2 Samoela 1
1
I Davida mandre ny nahafatesan’i Saoly
1Taorian’ny nahafatesan’i Saoly, dia niverina tao Tsiklaga i Davida ka nijanona roa andro tao rehefa avy nandresy ny Hamalekita#1.1 ny nahafatesan’i Saoly: jereo 1 Sam 31.4-5. –Tsiklaga: jereo 1 Sam 27.6 sy nta. –rehefa avy nandresy...: jereo 1 Sam 30.. 2Tamin’ny andro fahatelo, nisy lehilahy iray tonga avy any amin’ny tobin’i Saoly. Triatriatra ny akanjony ary feno tany ny lohany. Koa rehefa mby teo amin’i Davida izy, dia niankohoka tamin’ny tany. 3Ary nanontany azy i Davida hoe:
–Avy taiza moa ianao?
Dia hoy ny navaliny:
–Avy nandositra ny tobin’i Israely aho, tompoko.
4Ka hoy indray i Davida taminy:
–Fa nanao ahoana avy ny zava-niseho tany? Mba tantarao amiko.
Dia hoy izy hoe:
–Nitsoaka nandositra ny tafik’i Israely ary betsaka ny miaramila maty. Ary i Saoly sy i Jônatàna zanany koa samy maty.
5Hoy ihany i Davida tamin’ilay zatovo mpilaza vaovao:
–Ahoana no nahafantaranao fa maty i Saoly sy i Jônatàna zanany?
6Ka novalian’ilay tovolahy hoe:
–Sendra teo an-tendrombohitra Gilbôa#1.6 Tendrombohitra Gilbôa: jereo 1 Sam 28.4 sy nta. aho, raha nahita an’i Saoly nitehina tamin’ny lefony; ary efa nanakaiky azy tamin’izay ny kalesy sy ny mpitaingin-tsoavalin’ny fahavalo. 7Dia niherika izy ka nahita ahy; nantsoiny aho, ary hoy aho taminy: «Inty aho, tompoko!» 8Dia nanontany ny amiko izy, ka nolazaiko azy fa Hamalekita#1.8 Hamalekita: jereo Eks 17.8 sy nta. aho. 9Koa nasainy nanatona aho mba hamono azy ho faty satria naratra mafy izy na dia mbola mahatsiaro tena tsara aza. 10Nohatoniko izy ary novonoiko ho faty, satria fantatro fa tsy ho velona amin’ny ratra nahazo azy izy. Koa nalaiko ny satroboninahitra teny an-dohany sy ny haba teny an-tsandriny ka ireto nentiko atỳ aminao ireto, tompoko.
11Notriarin’i Davida ny fitafiany ary mba nanao tahaka izany koa ny olony rehetra izay teo. 12Mandra-paharivan’ny andro izy ireo dia nitomany sy nifady hanina ary nisaona an’i Saoly sy i Jônatàna zanany mbamin’ny Israelita izay maty an’ady ka anisan’ny vahoakan’ny TOMPO. 13Ary hoy i Davida tamin’ilay zatovo mpilaza vaovao:
–Fa mba iza moa ianao?
Ka novaliany hoe:
–Zanaky ny Hamalekita mpifindra monina aho, tompoko.
14Dia hoy i Davida taminy:
–Ahoana no nahasahianao naninji-tanana ka nahafaty ny mpanjaka voafidin’ny TOMPO?
15Ary niantso ny mpanompony anankiray i Davida ka nibaiko azy hoe:
–Mandehana vonoy any ilehio!
Dia nasiany izy ka maty. 16Ary hoy i Davida taminy:
–Nandrora mitsilany ianao izao ka nahavoa tena. Ny vavanao ihany no nanameloka anao ho faty raha nanao hoe: «Izaho no namono ho faty ny mpanjaka voafidin’ny TOMPO.»
Kalo fisaonan’i Davida an’i Saoly sy i Jônatàna
17Namorona izao hira fisaonana an’i Saoly sy i Jônatàna zanany izao i Davida, 18ka nasainy nampianarina ny mponin’i Joda. Indro ny «Hira fisaonana atao hoe Tsipîka» araka ny voasoratra ao amin’ny Bokin’ilay Marina#1.18 Bokin’Ilemahitsy: jereo Jos 10.13 sy nta..
19Ry Israely ô, ireo mpiady reharehanao
dia mitsitra eny an-tampon-kavoanao.
Indrisy fa maty ireo mahery fo!
20Aza aely any Gata izany vaovao izany
na torina eny an-dalamben’i Askelôna#1.20 Gata, Askelôna: jereo 1 Sam 5.8; 6.17 sy nta.,
fandrao hifalian’ny vehivavin’ny Filistinina
na hibitahan’ny tovovavin’ny mpanompo sampy.
21Ianareo tendrombohitr’i Gilbôa#1.21 Tendrombohitr’i Gilbôa: jereo 1 Sam 28.4 sy nta.,
aza misy ando na orana intsony eo aminareo
na koa saha be vokatra hangalam-panatitra,
satria teo no nahafa-baràka ny ampingan’ny mahery fo,
dia ny ampingan’i Saoly tsy hihoso-diloilo intsony.
22Teo anoloan’ny ran’ireo Filistinina nitsitra,
ny tsipîkan’i Jônatàna tsy mba nihemotra;
teo anoloan’ny hatomadin’ireo fahavalo mahery fo,
ny sabatr’i Saoly tsy niveri-maina.
23I Saoly sy i Jônatàna dia nifankatia tokoa fahavelony,
ary tsy nosarahina na dia tamin’ny nahafatesany aza;
mailaka noho ny voromahery izy mianaka
ary mahery fo mihoatra noho ny liona.
24Ianareo vehivavy israelita,
mitomania an’i Saoly
izay nampitafy jaky kanto anareo
sady nandravaka volamena ny fitafianareo.
25Indrisy fa maty an’ady ireo maherifo
ary i Jônatàna mitsitra eny an-tampon-kavoanao!
26Malahelo anao aho, ry Jônatàna rahalahiko;
eny, nankamamiko fatratra ianao.
Mahatalanjona ahy ny fitiavanao,
fa sarobidy noho ny fitiavan’ny vehivavy.
27Indrisy fa maty ireo maherifo,
ary very ny fitaovam-piadiana?
Currently Selected:
2 Samoela 1: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.