NAHUM 1
1
1Himi hi Elkosh khuami Nahum in Nineveh khua thuhla ah langnak a hmuh mi a si:
Nineveh Khua Parah Bawipa Thinhennak
2 Bawipa cu thiiknei le phuhlam
hmang Pathian a si;
Bawipa cu phuhlam hmang le
thinheng thei a si.
Amah a dodaltu parah phu a hlam ih,
A ral pawl parah thinheng in
a lehrul.
3 Bawipa cu olte in a thin
a heng lo;
Asinain a huham cu a nasa ngaingai.
Misual pawl hrem loin a luatter
hrimhrim lo ding.
Bawipa ih fehnak kipah phusiing
le thlipi a tho ih,
Mero cu a ke fehnak ihsin a thomi
leikhu a si.
4Tifinriat thu a pek ih a kanter,
Tiva hmuahhmuah khal an caar
an ro ṭheh.
Bashan ram le Karmel tlang tla an
ro ṭheh ih,
Lebanon tlang ih pangpar khal
an vuai ṭheh a si.
5Tlang saangpipi a hmaiah an hnin ih,
Tlang niamtete an cim ṭheh.
A hmaika ahcun leilung le a parih
ummi pawl cu,
An khur ih an ṭhia.
6A thinhengnak hmaiah zoso a ding
thei ding?
A thin ai-thoknak cu zoso a tuar
thei ding?
A thinhengnak cu tisa bangin
a burh,
A hmaika ahcun lungto hman
leivutah an cang ṭheh.
7 Bawipa cu a ṭha,
Harsatnak caanah beunak ṭha
bik a si.
A hnenih humhimnak a hawltu cu
a zaangfah ih,
Himdamnak an ngah a si.
8Tilian in thil a siatsuah bangin,
A ral pawl cu a siatsuah ih,
A dodaltu pawl cu thihnak
khawthim sungah a thlak hai.
9Ziangah so Bawipa cu a phiar nan
tum rero?
A lo siatsuah ṭheh hai ding a si.
Zohman in voihnih tiang an do
ngam dah lo.
10Hling le so an ngerh awk ṭheh
bangin an ngerh aw;
Zu phaam pawl bangin an ri ih,
Hramro bangin an kaang ṭheh ding.
11Maw Nineveh, na sungin misual
pakhat Bawipa dodaltu le midang
thusual forhtu a suak zo.
12 Bawipa in Israel mi hnenah,
“Assiria mi an tamzet ding ih
an cakzet ding naón,
Siatsuah an si dingih an cem ding.
Ka minung pawl, ka lo hrem zo ih
Ka lo hrem sal nawn lo ding.
13A lo delhtu kawn cu ka khiak ding,
A lo ṭemṭawntu thir cikcin cu
ka phihcat ding,” a ti.
14Assiria hrangah Bawipa ih
thupekmi cu:
“Na hmin sawngtu dingah tefa
na nei nawn lo ding;
Na khawzing biakinn ihsin
na milem le an zuk pawl cu
ka khuai ṭheh ding.
Na thlaan cu atu ihsin ka timtuah
cia ding ih,
Nung tlak na si nawn lo,”
ti hi a si.
15Tlangpar ah thuthangṭha a phurtu
le daihnak a rak thlentu ih
ke khi zohhnik uh!
Maw Judah, na tuah dingmi puai
cu tuah aw,
Na thukammi cu kimter aw.
Mi ṭha lo pawl cun an lo neh
nawn lo ding,
Annih cu siatsuah ṭheh an
si zo.
Currently Selected:
NAHUM 1: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.