ai prîska nani nina ba sin.
5Utla nani bahna ra uli,
slilma nani ra ai pura suni ba,
ai gâdka Milcom#2 Ki 23.4-14. mawanra
ai lula kriki ai pura suni ba
bara yang nini ra sin swer taki ba sut sauhki tikamni.
6Baha nani yang wina ilihwi taki ba,
yang ra sin ai plikras hilpki sin makabras nani ba sut
sauhki âpu tikamni.”
7¡Man nani, Dawan mawanra sâp bas,#Ab 2.20; Sak 2.13.
kan Dawan yua pat aula sa bamna!
¡Dawan ba sakripais kum daukaia pat ridi pali sa,
bara paiwan uplika nani ba sin,
Dawan lamara ridi daukan sa!
8Dawan aisisa:
“Baha sakripais daukaia yua ra,
wihta nani ba,
king luhpia waitna nani bara
upla wala nani sut
iwanka natka wala dauki nani ba,
yang klala yabamni.
9Baku sin baha nani dur purak pâli dimi nani ba,#Dur purak pali dimi nani ba: Kaiks 1 Sa 5.5 ra naha tânka ulban ba, taibras purak pali dimi ba witin nani ai natka diara kum dauki ba tânka, aidul nani lamara uli waia ra playa nani bara ba, taibras lui waia.
bara baha nani kunin aisi implikan dukia nani ni,
ai dawanka watla banhki nani ba sin,
klala yabamna baha yua ra.”
10Dawan ba kasak aisisa:
“Baha yua ra Jerusalem ra
Inska Atkaia Getka ba wina
upla nani ini hilp makabi kabia.
Upla wala baha lamara iwi nani ba sin,
ai pura mata inbia.
Bara il bîla nani ba wina,
diara nani kauhi binka tara taki ba wali kabia.
11¡Ini, uhbi banhwi bas,
tawan pîska pakni ra iwi banhwisma uplika nani ba,
kan baha nani diara âiatkra sut ba prubia,
baha nani sut lalah wal, diara kwahki wauhi atki ba sin!
12“Baha yua ra, yang lamp kum brih,
Jerusalem uplika nani ba tilara pliki kaikamni.
Baha uplika nani ai âuyapah pali taki ba klala yabamna,
bara witin nani luki aisisa:
‘Dawan diara daukbia apia;
¡yamni sin apia, saura sin apia!’
13Baha mita sika,
ai dukia kukanka nani ba wal brih wabia,
ai watla nani ba sin slingban kabia.
Ai watla nani lika mâkbia,
sakuna bahara iwbia apia;
wain nasla nani sin daukbia apia,
bara sin dibia apia.”
14¡Dawan yua tara aula ba, pat baila sa!#Ais 13.6; Isi 30.2-3; Jl 1.15; Em 5.18,20; 8.9-14; Mal 3.2; Par M 6.17.
¡Pat klutka sa, baku sin isti pali aula!
Dawan yua binka tara ba,
saura, tahpla pali kabia,
¡kau kupia karnakira nani ba sin
ini wini kabia!
15Lawanka tara yua kum kabia,
kupia wirha bara sari pali.
Slingbi sauhkaia diara âpu kabia,
tihmia tara pali aihwa baman kabia,
kasbrika distika tihuka tara yua aimakbia.
16Trumpit puhbi karna winaia yua kabia,
tawan tara karna nani mâkan ba ra,
tawer purara paskan ba mapara sin.
17Dawan ba kasak aisisa:
“Upla nani ra yang aihni munamna,
nakras baku tauki kabia,
kan witin nani maipara saura daukan bamna.
Upla tâlia ba lî laiwi baku kabia,
wîna tara ba daiwan tâskika baku
pura-pura paski swin kabia.”
18Dawan lawanka ba yua ra,
upla silbar bara gul bri ba mita swaki sâkbia apia,
kan Dawan kupia baiwanka
pauta klauhan baku ba mita,
kuntrika aiska ba âpu daukbia.
¡Tasba ra iwi nani ba sut,
wan nakra klipan kumi ra âpu daukan kabia!
Currently Selected:
Sofonías 1: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua