NGOUG JI: 1
1
Yerusalem Da" Nheig Koug Khyoo: Joem
1Shid phyang" mung" byu yi byeung" sho' nyid da" Yerusalem gi
akhid" nyang: kyeing" zoongi phyeig nyid bye:.
Shid phyang" mougmyid wigi phoug" tab ngi: shab byid: da" voomoo" gi
akhid" nyang: gi cougmoo" myhi' yo' du jo, bye:.
Gye" reung: da" voomoo" joem mo
myonhoo: ngilang: bo thang da" voomoo" gi join, bue" loo" bye:.
2Nyang: gi damyen, goin" ngau, nyid.
Ngoug byid gi nya: booloid moo: yau gyo" loo bye:.
Xang: shi" mo nya: byencang" yi we'
nyang: ri nheig teing zi dayug we' aboo loo.
Nyang: yo' zoem" khau: lo da" bidnoem yigi nyang: ri ngeug he: pyam boem lho:
akhid" dangain" mo, nyang: ri thougtheung lo boem bye:.
3Yuda byu yigi pang" thoug wa abo da" join, bue" jo, abye: go".
Nyangnu" ri yhoem: mo khaid tang" pyam abye: go".
Nyangnu" gi nyangnu" da" mougmyid ga:
ayo" myheung da" goo" meing: moo: yhe: nyid ago".
Hougmoo: gyivoo joem lheing khoem to" wigi
phang: loid khyoo: ajo, loo: nghoid ago".
4Hau: gyeung" shang: da" bidnyid moo: Noku Yhoem: Moo" khyoo:
akhid" gi hang" are" noku lo: boem nghoid ago".
Hau: joyoo moo: jikhoin" lhoung khoin" da" myiyi: nu" yi dayam dayoo: shoug" lho:
khainjung yigi noo kyeing" za: dakyeung" nyid.
Voomoo" khoem" joem we' akoem: dajo, jo,.
Houg: yoomo Ziun gi nheig koug nheig nge nyid.
5Nya: gyivoo joem gi oung: doid bye:.
Nyangnu" gi nyang: ri yoem: so' khyo" zei: ci: ago".
Myoo: sho' da" nya: yooboo dangain" yoomo nyang: ri
Aseing gi yau: khi" zi shoug" nhang: abye:.
Nya: zoo: yiri we' gyivoo yi myheug shu" loo" bye:.
6Yerusalem da" gyi: sheung: reung: thang khyoo: gi
lid: loo" bye: da" ayo, khyo" anghoid loo:.
Nya: da" vhu" shi: bang: gi zooyoid lho: yoem: neung: jo, da:.
Shoo" khaid su: da" lo, mo phang: loid da" xaid yo' du nyid.
7Akhid" jham" coug: youg byo, yoin" jo, da" Yerusalem voomoo" gi
goonham' gyi: sheung: reung: lid: lo da" khyoo: ri myid boin: nyid da:.
Nya: gyivoo yi lo, khoug: khyoo: gyo" vang lo" da" uri nyang: ri pang" thoug yu wa zi hang" anyid.
Nyang: ri oung: pyam bang: gi nyang: gyoeb, gyo" lo" khyoo: ri yu" yi nyid ago".
8Nya: da" ngi: shab khyoo: gi bei: byug bye:.
Nyang: gi shoocen: doem: nghoid nyid wigi yu" nge nyid ago".
Nyang: gi nookyeing" kyeung" nyid ziyo' sho' ziyo' nya: myonhoo: ri nghoeb ci: da:.
Yerusalem gi gyoug dain' pho" youg: noo yooboo joem yo'
nya: gung ri aco' ajhoid koid pyam da:.
9Nya: da" ayoung" ashang: khyoo: ri lei lei yo" myang.
Nghoid loug we' nyang: gi: nya: vhu" pi: lo, kyo' shid re"
loem zoo: wa khyoo: ri cishu: anhang: nghoid da:.
Nyang: leung gyo" lo" da" khyoo: gi yu" gyoug yu" lhoung: khyoo: nghoid nyid.
Nyang: ri hang" we' nheig ayo" teing byid.
Nya: gyivoo joem gi nyang: ri oung: pyam yoomo
nyang: gi Aseing jhang khyoo: nheig khyeug shoomyen: byid: shi" wa shid re" yoid ngau nyid abye:.
10Nya: gyivoo joem gi nyang: mo zi jonu" dangain" ri
lhoid yu pyam byid: boem bye:.
Tungbau byumyu" yi ayo" vang loo" ga: Aseing toem to" da"
Noku Yhoem: Moo" khoug: khyoo: nyangnu" vang lo" boem ziri nyang: myang bye:.
11Nya: voobyu yigi zoo: noem sho: yen" uri nookyeing" kyeung" ago".
Nyangnu" gi nyangnu" da" gungdu: yo" dei nyid wa shid re" nyangnu" da" zi jonu" joem yo'
zoo: noem, thid zo: pyam boem ago".
