MARKU 1
1
Baptisma Byid: Su: Yohan Kho" Kyo" Da Khyoo:-
(Mat 3:1-12; Luk 3:1-8; Yoh 1:19-20)
1He: zigi Mangso nya: zoo; Yesu Khrsitu da khyoo:- ngeibu: ludang: nghoid bye. 2Lapi: Esaia lhid" to" ziyo' dakhyoo" ti bue" loo bye- Mangsoo tid zigi ‹‹Yu" ge' re" shid moo re" da" khyoo: ri nyheung byid: wa shid re" nga" lagyo: ri ngoo nhang: kaid bye. 3Dain" pyoid yoo moo dayug nyho: nyid da" thui: gi Aseing: da" khyoo: ri nyheung too" ge'. nya: khyoo: ri jang jang nyheung to" ge' ga:›› 4Yohan gi dain" pyoid yoo moo thu' re" wigi Baptisma kham yu wa khyoo: kho" kyo". Nanu" yooboo mo lheung: lo lho: Babtisma kham: yu wa: byu phung: joem ri nyang tid. Houg: lang" Mangsoo: gi nanu" da" yooboo joem ri khyoid byid: wa. 5Yerusalem voobyu yi dangain" mo, yo' Yuda meing: goin" jang: mo byu yi Yohan jang khyoo: yhe: lho: nyang nya: yooboo joem ri xoo: yhen: yu ziyo' nyangnu" gi nya: lo, moo Yodan gyidlang mo Babtisma ri kham: yu. 6Yohan gi Gola-ug moug" yo' yo, da" byi: ri vhoid ci: lho: shooyid phyid" cu" ri cu" ci: da. Nya: zoo: neom gi jhen" khyeig nyoug yo' siyoo mo byoo: yhid: nghoid. 7Houg: lang" Yohan gi Nga" thang: moo ju" ri wa yug gi nga" tho' moo yoem: so' je boo: su: nghoid da:- ngoo gi nya: khyid: baid tei" goeb phoid: byid: wa zilang" amoin: yi" ga: nyang: gi byu phung: yi ri tid fu". 8Ngoo gi nanu" ri gyid moo Babtisma byid:- nghoid loug we' nyang: gi nanu" ri gyeungshang: Venyi: mo Babtisma wa.
Yesu Babtisma Kham: Yu Ziyo' Jhu, Phyo, Shau" Khyoo:
(Mat 3:13—4:11; Luk 3:21-22; 4:1-13)
9Hau: thang: amyang" ri Yesu gi Galile meing: Nazared voo gung mo ju" re" Wigi-Yohan da" lo, mooYodan gyung: mo Babtisma kham: yu bye. 10Gyid mo thu loo lang" - moug gung bang" lo" lho: gyeungshang: Venyi gi pheung" kyoug" yhang: ti"- nya tho moo re" gyoo" no: ziri nyang: myang. 11Houg: lang: moug khung: mo thui: tid thu' re" zigi nang gi ngoo jheddab da" nga" zoo: nghoid- nang ri; ngoo gye" vho: ngei nyid ga: tid. 12Houg: lang" Venyi gi nyang: ri dain" pyoid yoo khyoo: yhi: wa shid' re" joug jhoin" kaid bye. 13Nyang: gi dain" pyoid yoo moo bidnyid myid: xi: nyid"- zhadain wigi jhu, phyo' zi shau nyid. Houg: moo soo" yo gougnyhoug joem we' nyid ago". Nghoid loug we' mau: Lagyoo: yi gi - nyang: ri re" yu" coung: goin ago".
Ngoo: Kuang Byu Myid: Yug Ri: Yesu Khe: Da" Khyoo:
(Mat 4:12-22; Luk 4:14-15; 5:1-11)
14Yohan ri thung: myeug lhoung pyam thang: ri Yesu gi Mangso jang" mo ngei bu: ludang: khyo" wa Galile moug: khyoo: yhi bye.- 15Ayo, byeung" bye- Mangso mungdain ju" ri" bye- nanu" da" youg: mo yooboo mo lheung: lho ngeib: ludang: ri loem" jeing" loo: ge' 16Yesu gi Galile thoem" yam moo so" lo" nyid da" uri ngoo: kuang zo: byu- Simon yo' nya: nhung" andre eig yug - goin du" yen" ziri lo" myang. 17Yesu ginga" thang: cang ge' Ngoo gi natang: ri byu kuang wa shid re" jhoug" byid: wa nyangnu" ri tid. 18Houg: lang" jang:- nyangnu" gi goin joem ri to" pyam kho' lho: nya: jhang cang loo" bye. 19Daso' zoo: yhe: lo" ri nyang: nu" da" lhid' tho moo goin pho: nyid da" Zebedi nya: zoo: Yaku yo' Yohan tang: ri myang. 20Nyangnu" ri myang lang" Yesu khe: kaid bye Houg: nya: eig yug gi nya: phoo Zebedi we' vhu" kung: yi yo' dage" lhid' tho' moo nyhed too" kho' lho: Yesu jang" moo bo cang loo" bye.
