Miqueas 1
1
Dawan bui Sameria lâka daukan ba
1Jotam,#2 Ki 15.32-38; 2 Kr 27.1-7. Ahaz,#2 Ki 16.1-20; 2 Kr 28.1-27. Ezequías#2 Ki 18.1—20.21; 2 Kr 29.1—32.33. king aimaki kan ba yua nani ra, Dawan naha bîla nani aisin, Moréset tawanka waitnika kum, nina Miqueas ra. Bara Sameria, Jerusalem wal purara pât nani aula ba tânka param marikan.
2Upla nani sut, naha bîla na
man nani aman pali wals:
Dawan ai tempelka watla sunukira ba wina,
man nani mampara witnis aisabia.
3Dawan witin takaski pliska ba wina takbia,
bara il nani pura bâk wapi balbia.
4Witin ai mina nani munhtara,
il tara nani sut slilwan kabia,
blas pauta lakni lamara slilwi lap tiwi ba baku;#Law 97.5.
lî aubra tara nani mita klaki daukan baku,
il bîla langnika nani ba, wâl ra kwâkan kabia.
5Jekob uplika nani,
Dawan mapara buan tâka wina
naha pâtka aula;
Israel luhpia nani saura daukan ba tâka mita sin.
¿Jekob mita mapara buanka daukata ba, anira sa?
¡Sameria tasbaya ra sa!
¿Dawan ra kulkras lâka ra,
Jekob mita lilka bahki nani paski,
bahara pura sunaia watla nani mâkan ba anira sa?
¡Jerusalem tasbaya ra sa!
6Baha mita, Dawan naha aisisa:
“Sameria tawanka tara ba yang daukamni,
tawan almuk nani slingwi luan baku;
wain mâ mangkaia tasbaya kum ridi ba baku swimna;
tawan bilara walpa nani ba sut
il bîla ra lulkamna
bara tawanka ba, utla playka nani baman swin kabia.
7Ai gâdka bahki, aidul lilka nani paski bri ba,
baha nani sut yuya man krikan kabia;
dus plamaya tara nani sunu bri ba,
baha sut angkan kabia,
kan rug mairin nani lalahka wal baha nani ba paskan sa,
bamna kli rugka mairin nani lalahka ra lakamna.”
Miqueas sari brih inan ba
8Baha mita kupi wirha bara sarikira ini kamna;
sûs sin âpu, kwala sin dimras watauki kamna;
yul wail talia daiwra ba baku ini kamna,
daiwan tnawira yahpa tara luhpia baku sin ini tauki kamna.
9Sameria wîna ba rakaia piua pât luan sa,
Juda ra sin baha sikniska pat alkan sa;
Jerusalem kat prukan sa,
baha tawanka ra yang upliki nani iwi ba.
10Naha bîla dahra na
Gat uplika nani ra wipara,
man nani sin ini kapara;
sakuna Bet-le-afrá#Bet-le-afrá: naha Hibru bîla kum, tânka ba tasba yuya watla. Sakuna baha pîska ba anira sa sapa wan marikras. uplika nani,
tasbaya pukpukika tilara aikarwi ini banhwi bas, latwan uba brisma bamna.
11¡Safir tawanka uplika nani,
man nani kwala âpu, swira lâka ba wal,
kangbi mai sakan tasbaya ra taki was!
¡Zaanán tawanka ra iwi uplika nani ba,
baha wina bal takaia lukbiara!
¡Bet-ésel uplika nani sari ini banhwisa,
bamna man nani ra sip tâm baikbia apia!
12Marot ra iwi uplika nani ba,
latwan pali bri ba mita ai wîna warbisa,
mahka pri takan daukisa,
kan Dawan mita daukan, sauhki tikaia pâtka ba
Jerusalem tawanka dimaika kat brih balan.
13Laquis ra iwi uplika nani,
man nani sika Israel luhpia nani nina bliki maipara buram,
Saion uplika nani ra munram saura daukan;
bamna araskam karnakira nani ba,
war aiklabaia waginka nani ra wilks.
14Bahamna nanara man nani Moréset-gat tawanka uplika nani ra
ban kaia ra kli wal prawaia apia lakula ba wis.
Aczib tawanka ba, Israel kingka nani mina alkaika kiwka takbia.
15Dawan bila wisa:
“Man nani, Maresá tawanka uplika nani,
mampara buaia bara puram lui
mai taibaia uplika kum kli blikamna;
bara Israel uplika tâ brabrira nani bâk sakan ba
lika, plapi wih Adulam walpaya untika ra dimbia.
16Bamna Saion tawanka uplika nani,
man nani tâmwa klaks, sari brisma ba tânka marikaia dukiara,
luhpiam nani latwan pali kaikisma ba tâwan;
tâmwa irbi, lamla ba usus lal baku lipni dauks,
uplikam nani ba taibi muni
tasba wala ra brih wan kabia bamna.”
Currently Selected:
Miqueas 1: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua