2PETRU 1
1
1Yesu Khristu da" join yo' lagyoo: nghoid su:- Ngoo Simun Petru gi Ngoonu" da" Mangsoo yo' khyoid yu da" Asing: Yesu Khristu da" deung byeung" khyoo: moo ngoonu" yhang: ti"- phoug" dab da" loem" jeung" khyoo: yo" yu bye: bang: jhang khyoo:- dang: pyeung: kaid.
2Mangsoo yo' yha" da" khyoid yu Aseing: Yesu Khristu ri nanu" se' loo bye: yoomo nanu" gi jeju" yo' ngeipyo: khyoo: ri joeb byeung" sho' shau" kham: yu goo" baja" o".
Mangso Da" Khe: Yu Bang: Yo' Khyen: Yu Khyoo:
3Nya: da" myonhoo: phung" yoeb yo' ge thang khyoo: joem ri gam boem shau" yuwa shid re" nyhang" ri khyoid yu bye: da" Mangsoo ri se' lo boem bye: yoomo Mangso da" yoem so' gi-deungmain" da" noku thung" loem" jeung" khyoo: moo kangso' yo" dei: nyid wa shidre"- nyhang" moo ca" nyid da" khyoo: bain, sho' ri byid: to" bye. 4He: khyoo: yoomo gye" gyi: sheung: wigi phoug" dab da" jeju" jhung: shug yo' sen: lho: wigi-dang: soo" khoin" joem nyhang" ri byid: too" bye. Hougsu" nghoid yoomo he: da" jeju" joem khoug: moo-ngoonu" gi moug myed tho' moo lhu: phyo' lhu: shoin' se' da" vhoo: boo loug gyi: khyoo: mo loid byoin lo" lho: Mangso aved' ri yo" wang zhoug" yu goo" baja". 5Khyoo: he: khaid nyang: yoomo nanu" da" loem" jeung" khyoo: moo ge lho' da" khyoo:- se' zi dalung: kaid nyid ge'. 6Se, jang" moo nyang nya: da" gungdu: ri yo" khang" zi nyang: nya: da" gungdu: ri yo" khang" tho' moo kham' zeung: zi kham' zeung: khyoo: moo tarha" ri phau" cang zi. 7Tarha" phau" cang jang" moo mang: nhung" ri jheddab zi mang: nhung" ri jheddab tho' moo" - athang agoin zi dakaid loung: nyid ge'. 8He gu: gi nanu" moo aboo age da" yoem: so' joem nghoid. He: gu: gi nanu" moo athang agoin dabo jo, nghoid rigi ngoonu" da" Aseing Yesu Khristu ri nanu" se' lo ziyo' kangso' dei da" khyoo: moo zhang" zhang" yang yang nghoid wigi akyu" bo thu' loo nhang: wa zi nghoid. 9Nghoid loug we' hau: yoem: so' ri ayo" yu bang: hang" nghoid loug we' vi: vi ayo" myang se' da" myo, amyang su: nghoid yoomo nyang: zei: lid loo bye: da" yougnoo yooboo mo wigi cid" khyoid' cid" shang: pyam shau" bye: ziri to" myhed' pyam su: nghoid.
10Hougsu" nghoid yoomo nga" mang: nhung" yi we' nanu" ri Mangso wigi khe: yu ziyo' khyen: yu bye: ein: da" khyoo: ri khanham we' shau" myed kham, zo: nyid wa shid re" je" ri yoem: kaid nyid ge'. hougsu" koid nyid boem nghoid rigi nanu" da" loem jeung" khyoo: ri khanham we she: pyam' boem wa zi anghoid. 11Khyoo: he: khaid khyo" cang lo" boem nghoid rigi ngoonu" da" Aseing: yo' khyoid khyi: yu su:- Yesu Khristu da" athang agoin da" mungdain: khyoo:- yo" vang loo" wa da" akhang"- nanu" ri joeb joeb byeung" byeung" byid: wa zi nghoid.
12Hougsu" nghoid yoomo nanu" gi-he: da" khyoo: joem ri se' gyo: ci: lho" wigi nanu" kham: yu ci: da" hau: deungmain" da" khyoo: moo geung: geung: teung teung ayang: qei" to" abye: go. Nghoid sho' loug we' ngoo gi nanu" ri khanham we da tid poin" nyid noug shi. 13He: da: kangso' dei nyid shi" ayo' bidnyid gu: moo hau: khyoo: yo' sen: lho: wigi nanu" ri lhid' zid" wa shid' mo tidpoin" wa khyoo: gi ngoo zei eung: da" moo" nghoid ein: ngoo myed yu" nyid. 14Ngoonu" da" Aseing Yesu Khristu- ngoori bang" bang nyang:- tid poin" too" bye: ziyo' dakhyoo" ti" -he: da" shid: se' gungshoo" ri khamyhang amyang" ri khyoid' she: pyam wam, bye: ziri ngoo se' nyid bye. 15Hougsu" nghoid yoomo ngoo shid: byug thang: ri he: da" khyoo: joem ri nanu" khanham we' daboin: so" nyid wa shid re" ngoo yoem: so' thang" sho' yoem: kaid wa zi nghoid.
Khirstu Da" Phung" Yoeb Ri: Myang Da" Sagsi:
16Ngoonu" da" Aseing Yesu Khristu da" yoem: moo" phung" yoeb yo' ju" re" da" khyoo: nanu" ri si' nhang: wa da" shid re" ngoonu" gi byu yi koid: zheung" koid to" da" moomyed: ri ayang: koid khyoo: akoid boem loo. Ngoonu" nya: myu, jid" yo' nyang:- nya: da" gyi: sheung reung: da" khyoo: ri nyang:- shau" myang boem bye. 17Nyang: ri phoo Mangsoo mo nyang- myonhoo: ngalang" phung" yoeb byid: da" uri we' je" gyi: thang da" phung" yoeb khoug: mo wigi nya: jang" moo ju" re" da" thui: gi He" yug gi ngoo vho" ngei da" ngoo jheddab da" nga" zoo: nghoid, ga: wigi tid uri we' ngoonu" houg moo nyang: yo' dage" nyid. 18Hau: ayo' moo nyang:- ngoonu" gi hau: Aseing: yo' gyeungshang: da" boem tho' moo nyid nyid uri moug: khyo" myeung thu' lo da" thui: ri ngoonu" shug gyo: boem.
19Hougsu" nghoid yoomo ngoonu" gi lapi: yi tid fu" to" da" yoeb, myang mungdang: ri je" wigi nheug shid nheug deug nyid boem bye. Nanu" we' hau: mungdang: ri goo" lhoo: za: datam: gyo: nyid ge". Khasu wim gari hau: zigi nanu" da" nheugloem: ung: khoug: moo myo, myang: lo wigi-boo" myhu: thu' lo da" ayo' moo moug: coid' da" joyoo moo bang nyid da" myibung: yhang: ti" nghoid nyid. 20Hang" nghoid sho' loug we"- nyang: tu: nyang: myed vho: khyo" jhoem: mungdang: mo lapi: dang: khoin" da: dang kang: ayo" koid: yu ziri dangain" da" shid moo xoem" too" ca" nyid. 21Khasu wim gari kha: da" lapi: dang we' byu yi da" myedsoin' nyeung khyoo: bue" thu' lo yu" zi anghoid. Gyeungshang: da" Venyi wigi nheugloem: lhu: too' byid: zi shau" bang: gi Mangso jhag mo ju" re" da" lapi: dang: ri thoid' tid kyo" ago".
Currently Selected:
2PETRU 1: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.