Yu dab Da" Byu Dayug Khyoo:
(Luk 4:31-37)
21Nyangnu" gi Kaperna-um voo khyoo vang yhe: lo" ago"- Dougno: Bidnyid ri Yesu gi Tarha" jung moo vang yhe: lho: jhoug" byid: nyid. 22Nyang: jhoug" byid: da" khyoo ri shau" gyo: da" mung" byu yi gi gye" gyo: mau" nyid boem ago". Khasu" wim ga: ri nyang gi moug soug lhid' da" sara: yi yhang: ti anghoid- amyeung: ana: yoo" su: yhang: ti" jhoug" byid: nyid. 23Houg lang" tarha" jung moo re: bo nyid da" yu dab su: dayug gi agoin: nyho: yoid lo wigi 24Nazared mo Yesu we"- nang yo' ngoonu" cisen: la". Ngoonu" ri lhu: phyo' pyam wa ein: ju" re" la". Nang hang" nghoid ziri ngoo se'. Nang gi Mangso gyeungshang: lagyoo: nghoid» ga: tid. 25Houg: lang: Yesu gi sam": zoo: nyid we' nyang: mo thu' loo: we' ga: yu ri amyeing" khyo' kaid. 26Hau: yu gi nyang ri lang: thain: lheung: kaid ziyo nya jang" mo zeug yoid thu' lo". 27Meing: byu yi dangain: mo, mau" hang" to" boem wigi hid: gi cenoem koid lha"- Hau: zigi cite" da" jhoug" byid: khyoo: aseig nghoid lha". He: yug gi yu ri amyeing" byid: wa amyeung a na: boo su; nghoid zigyo' - nyangnu" tam: gyo: nyid ga: nyang cang" nyang: tid go" nyid ago". 28Hau: ludang: khyoo: gi Galile meing: goem: sho' moo phyed ga: fu" nheung lo" boem bye.
Mung" Byu Myoo" Sho ri Yesu Noo Phyoo" Ge Loo" nhang: Khyoo:
(Mat 8:14-17; Luk 4:28-41)
29Houg: lang" Yesu yo' nya: cangzoo: yi gi tarha" jung mo, thu' lo" lho: Yaku yo' Yohan eig yug yo' dage" Simun yo' Andre tang: yheom: khyoo: zheung: vang lo" ago". 30Yesu Ju" vang yhi: yo' Simon da" yug myhi, gi nuyoem" no wigi yhoeb joyoo moo leung jo, da" myiyi myhi khyoo: nyang: ri tid kyo" ago". 31Nyang: myiyi: myhi jhang khyoo: yhe: lho: nya: lo, wigi nyang: ri she: to' kaid. Houg: lang" jang: nuyoem" ge lo" byug ziyo' nyangnu" ri dei zhoo" dei jhoug bye:. 32Myenthang: bidvang jham" lo" yo' ju" lang" Noo phyoo" shau" nyid da" mung" byu yi dangain" yo' yu vang ci: mo, we' Yesu jang" moo shu" re" boem ago". 33Voobyu yi dangain" mo, yhoem: pain moo re" zeung: foem: to" ago". 34Houg: lang: Yesu gi noo phyoo" aja: ja: shau" mo, ri ge loo" nhang: ziyo' yu myoo" sho' ri we' khaid pyam" byid:- nyang: gi yu joem ri dang: tid wa akhang" abyid: nghoid da:- Khasu" wim ga: ri Yu joem gi nyang hang" nghoid ziri se' ago".
Yesu Galile Moo Mungdang: Kho" Khyoo:
(Luk 4:42-44)
35Thang: nyid: nab kyoo moug: boo" myen: ri yesu to' lho: myen, jham" da" jo yoo daloem: moo akyu" yhe: mho' nyid, 36Nghoid loug Simon yo' nya: byin cang" yi gi nyang: ri cang sho: yhe: lo"- 37Yhe: sho: myang lang" dangain" mo, nang ri sho" nyid boem ago"- ga: tid kyo" boem. 38Nghoid loug we Yesu tu" lho: he: lheung goem: mo voogung joem moo ngoo yo" kho" kyoo" wa ziyo' goo" voo khyoo: ngoonu" yhe: lo" boem: shang - ciwim gari hau: shid mo ngoo ju" re" zi nghoid ga: tid. 39Hougsu" wim nyang: gi Galile meing: goem: sho' moo so" yen" wigi tarha" jung khang" moo" moo cang kho" kyo" ziyo' yu joem ri khaid thu' pyam da.
Yesu Byu Dagyug Ri Noo Ge Loo" Nhang: Khyoo:
(Mat 8:1-4; Luk 5:12-16)
40Mang: gam: noo dab su: dayug Yesu jhang re" Nyang: gi Yesu shid khoin" moo poid thug thoug lho: nang nau rigi ngoori yo" gyeungshang: loo" nhang: zi nghoid da:- ga: nyang: ri mho' nyid. 41Yesu gi nheug gyo: khyeug ziyo' nya: lo, yhoin" kaid wigi nyang: ri zei ci: zoore"- ngoo nau gyeungshang: loo" re,- ga: tid. 42Houg: lang" nyang: manggam: noo ge lo" wigi gyeungshang: lo". 43-44Hau: thang: Yesu gi nyang ri jhug za: zoug" nhang: wigi he: khyoo: hang" ri we' ci" atid kyoo"- lhid' we'. Nhgoid loug we' Khainjung pho, jhang yhe: lho: re" gung toin" shid' we' Hougsu" wigi Meing: byu yi shid moo nang ge shang: lo" zi sagsi: bui" baja"- Moshi amyeung" byid: to" da" xoin" ri lo" ngei" byid: we' ga: tid lho: phyed za: phang: loo" nhang:. 45Nghoid loug we' nyang gi thu' yhe: lo" wigi hau: khyoo" ri yoem: kaid tid kyo" ziyo' ludang: ri fu" nheung kaid bye. Houg yoomo Yesu gi voo khyoug: khyoo: di: di: age vang yhe: shug wigi vooyam vooqei; moo nyang: kyeing" nyid da-_ khyi khang" moo" mo mung" byu yi gi nya: jang" moo re: lo boem ago".
Currently Selected:
MARKU 1: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.