Voomoo" gi Aseing we"- ngoo ri yu" we'
ngoo nheig kyoo" nheig gyam wim nyid ziri myang byid: we' ga: yoid ngau nyid.
12Nyang: gi nya: anam khyo" so" lid: lo" da" yugkhang" moo" ri «Ngoo ri yu" yu" ge'.
Nga" noodam yhang: te" zigi khanham hang" we' ashau" yu" shi" goo" wa.
Aseing nheig joem: yo: da" bidnyid moo:
ci: loo byid: da" dam noo nghoid» ga: lhoem: yoid ngau kyo" nyid.
13Nyang: gi tho' mo myi: ri nhang: khyo' kaid lho: hau: myi: gi nga" da" ung: khoug: moo: nge" nyid.
Nyang: gi nga" shid moo: lhid' thoung: to" wigi
ngoo ri myidjang khyoo: she: khyo' pyam bye:.
Hau: thang: ri nyang: gi ngoo ri she: pyam to" lho:
byeing abyed dam khe" noo nhang: to" da:.
14Nyang: gi nga" yooboo dangain" ri xoem" to" lho:
hau" yooboo dangain" ri shoem" deung: to" wigi nga" leung zeung: moo: foid too" bye:.
Houg: yoomo hau: zi lid: wigi yoem: neung: loo" bye:.
Aseing gi ngoo ri nga" gyivoo joem da" lo, moo: ab byid: pyam bye:.
Ngoo ri: pang" thoug su: aboo loo: yoomo
nyangnu" ri ngoo ayo" thougtheung loo.
15 Aseing gi nga" yoem: bo thang da" gyizoo: yiri juang" yi pyam da:.
Nga" zoolu: yiri phyo' shoin pyam byid: wa shid re"
gyidab daloem: ri nyang: nhang: kaid da:.
Nyang: gi zabyid xoem: mo zabyid shi" ri yhang: ti"-
mhoin khyoeb pye" pyam bye:.
16Houg: yoomo ngoo ngau wigi nga" myojid" mo ngoug byid byeung" shoin: yau gyo" nyid.
Hang" we' ngoo ri nheing teung lho: yoem: ayo" lung: byid:.
Gyivoo joem gi ngoo ri oung: pyam bye:.
Nga" byumyu" yigi ci" we' ayoo" loo.
17Ngoo gi nga" lo, ri yhoin" kaid nghoid loug we' ngoo ri: hang" we' pang" yu zi anghoid.
Aseing gi nga" shoid zoo: shoid zeing khyoo: gyivoo joem ri khe: kaid byid: bye:.
Nyangnu" gi ngoo ri aco' ajhoid da" ziri yhang: ti" zoem" kau boem.
18Nghoid loug we' Aseing gi tarha" nyeung veung" su: nghoid.
Khasu" wim ga: ri ngoo gi nya: dang: ri atam" gyoo: koid lid: loo bye:.
Khyi khang" moo" mo mo, we"- ngoo ri bo tam" gyoo: byid: ge'.
Nga" da" dam noo ri bo yu" byid: ge'.
Nga" zoolu: yi yo' zoomyi: yiri thung: byu khyo" myheug shu" lo" abye: go".
19Ngoo gi nga" shoid bo dab da" bidnoem yiri khe: kaid nghoid loug we'
nyangnu" gi ngoo ri anau pang" yu loo: nghoid ago".
Khainjung yi yo' vhujhung: yigi voomoo" mo fu" moo" khyoo: joem moo:
nyangnu" gung du: dei nyid wa shid re" zoo: noem sho: yen" zoore shid: lo" abye: go".
20O" Aseing we"- ngoo dayam, dayoo: shoug" nyid ziyo'
nga" nheigloem: myid myoo: ung: loug nyid ziri yu" byid: we'.
Nga" yooboo joem yoomo ngoo kougshu: wigi
nga" nheigloem: byo, yoin" loo" bye:.
Hau" fu" moo" khyoo: joem moo: byu said go" nyid boem ago".
Yhoem: khoug: moo: lang" byu shid: byoo dain zi jo, ago".
21Ngoo nookyeing" kyeung" da" thui: ri tam" gyoo: byid: la,.
Ngoo ri nheig teing ung: teing byid: wa byu hang" aboo.
Nga" tho' moo: nang bue" loo nhang: da" kyi" khyeug da" khyoo: joem ri
nga" gyivoo joem gi yu" gau nyid boem ago".
Nang dangsoo" byid: to" da" bidnyid we' ju" loo nhang: abye:.
Ngoo dayam, dayoo: shoug" nyid ti" nga" gyivoo joem ri we' loem zoo: nhang: we'.
22Nyangnu" da" akhyeing" ashoeb da" moo" zoo" yoomo nyangnu" ri yooboo dam byid: we'.
Yooboo yoomo nang ngoo ri yooboo dam byid: yhang: ti"
houg: bang: ri we' yooboo dam, byid: we'.
Ngoo gi koug shu" wigi nookyeing" kyeung" lho: gi
Emyed nheigloem: khoug: moo: no nyid.
Currently Selected:
NGOUG JI: 1: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.