San Juan 13
13
Jesús kinmiikxipajpaka itlamachtijkawah
1Yoajsitiwalaya n ilwitl de Paskua, Jesús yokimatia yoajsia n ora para kikakajtewas nin tlaltíkpaktli iwa yas inawak Itajtsi. Ye nochipa okintlasojtlak iaxkawah non okatkah itech nin tlaltíkpaktli, iwa okintlasojtlak asta n iksemi tonati.
2Non yúali, ijkuak Jesús iwa itlamachtijkawah oyualtlakuajtokah, n diablo yokitlalijka itech iyolo n Judas Iscariote, ipiltsi n Simón, para makitemakti n Jesús. 3Jesús okimatiwalaya Itata yokimaktili nochi para Ye matlanawati, iwa yokimatia Ye owala de Dios iwa oksepa mokopaskia íwa. 4Ijkuakó Jesús omóketski de kan mesa, okimokixtili ikapa, iwa omotlajkoilpi ika se tsótsoli. 5Ijkuakó okitekak atl itech se xíkali iwa opé kinmikxipajpaka itlamachtijkawah iwa okinmaxotomaya ika n tsótsoli non ika omotlajkoilpijka.
6Ijkuak Jesús omijkuani kan Simón Pedro para kimpakilis ikxiwah, Pedro okili:
—Noteko, ¿Tejwatsi, techimpakilis nokxiwah?
7Jesús okinankili:
—Tlan Ne nikchijtok, te axa amo tikajsikamati, pero satepa tikajsikamatis.
8Pedro okili:
—Tejwatsi amayik techimpakilis nokxiwah.
Jesús okinankili:
—Tla amo nimitsikxipajpakas, amo timopoas nowa.
9Ijkuakó Simón Pedro okili:
—Noteko, tla ijkó, amo sanwel techimpakili nokxiwah, yej noiwa nomawah iwa notsonteko.
10Pero Jesús okili:
—Akin sikin omalti, sanwel moneki mamoikxipajpaka, porke ya chipawak. Iwa nomejwah ya nonchipawakeh, maya amo non nochteh.
11Jesús okimatia akin kitemaktiskia, yika okijto: “Amo nochteh nonchipawakeh.”
12Ijkuak yotlanki okimikxipajpak itlamachtijkawah, oksepa okimokentili ikapa iwa omotlalito kan mesa, iwa okinmili:
—¿Nonkajsikamatih tlan onikchi nomowah? 13Nomejwah nonnechnotsah Tlamachti iwa Noteko, iwa kuali tlan nonkijtoah, porke milák, Ne Nomotlamachti iwa Nomoteko. 14Iwa tla Ne Nomoteko iwa Nomotlamachti onomechinpakili nomokxiwah, ijkó noiwa moneki ximosepanikxipajpakakah. 15Porke ijkó kemi Ne onikchi moneki no ijkó xikchiwakah. 16De milajka, de milajka nomechilia se tlakéwale amo okachi weyijkatitok ke iteko. Ijkó noiwa, se tlatitlánili amo okachi weyijkatitok ke akin okitítlanki. 17Tla nonkajsikamatih iwa nonkichiwah tlan nomechilijtok, nonkipiaskeh miak pakílistli.
18'Tlan nikijtoa amo para nochteh nomejwah. Ne nikinmixmati inyolo akimeh onikimpéjpenki. Pero nika mochiwas tlan kijtoa n tiotlajkuíloli: “N tlakatl akin nowa tlapaloa, omíxkopki nowa.” Sal. 41:9 19Axa nomechilia nochi ni, para ijkuak ijkó tlamochiwas, xikneltokakah Ne Ni Cristo. 20De milajka, de milajka nomechilia: Akin kiselia akin Ne niktitlani, Ne nechselia, iwa akin Ne nechselia, noiwa kiselia Akin onechaltítlanki.
Jesús kinmilia Judas kitemaktis
(Mt. 26:20-25; Mr. 14:17-21; Lc. 22:21-23)
21Ijkuak Jesús okimijto ninteh tlájtolteh, saikpanoa oyoltélinki iwa okinyekili:
—De milajka, de milajka nomechilia, seme de nomejwah nechtemaktis.
22Ijkuakó n itlamachtijkawah opé motlatlajtlatah, porke amo okimatiah akin okitenejtoka. 23Seme de yejwah non Jesús okitlasojtlaya, omonakasiktekak itech Jesús ijkuak otlakuajtokah. 24Simón Pedro okichtakaili n Juan makitlajtlani n Jesús akin okitenejtoka. 25Ijkuakó okachi omijkuani inawak Jesús iwa okitlajtlani:
—Noteko, ¿akin mitstemaktis?
26Jesús okinankili:
—Nikajakis siki paj, iwa akin Ne nikmakas, ye nechtemaktis.
Ijkuakó Jesús okajaki n paj iwa okonmák n Judas Iscariote, ipiltsi n Simón. 27Ijkuak Judas okikua n paj, n diablo okalak itech iyolo. Ijkuakó Jesús okili:
—Tlan tikchiwas sansemi xikchiwa.
28Nion se de yejwah, akimeh otlakuajtokah itech mesa okajsikama tleka n Jesús ijkó okili n Judas. 29Kemi Judas okipixtoka n tomi, yejwah okiyejyekoliayah chamo Jesús okili makikoati tlan monekis para n ilwitl de Paskua, noso itla makintliokoli n próbesteh. 30Ijkuak Judas yokikua n paj non Jesús okonmák, sanima okiski, iwa ya yotleyuak.
Se yankuik tlanawátili
31Satepa ijkuak Judas yokiski, Jesús okijto:
—Axa moteititia noweyijkachiwalis Ne Akin onimochi ni tlakatl, iwa iweyijkachiwalis Dios motenextia itech tlan Ne nikchiwa. 32Tla Ne nikteititis iweyijkachiwalis Dios, ijkuakó Dios noiwa kiteititis noweyijkachiwalis, iwa san nima ijkó kichiwas. 33Nopilwah, mach ok wejkawas niyetos nomowah. Nomejwah nonnechtemoskeh. Pero ijkó kemi onikinmili n judíos axa nomejwah nomechilia: Kan Ne nio, nomejwah mach weletis nonyaskeh. 34Ne nomechmaka se yankuik tlanawátili: Ximosepantlasojtlakah, ijkó kemi Ne nomechtlasojtla, ijkó moneki ximosepantlasojtlakah. 35Tla nomejwah nonmosepantlasojtlah, nochteh n tlaltikpaktlakah nomechitaskeh nomejwah de milajka notlamachtijkawah.
Jesús kitematiltia Pedro kijtos amo kixmati
(Mt. 26:31-35; Mr. 14:27-31; Lc. 22:31-34)
36Simón Pedro okitlajtlani n Jesús:
—Tejwatsi, ¿kan timuikas?
Jesús okinankili:
—Kan Ne nimuikas, axa mach weletis tias nowa. Pero satepa weletis tias nowa.
37Pedro okili:
—Noteko, ¿tleka axa amo weletis nias mowa? ¡Tla moneki, asta nikmokawilis manechmiktikah por Tejwatsi!
38Jesús okinankili:
—¿Timotemaktis nopatka? De milajka, de milajka nimitsilia, achto de tlakuikas n kaxtil, te tikijtos eyi welta amo techixmati.
Currently Selected:
San Juan 13: npl
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.