Matai 2
2
Ukwisa kwa bamanyandondwa
1Bo apapigwe Yesu nkaya ka Betelehemu nkisu kya muYudai, mmasiku ga ntemi Herodi, popapo balinkuboneka muYerusalemu abamanyandondwa aba bafumile kubusokelo ilisuba, balinkuti, 2“Ali kugu umalafyale gwa baYuda umpapigwa lilino? Namanga tulubwene ulutondwa lwake kubusokelo ilisuba, twisile kukubunguluka kumyake.” 3Umwene umalafyale Herodi bo apilike sisisi, silinkunnyomosya, bope naba nkaya ka Yerusalemu balinkunyomokelalumo nagwe. 4Lelo bo ababungenie abaputi abakulumba nabamanyandagilo ba bandu, alinkubalalusya alinkuti, “Kali mo moki muno isakupapigwaga Kristi?” 5Abene balinkumbula balinkuti, “Mo nkaya ka Betelehemu nkisu kya muYudai; buno lyo lyasimbigwe nunsololi ukuti:
6 #
Mika 5.2
‘Nugwe gwekaya ka Betelehemu gwe uli nkisu kya Yuda,
ungatigi uli nnandimbalagili ba nkisu kya Yuda;
kabuno mmyako isakufumamo undagili,
uyu isakubatimaga abandu bangu abanya Israeli.’ ”
7Popapo Herodi alinkubabilikila kubutitu abamanyandondwa, alinkubania akabalilo aka lwabonekile ulutondwa. 8Alinkubatuma nkaya ka Betelehemu alinkuti, “Amubukege mukandondegefiyo umwana; linga mumwagile, mwisemumbule, ukuti naninembuke ngambungulukilege.” 9Abene bo bapilike amasyu ga malafyale, balinkubuka, balinkwaga ulutondwa ulu balubwene kubusokelo ilisuba, lubalongolile nkyeni nukwakwima pamwanya pabuyo bubo alipo umwana. 10Lelo bo balubwene ulutondwa, popapo balinkuya nulusekelo ulukulumba fiyo. 11Balinkwingila nnyumba, balinkumbona umwana pamopene na Maria unna. Popapo balinkufugama pasi, balinkumbungulukila; abene bo basakwile ifyuma fyabo, balikunninga ifyabupe, golide, lubani na mira. 12Bo basokigwe munjosi ukuti bangagomokelaga kwa Herodi, balinkwenda injila iyingi ukubuka kumyabo.
Ukubopela nkisu kya Egiputi
13Lelo bo babukile, po ugwandumi gwa Ntwa alinkunsetukila Yosefu munjosi alinkuti, “Sumukaga, umwegege umwana nunna, uyongelege nkisu kya Egiputi, ukayege mumo ukwisakufika papo nisakukubulaga; namanga Herodi ikuya pakundonda umwana ukuti angoge.” 14Popapo Yosefu alinkusumuka alinkumwega umwana nunna pakilo, alinkubuka nkisu kya Egiputi. 15#Hos 11.1Alinkuya mumo ukwisakufika papo afwilege Herodi; ukuti mo simalikilege sisyo uNtwa asiyobile munsololi apa atigi, “Nalimbilikile umwanangu ukufuma nkisu kya Egiputi.”
Herodi ikubagoga abana nkaya ka Betelehemu
16Umwene Herodi bo agile asyobigwe nabamanyandondwa, alinkukalala fiyo; alinkutuma kukubagoga abana abalumyana bosa aba nkaya ka Betelehemu na mumbafu syake syosa, ukufuma pabafyinja fibili ukufika pabafyele, ukufwana nakabalilo aka apilike kubamanyandondwa. 17Silinkwisa sisyo asiyobege unsololi Yeremiya apa atigi,
18 #
Yere 31.15
“Ilisyu lyapilikigwe nkaya ka Rama,
inguto insisya nukwililisya ku kwingi,
Rakeli bo ikubalilila abanake,
ikukana nukusubisigwa, papo bafwile.”
Bikugomoka ukufuma nkisu kya Egiputi
19Lelo bo afwile Herodi, popapo ugwandumi gwa Ntwa alinkunsetukila munjosi Yosefu nkisu kya Egiputi, 20alinkuti, “Sumukaga umwegege umwana nunna, ubukege nkisu kya Israeli, namanga bafwile aba babulondaga ubumi bwamwana.” 21Umwene Yosefu alinkusumuka, alinkumwega umwana nunna, alinkubuka nkisu kya Israeli. 22Loli bo apilike ukuti Arikilau yo ikukilagila ikisu kya Yudai mbuyo bwa gwise Herodi, alinkutila ukubukamo; lolibo asokigwe munjosi, alinkubuka nkisu kyamu Galilai. 23#Mar 1.24; Luk 2.29; Yoh 1.45Alinkubuka alinkwakuyenga nkaya aka batigi Nazareti; ukuti sisege sisyo syayobigwaga nabakunguluka ukuti, “Isakuyobigwaga ukuya nNazareti.”
Currently Selected:
Matai 2: NNBII
Highlight
Share
Copy
Want to have your highlights saved across all your devices? Sign up or sign in
BAIBULO INONGWA INUNU © Bible Society of Malawi, 2017.