EZRA 9
9
Miphun Dang Nupi Neih Thu Ezra In A Thei
1Cuih thil pawl an tuah ṭheh hnuah, Israel hotu upa hrekkhat pawl ka hnenah an ra ih, “Miseenpi siseh, puithiam le Levi mi pawl siseh, hlimphir in an um lo; kan kiangkap ramih a ummi Kanaan mi, Ammon mi, Moab mi le Izipt mi pawl thawn an um tlang ih Hit mi, Periz mi, Jebus mi le Amor mi pawl thawn an cokrawi-aw ṭheh a si. Hi miphun pawl ih an tuahmi ningsinza thil a si mi pawl tla an tuah ve. 2Judah mipa pawl in miphun dang nunau an ṭhi ih Pathian miphun thianghlim cu cokrawimi le miphun borhhlawh ah a cang zo. A luar bik cu hotu le bawi pawl an si,” tiah in ti. 3Cuih thu ka theih tikah ninghang riahsia in ka hnipuan ka thlek, ka sam le ka khahmul ka bot ih thinpit beidong in ka to. 4Zanlam thawinak pek tikcu tiang riahsia in ka to ih mi hrekkhat cu ka kiangah an ra. Saltaannak ihsin a ra kirmi pawl sualnak thu Israel ih Pathian in a phuan ruang ih thinphang mi pawl an ra.
5Zanlam thawinak pek tikcu a kim tikah ninghangih ka tonak ihsin ka tho ih, ka hnipuan tlekpi thawn baan phar le khukbil in Bawipa ka Pathian hnenah cun thla ka cam. 6“Maw Pathian, ka ning a zak tuk ih na hmai ka zoh ngam lo. Kan sualnak hi kan lu hnakin a sang sawn ih van a hun dai. 7Kan pupa ih san in atu tiang kannih na minung pawl hi kan sual ngaingai. Cutiih kan sual ruangah kanmah le kan siangpahrang pawl le kan puithiam pawl tiangin ramdang siangpahrang pawl ih kutsung kan thleng. An duhduh in in that, kan thilri in long, thawng ah in thlak ih tuihsun tiangin ningzak hmaisia in in tuah. 8Atu-ah tikcu tawite sung, Bawipa kan Pathian, nangmah in in zaangfah ih mi hrekkhat pawl cu nungdam in in luatter ih hi hmun thianghlim ahhin himdam in kan um. Saltaannak ihsin in runsuak ih nunnak thar in pe. 9Sal kan si naón saltaannak ah in taanta lo. Persia siangpahrang pawl cu kan parah an mithmai na ṭhatter ih Judah le Jerusalem ah himdamte ih um sal dingah le a siat thluh zomi na Biakinn sak sal dingah in thlah.
10“Sikhalsehla atu-ah, maw kan Pathian, hi bangtuk ih thuhla a um hnuah ziangso kan sim ngam nawn ding? Na siahhlawh profet pawl hnen ihsin, 11in pekmi thukham hmuahhmuah cu kan siatbal thluh. Na profet pawl in kan luah dingmi ram cu ram sung minung pawl in an baalter ih ram pumpuluk ah ningsinza thil le thil ṭha lo in an khahter ruangah ram thianglo a si, tiah in sim. 12Cuih tlunah hi kan luah dingmi ram cu ramnuam si dingah kan duh ih kan tesinfa pawl hnenih roh dingah kan duh ngaingai a si ahcun hi ramih a rak um ciami pawl thawn ṭhitpolh awknak tuah hrimhrim lo dingah le an hlawhtling dingih bawm hrimhrim lo dingah in tiam fawn. 13Kan sual ruang le kan ṭhat lo ruangih hitluk hremnak kan tuar hnuah hin, maw kan Pathian, nang cun kan tuar dingmi hnakih deem deuh in in hrem ih atu bangtuk in nungdam in in umter, ti kan thei. 14Cubangtuk hnuah hin ziangtinso hi mi ṭha lo pawl thawn ṭhitpolh awknak tuah tahratin na Thukham pawl cu kan dungtun thei nawn ding? Cutiih kan tuah ahcun na thin kan lo hengter tuk ding ih pakhat hman luat loin kan ci in hmit thluh thlang lo ding maw? 15Maw Bawipa, Israel ih Pathian, nang cu na dingfel ih atu khalah in luatter mi, a taangsun kan si. Na mithmuh ah kan sualnak thawn kan um; na hmaiah a ra ngam ding khal kan si lo,” tiah ka ti.
Currently Selected:
EZRA 9: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.