JOHAN 20
20
A Lawngmi Thlaan
(Mat 28.1-8; Mar 16.1-8; Luk 24.1-12)
1Nipi Ni zingpit khua a van hlanah, Mari Magdalene cu thlaan ah a va feh ih thlaankhar lungpheng ṭhawn cia-in a um kha a hmu. 2Simon Piter le Jesuh ih a duhdawtmi dungthluntu hnenah a va tlan ih, “Thlaan ihsin Bawipa an thiar hlo zo; khuitawkih an ret ti kan thei lo!” tiah a sim.
3Cun Piter le a dang dungthluntu cu an pok ih thlaan ah an va feh. 4An pahnih in an tlan ih a dang dungthluntu cu Piter hnakin tlan a cak deuh ruangah hmaisa deuh ah thlaan ah a thleng. 5Thlaan sung cu a vun bih ih ruak tuamnak puan nemte cu a hmu, asinain a vung lut lo. 6A dungin Simon Piter cu a ra thleng ih thlaan sung ahcun a vung lut mai. Ruak tuamnak puan nemte le, 7Jesuh ih lu ṭemnak puan kha a hmu. Asinain a lu ṭemnak puan cu ruak tuamnak puan nemte umnak ah a um lo; amah dangte in zual aw in a um. 8Cule dungthluntu dang, thlaan a thlengtu hmaisa deuhtu pa khal cu thlaan sungah cun a lut ve ih a hmu ih a zum. 9Thihnak ihsin a thosal ding tiih Ca Thianghlim ih a timi kha a tican an thei thiam hrih lo. 10Cule dungthluntu cu an inn ah an tlung.
Mari Magdalene Hnenah Jesuh A Lang
(Mat 28.9-10; Mar 16.9-11)
11Mari cu thlaan lengah a ding ih a ṭap rero. Cutiih ṭah phah in a kuun ih thlaan sung cu a vun bih ih, 12vancungmi pahnih puanrang thawn thuam aw in Jesuh ruak an rak retnak ah khan a lu lamah pakhat, a ke lamah pakhat an to kha a hmu. 13Vancungmi cun, “Ziangah so na ṭah rero?” tiah Mari cu an sut.
Anih in, “Ka Bawipa zo in si maw an lak ih khuitawkah an ret ti ka thei lo,” tiah a sawn.
14Cule Mari cu a her ih cutawkih Jesuh a din kha a hmu; asinain Jesuh a si kha a thei lo. 15Jesuh in, “Nunau nu, ziangah so na ṭah rero? Zoso na hawl?” tiah a sut.
Cutiih a biatu cu hmuan kiltu a si tiin a ruat ih Mari cun, “Bawipa, nangmah in na lak a si ahcun na retnak kha i sim awla ka feh ding ih ka va la ding,” tiah a ti.
16Jesuh in, “Mari!” tiah a vun ko.
Mari cun Jesuh lam a hoi ih Hebru ṭong in “Rabboni!” tiah a ti. Rabboni ti cu Sayapa tican a si.
17Jesuh in Mari cu, “I kai hlah! Ziangahtile Pa hnenah ka thleng hrih lo. Asinain ka unau pawl hnenah va sim awla ‘An Pa a si vemi ka Pa, an Pathian a si vemi ka Pathian hnenah ka feh ding a ti,’ tiah va sim aw,” a ti.
18Cuti cun Mari Magdalene cu a feh ih Bawipa a hmuhnak thu le a hnenih a ṭongmi pawl hmuahhmuah cu dungthluntu pawl hnenah a sim.
Dungthluntu Hnenah Jesuh A Lang
(Mat 28.16-20; Mar 16.14-18; Luk 24.36-49)
19Cuih Nipi ni zanlam ah dungthluntu pawl cu hmunkhatah an tong aw. Judah mi hotu pawl an ṭih ruangah sangka hmuahhmuah an khar ṭheh. Cule Jesuh cu a ra lang ih anmah lakah a ding ih, “Nan hnenah daihnak um ko seh,” tiah a ti. 20Cumi a ṭong ṭheh in an hnenah a kut le a hnak a hmuh. Dungthluntu pawl cu an Bawipa an hmuh tikah an lung a awi ngaingai. 21Jesuh in an hnenah cun, “Nan hnenah daihnak um ko seh! Ka Pa in i thlah vekin nannih khal ka lo thlah ve a si,” tiah a ti. 22Cutiih a ṭong hnuah an parah a thaw a thawt ih, “Thlarau Thianghlim rak co uh! 23Mi an sualnak nan ngaidam ahcun ngaidam an si ding; nan ngaidam lo a si ahcun ngaidam lo an si ding,” tiah a ti.
Jesuh le Thomas
24Dungthluntu hleihnih lakah pakhat a si mi (Faphir an timi) Thomas cu Jesuh a lang laiah an hnenah a um lo. 25Curuangah dungthluntu dang pawl in, “Bawipa kan hmu sokhaw!” tiah an sim.
Thomas in an hnenah, “A kut thir in an khennak hma si ka hmuh ih ka kut in cuih hma si le a hnak kha ka tham ngah hlanah cun ka zum lo ding,” tiah a ti.
26Zarhkhat hnuah dungthluntu pawl cu innkhaan sungah an um ih Thomas khal a um ve. sangka an khar ṭheh naón Jesuh cu a ra lang ih an lakah a ding in, “Nan hnenah daihnak um ko seh!” tiah a ti. 27Cule Thomas hnenah cun, “Hinah na kutzung rak re hnik awla ka kut hi zohhnik aw; na kut rak dawh awla ka hnak hi tham aw. Zum loin um nawn hlah; zum thlang aw!” tiah a ti.
28Thomas in, “Ka Bawipa le ka Pathian!” tiah a ti.
29Jesuh in, “I hmuh ruangah na zum a si maw? Keimah i hmu lo naón a zumtu cu mi thlawsuak an si,” tiah a ti.
Hi Cabu Ngantu Ih Tumtahmi
30A dungthluntu pawl ih mit hmuhah Jesuh in hmuhsaknak tampi a tuahmi, hi cabu sungih ngan lomi tampi a um. 31Sikhalsehla hi hmuah hi ka ngan ih ka ngannak sullam cu nannih in Jesuh cu Messiah, Pathian Fapa a si ti nan zum ih amah nan zumnak thawngin le amah ih hminin nunnak nan neihnak dingah a si.
Currently Selected:
JOHAN 20: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.